ದೇಹದ ತೂಕ ಇಳಿಸಿಕೊಳ್ಳಲು ನೀವು ಹಲವಾರು ರೀತಿಯ ವ್ಯಾಯಾಮಗಳು ಹಾಗೂ ಆಹಾರ ಕ್ರಮಗಳನ್ನು ಅನುಸರಿಸಿಕೊಂಡು ಹೋಗಿರಬಹುದು. ಆದರೆ ಕೆಲವೊಂದು ಜ್ಯೂಸ್ ಕುಡಿದರೂ ಅದರಿಂದ ದೇಹದ ತೂಕ ಇಳಿಸಿ ಫಿಟ್ ಆಗಿ ಇರಬಹುದು. ಸಂಪೂರ್ಣವಾಗಿ ಕೇವಲ ದ್ರವಾಹಾರ ಸೇವನೆ ಮಾಡಬೇಕು ಎಂದು ನಾವಿಲ್ಲಿ ಹೇಳುತ್ತಿಲ್ಲ.
ಆದರೆ ತಾಜಾ ಜ್ಯೂಸ್ ಗಳನ್ನು ನಿಮ್ಮ ಆಹಾರ ಕ್ರಮದಲ್ಲಿ ಸೇರಿಸಿಕೊಂಡರೆ ಆಗ ಖಂಡಿತವಾಗಿಯೂ ನಿಮಗೆ ತೂಕ ಇಳಿಸಲು ತುಂಬಾ ಸಹಕಾರಿ ಆಗಿರಲಿದೆ. ಜ್ಯೂಸ್ ಕುಡಿದರೆ ಅದರಿಂದ ಹೆಚ್ಚಿನ ಪ್ರಮಾಣ ಖನಿಜಾಂಶಗಳು, ವಿಟಮಿನ್ ಗಳು ಮತ್ತು ಆಂಟಿಆಕ್ಸಿಡೆಂಟ್ ಗಳು ದೇಹಕ್ಕೆ ಲಭ್ಯವಾಗುವುದು. ಇದು ಚಯಾಪಚಯ ಕ್ರಿಯೆಗೆ ವೇಗ ನೀಡುವ ಕಾರಣದಿಂದಾಗಿ ಅದು ಕ್ಯಾಲರಿ ದಹಿಸಲು ನೆರವಾಗುವುದು.
ತೂಕ ಇಳಿಸಿಕೊಳ್ಳುವ ಜ್ಯೂಸ್
ಜ್ಯೂಸ್ ಬಳಸಿಕೊಂಡರೆ ಆಗ ಖಂಡಿತವಾಗಿಯೂ ತೂಕ ಇಳಿಸಬಹುದು ಮತ್ತು ಇದರಿಂದ ಇನ್ನು ಹಲವಾರು ರೀತಿಯ ಆರೋಗ್ಯ ಲಾಭಗಳು ಕೂಡ ಇದೆ. ನೀವಿಲ್ಲಿ ಆರೋಗ್ಯಕಾರಿ ಆಹಾರ ಕ್ರಮ ಪಾಲಿಸಿಕೊಂಡು ಹೋಗುವುದು ಅತೀ ಅಗತ್ಯವಾಗಿರುವುದು. ಯಾವ ಜ್ಯೂಸ್ ಕುಡಿದರೆ ತೂಕ ಇಳಿಸಿಕೊಳ್ಳಬಹುದು ಎಂದು ನೀವು ಈ ಲೇಖನದ ಮೂಲಕ ತಿಳಿಯಿರಿ.
ಕ್ಯಾರೇಟ್ ಜ್ಯೂಸ್
ಕ್ಯಾರೇಟ್ ನಲ್ಲಿ ಉನ್ನತ ಮಟ್ಟದ ನಾರಿನಾಂಶ ಮತ್ತು ತುಂಬಾ ಕಡಿಮೆ ಕ್ಯಾಲರಿ ಇದ್ದು, ತೂಕ ಇಳಿಸಲು ತುಂಬಾ ಸಹಕಾರಿ. ಒಂದು ದೊಡ್ಡ ಲೋಟದಲ್ಲಿ ಕ್ಯಾರೇಟ್ ಜ್ಯೂಸ್ ಕುಡಿದರೆ ಅದು ಮಧ್ಯಾಹ್ನದ ಊಟದ ತನಕ ಹೊಟ್ಟೆ ತುಂಬಿರುವಂತೆ ಮಾಡುವುದು. ಇದರಿಂದಾಗಿ ನೀವು ಬೇರೆ ರೀತಿಯ ತಿಂಡಿಗಳನ್ನು ತಿನ್ನುವುದು ತಪ್ಪುವುದು. ಹಸಿ ಕ್ಯಾರೇಟ್ ತಿನ್ನುವುದು ಅತ್ಯುತ್ತಮ ವಿಧಾನ ಎಂದು ಹೇಳಲಾಗುತ್ತದೆ. ಹೀಗಾಗಿ ಜ್ಯೂಸ್ ಮಾಡಿಕೊಂಡು ಕುಡಿದರೆ ಅದರ ಅದ್ಭುತ ಲಾಭಗಳು ಸಿಗುವುದು. ಕ್ಯಾರೇಟ್ ಜ್ಯೂಸ್ ಪಿತ್ತರಸ ಸ್ರವಿಸುವಿಕೆ ಹೆಚ್ಚಿಸುವುದು ಮತ್ತು ಇದರಿಂದಾಗಿ ತೂಕ ಇಳಿಸಲು ತುಂಬಾ ಸಹಕಾರಿ ಆಗಿರುವುದು. ಒಂದು ಸೇಬು, ಅರ್ಧ ಕಿತ್ತಳೆ ಮತ್ತು ಸ್ವಲ್ಪ ಶುಂಠಿ ಹಾಕಿಕೊಂಡು ತಯಾರಿಸಿದರೆ ಆಗ ಅದ್ಭುತವಾದ ನಿರ್ವಿಷಕಾರಿ ಜ್ಯೂಸ್ ತಯಾರಾಗುವುದು.
ಹಾಗಲಕಾಯಿ ಜ್ಯೂಸ್
ಹಾಗಲಕಾಯಿ ತುಂಬಾ ಕಹಿ ಇರುವ ಕಾರಣದಿಂದಾಗಿ ಅದರ ಜ್ಯೂಸ್ ಕುಡಿಯಲು ಹೆಚ್ಚಿನವರು ಹಿಂಜರಿಯುವರು. ಆದರೆ ಇದು ತೂಕ ಕಳೆದುಕೊಳ್ಳಲು ಸಹಕಾರಿ ಆಗಿರುವುದು. ನಿಯಮಿತವಾಗಿ ಹಾಗಲಕಾಯಿ ಜ್ಯೂಸ್ ಕುಡಿದರೆ ಅದರಿಂದ ಯಕೃತ್ ಪಿತ್ತರಸದ ಉತ್ಪತ್ತಿ ಉತ್ತೇಜಿಸುವುದು ಮತ್ತು ಕೊಬ್ಬು ಕರಗಿಸಲು ಸಹಕಾರಿ ಆಗುವುದು. ಹಾಗಲಕಾಯಿಯಲ್ಲಿ ಕಡಿಮೆ ಕ್ಯಾಲರಿ ಇದೆ. 100 ಗ್ರಾಂ ಹಾಗಲಕಾಯಿಯಲ್ಲಿ ಕೇವಲ 17ರಷ್ಟು ಕ್ಯಾಲರಿ ಮಾತ್ರ ಇದೆ. ಇದು ತೂಕ ಕಳೆದುಕೊಳ್ಳಲು ತುಂಬಾ ಸಹಕಾರಿ.
ಸೌತೆಕಾಯಿ ಜ್ಯೂಸ್
ಅಧಿಕ ನೀರಿನಾಂಶವಿರುವಂತಹ ಆಹಾರದಲ್ಲಿ ಕ್ಯಾಲರಿ ತುಂಬಾ ಕಡಿಮೆ ಇರುವುದು. ತೂಕ ಇಳಿಸಲು ಕ್ಯಾಲರಿ ಕಡಿಮೆ ಸೇವಿಸಬೇಕು ಅಥವಾ ಕ್ಯಾಲರಿ ಹೆಚ್ಚು ದಹಿಸಬೇಕು. ಇದರಿಂದ ಕ್ಯಾಲರಿ ಕಡಿಮೆ ಇರುವ ಆಹಾರ ಕ್ರಮ ಪಾಲಿಸಿಕೊಂಡು ಹೋಗಬೇಕು. ಇದರಿಂದ ಹೊಟ್ಟೆ ದೀರ್ಘಕಾಲ ತುಂಬಿರುವುದು. ಅಧಿಕ ನೀರಿನಾಂಶ ಮತ್ತು ನಾರಿನಾಂಶವು ಇರುವ ಕಾರಣದಿಂದಾಗಿ ಇದು ಬೇಗನೆ ಹೊಟ್ಟೆ ತುಂಬುವಂತೆ ಮಾಡುವುದು. ಇದಕ್ಕೆ ಲಿಂಬೆ ರಸ ಮತ್ತು ಪುದೀನಾ ಎಲೆಗಳನ್ನು ಹಾಕಿದರೆ ಆಗ ಇದರ ರುಚಿ ಅದ್ಭುತವಾಗಿ ಇರುವುದು.
ನೆಲ್ಲಿಕಾಯಿ ಜ್ಯೂಸ್
ಬೆಳಗ್ಗೆ ನೆಲ್ಲಿಕಾಯಿ ಜ್ಯೂಸ್ ಕುಡಿದರೆ ಆಗ ಅದು ಜೀರ್ಣಕ್ರಿಯೆ ವ್ಯವಸ್ಥೆಗೆ ನೆರವಾಗುವುದು ಮತ್ತು ಚಯಾಪಚಯ ವೃದ್ಧಿಸುವುದು. ಚಯಾಪಚಯ ವೇಗವಾದರೆ ಆಗ ಕೊಬ್ಬು ಕರಗಲು ನೆರವಾಗುವುದು. ಖಾಲಿ ಹೊಟ್ಟೆಯಲ್ಲಿ ನೆಲ್ಲಿಕಾಯಿ ಜ್ಯೂಸ್ ಕುಡಿದರೆ ಅದರಿಂದ ತೂಕ ನಿರ್ವಹಣೆಗೆ ನೆರವಾಗುವುದು. ಇದಕ್ಕೆ ಸ್ವಲ್ಪ ಜೇನುತುಪ್ಪ ಹಾಕಿದರೆ ಆಗ ಖಂಡಿತವಾಗಿಯೂ ದಿನವಿಡಿ ಚಟುವಟಿಕೆ ಮತ್ತು ಶಕ್ತಿಯಿಂದ ಇರಲು ಸಾಧ್ಯವಾಗುವುದು.
ದಾಳಿಂಬೆ ಜ್ಯೂಸ್
ದಾಳಿಂಬೆ ಜ್ಯೂಸ್ ಚರ್ಮಕ್ಕೆ ತುಂಬಾ ಒಳ್ಳೆಯದು ಮತ್ತು ಇದು ನೈಸರ್ಗಿಕ ಕಾಂತಿ ಮರಳಿಸುವಂತೆ ಮಾಡುವುದು ಮಾತ್ರವಲ್ಲದೆ, ತೂಕ ಇಳಿಸಲು ಸಹಕಾರಿ ಆಗಿರುವುದು. ದಾಳಿಂಬೆಯಲ್ಲಿ ಉನ್ನತ ಮಟ್ಟದ ಆಂಟಿಆಕ್ಸಿಡೆಂಟ್, ಪಾಲಿಫೆನಾಲ್ ಮತ್ತು ಲಿನೊಲೆನಿಕ್ ಆಮ್ಲವಿದೆ. ಇದೆಲ್ಲವೂ ಚಯಾಪಚಯ ಕ್ರಿಯೆಗೆ ವೇಗ ನೀಡುವುದು ಮತ್ತು ಕೊಬ್ಬು ಕರಗಲು ಸಹಕರಿಸುವುದು. ಹಸಿವು ಕಡಿಮೆ ಮಾಡಲು ಇದು ಸಹಕಾರಿ.
ಕ್ಯಾಬೇಜ್ ಜ್ಯೂಸ್
ಕ್ಯಾಬೇಜ್ ಜ್ಯೂಸ್ ಹೊಟ್ಟೆ ಉಬ್ಬರ ಮತ್ತು ಅಜೀರ್ಣ ಸಹಿತ ಹೊಟ್ಟೆಯ ಹಲವಾರು ಸಮಸ್ಯೆಗಳನ್ನು ನಿವಾರಣೆ ಮಾಡುವುದು. ಇದು ಜೀರ್ಣಕ್ರಿಯೆ ವ್ಯವಸ್ಥೆ ಶುಚಿಗೊಳಿಸುವುದು ಮತ್ತು ಕಲ್ಮಷ ಹೊರಹಾಕಲು ನೆರವಾಗುವುದು. ಇದು ತೂಕ ಕಳೆದುಕೊಳ್ಳಲು ಸಹಕಾರಿ ಆಗಿರುವುದು. ನಾರಿನಾಂಶವನ್ನು ಅಧಿಕವಾಗಿ ಸೇವನೆ ಮಾಡಿದರೆ ಅದರಿಂದ ಕೊಬ್ಬು ನಿವಾರಣೆ ಮಾಡಲು ತುಂಬಾ ಸಹಕಾರಿ ಆಗಿರುವುದು ಎಂದು ಹಲವಾರು ಅಧ್ಯಯನಗಳು ಹೇಳಿವೆ.
ನಾರಿನಾಂಶವು ಅಧಿಕವಾಗಿ ಇರುವಂತಹ ತರಕಾರಿಯು ದೇಹದಲ್ಲಿನ ನಾರಿನಾಂಶವನ್ನು ಹೀರಿಕೊಳ್ಳುವುದು ಮತ್ತು ಜೀರ್ಣಕ್ರಿಯೆ ವೇಳೆ ಲೋಳೆಯಂತಹ ಪದರ ನಿರ್ಮಾಣ ಮಾಡುವುದು. ಇದರಿಂದಾಗಿ ಜಿರ್ಣಕ್ರಿಯೆಯು ನಿಧಾನವಾಗುವುದು ಮತ್ತು ದೀರ್ಘಕಾಲ ತನಕ ಹೊಟ್ಟೆಯು ತುಂಬಿರುವಂತೆ ಮಾಡುವುದು ಎಂದು ತಜ್ಞರು ಹೇಳುತ್ತಾರೆ. ಕ್ಯಾಬೇಜ್ ಜತೆಗೆ ಸೇಬು ಮತ್ತು ಲಿಂಬೆ ಹಾಕಿಕೊಂಡು ಜ್ಯೂಸ್ ಮಾಡಿಕೊಳ್ಳಬಹುದು.
ಕಲ್ಲಂಗಡಿ ಜ್ಯೂಸ್
ಕಲ್ಲಂಗಡಿ ಜ್ಯೂಸ್ ನಲ್ಲಿ 100 ಗ್ರಾಂನಲ್ಲಿ ಕೇವಲ 30 ಕ್ಯಾಲರಿ ಮಾತ್ರ ಇದೆ ಮತ್ತು ಇದು ದೇಹವನ್ನು ತೇವಾಂಶದಿಂದ ಇಡುತ್ತದೆ. ಇದರಲ್ಲಿ ಅಮಿನೋ ಆಮ್ಲವು ಸಮೃದ್ಧವಾಗಿದೆ ಮತ್ತು ಇದು ದೇಹದ ಕೊಬ್ಬು ಇಳಿಸಲು ಸಹಕಾರಿ.
ಕಿತ್ತಳೆ ಜ್ಯೂಸ್
ತಾಜಾ ಕಿತ್ತಳೆ ಜ್ಯೂಸ್ ತುಂಬಾ ಆರೋಗ್ಯಕಾರಿ ಆಗಿರುವುದು. ಇದರಲ್ಲಿ ತುಂಬಾ ಕಡಿಮೆ ಕ್ಯಾಲರಿ ಇದೆ. ಕಿತ್ತಳೆಯನ್ನು ಕಡಿಮೆ ಕ್ಯಾಲರಿ ಇರುವಂತಹ ಹಣ್ಣು ಎಂದು ಪರಿಗಣಿಸಲಾಗಿದೆ. ದೇಹಕ್ಕೆ ದಹಿಸಲು ಬೇಕಾಗಿರುವ ಕ್ಯಾಲರಿಗಿಂತಲೂ ಇದರಲ್ಲಿ ಕಡಿಮೆ ಕ್ಯಾಲರಿ ಇದೆ. ಇದರಿಂದ ಇದನ್ನು ತಿಂದರೆ ಹೆಚ್ಚು ಕ್ಯಾಲರಿ ದಹಿಸಬಹುದು.
