ಗಾಯದ ಸಮಸ್ಯೆಯಿಂದ ಚೇತರಿಸಿ ತಂಡದ ಸೇವೆಗೆ ಮರಳಿದ ಆರಂಭಿಕ ಬ್ಯಾಟರ್‌ ಅಬ್ದುಲ್ಲಾ ಶಫೀಕಿ, ಇಂಗ್ಲೆಂಡ್‌ ವಿರುದ್ಧದ ಟೆಸ್ಟ್ ಸರಣಿಯ ಮೊದಲ ಪಂದ್ಯದಲ್ಲಿ ಆತಿಥೇಯ ಪಾಕಿಸ್ತಾನ ಪರ ಮನಮೋಹಕ ಶತಕ ಬಾರಿಸಿದ್ದಾರೆ.
2024ರಲ್ಲಿ ಅಬ್ದುಲ್ಲಾ ಶಫೀಕಿ ಹೇಳಿಕೊಳ್ಳುವ ಅಂಕಿ ಅಂಶವನ್ನೇನೂ ಹೊಂದಿರಲಿಲ್ಲ. ಮುಲ್ತಾನ್ ಟೆಸ್ಟ್ ಪಂದ್ಯಕ್ಕೂ ಮುನ್ನ 2024ರಲ್ಲಿನ ಅವರ ಟೆಸ್ಟ್ ಬ್ಯಾಟಿಂಗ್ ಸರಾಸರಿ ಕೇವಲ 7 ಆಗಿತ್ತು. ಆದರೂ, ಓಲ್ಲೀ ಪೋಪ್‌ ಸಾರಥ್ಯದ ಇಂಗ್ಲೆಂಡ್‌ ವಿರುದ್ಧದ ಪ್ರಥಮ ಟೆಸ್ಟ್ ಪಂದ್ಯದಲ್ಲಿ ಮನಮೋಹಕ ಬ್ಯಾಟಿಂಗ್ ನಡೆಸಿದ ಅಬ್ದುಲ್ಲಾ ಶಫೀಕಿ ಸಿಕ್ಸರ್‌ ಬಾರಿಸುವ ಮೂಲಕ ಮೂರಂಕಿಯ ಗಡಿ ದಾಟಿ ಮಿಂಚಿದ್ದರು
ಈ ಟೆಸ್ಟ್ ಪಂದ್ಯಕ್ಕೂ ಹಿಂದಿನ ದಿನ ನಡೆದಿದ್ದ ಪತ್ರಿಕಾಗೋಷ್ಠಿಯಲ್ಲಿ ನಾಯಕ ಶಾನ್‌ ಮಸೂದ್‌ ತಂಡದ ಯುವ ಆಟಗಾರನ ಸಾಮರ್ಥ್ಯವನ್ನು ಗುಣಗಾನ ಮಾಡಿದ್ದರು. ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಉತ್ತಮ ದಾಖಲೆ ಹೊಂದಿರುವ ಖುರಂ ಖಾನ್‌ ಬದಲು ಮುಲ್ತಾನ್ ಟೆಸ್ಟ್‌ಗೆ ಅಬ್ದುಲ್ಲಾ ಶಫೀಕಿ ಅವರನ್ನು ಆಯ್ಕೆ ಮಾಡಿದ್ದೇಕೆ? ಎಂದು ಪತ್ರಕರ್ತರು ಪ್ರಶ್ನೆ ಮಾಡಿದ್ದರು.
“ಟೆಸ್ಟ್ ಕ್ರಿಕೆಟ್ನಲ್ಲಿ ಆಡಿದ ಮೊದಲ 19 ಪಂದ್ಯಗಳ ಅಂಕಿ ಅಂಶಗಳ ಪ್ರಕಾರ ಅಬ್ದುಲ್ಲಾ ಶಫೀಕಿ ಅವರ ದಾಖಲೆ ವಿರಾಟ್‌ ಕೊಹ್ಲಿ ಅವರಿಗಿಂತಲೂ ಉತ್ತಮವಿದೆ ಎಂಬುದು ನನಗೆ ತಿಳಿದಿದೆ,” ಎಂದು ಹೊಗಳಿದ್ದಾರೆ. ನಾಯಕನ ಭರವಸೆ ಉಳಿಸಿಕೊಂಡ ಅಬ್ದುಲ್ಲಾ ಶಫೀಕಿ, ಮುಲ್ತಾನ್ ಟೆಸ್ಟ್ ಪಂದ್ಯದ ಮೊದಲ ದಿನ ಎದುರಿಸಿದ 184 ಎಸೆತಗಳಲ್ಲಿ 10 ಫೋರ್‌ ಮತ್ತು 2 ಸಿಕ್ಸರ್‌ಗಳೊಂದಿಗೆ 102 ರನ್‌ ಬಾರಿಸಿದರು.
