ವಿಶ್ವದ ಎರಡನೇ ಶ್ರೇಯಾಂಕಿತ ಆಟಗಾರ್ತಿ ಬೆಲರೂಸ್‌ನ ಐರಿನಾ ಸಬಾಲೆಂಕಾ, 2024ರ ಸಾಲಿನ ಯುಎಸ್‌ ಓಪನ್‌ ಗ್ರ್ಯಾಂಡ್‌ ಸ್ಲ್ಯಾಮ್‌ ಟೂರ್ನಿಯ ಮಹಿಳಾ ಸಿಂಗಲ್ಸ್‌ ವಿಭಾಗದಲ್ಲಿ ನೂತನ ಚಾಂಪಿಯನ್‌ ಆಗಿ ಹೊರಹೊಮ್ಮಿದ್ದಾರೆ. ಶನಿವಾರ ನಡೆದ ಮಹಿಳಾ ಸಿಂಗಲ್ಸ್‌ ವಿಭಾಗ ಫೈನಲ್‌ ಪಂದ್ಯದಲ್ಲಿ ಅಧಿಕಾರಯುತ ಆಟವಾಡಿದ ಬೆಲರೂಸ್‌ ಆಟಗಾರ್ತಿ, ಅಮೆರಿಕ ಜೆಸಿಗಾ ಪೆಗ್ಯಲಾ ಅವರನ್ನು 7-5, 7-5 ಅಂತರದ ನೇರ ಸೆಟ್‌ಗಳಿಂದ ಮಣಿಸಿದರು. ಆರ್ಥರ್‌ ಆಷ್‌ ಕ್ರೀಡಾಂಗಣದಲ್ಲಿ ಕೇವಲ 53 ನಿಮಿಷಗಳಲ್ಲಿ ಪಂದ್ಯ ಗೆದ್ದ ಸಬಾಲೆಂಕಾ ತಮ್ಮ ಮೊತ್ತ ಮೊದಲ ಅಮೆರಿಕನ್‌ ಓಪನ್‌ ಕಿರೀಟ ಮುಡಿಗೇರಿಸಿಕೊಂಡರು.
2023ರ ಸಾಲಿನ ಅಮೆರಿಕ ಓಪನ್‌ ಟೂರ್ನಿಯ ಮಹಿಳಾ ಸಿಂಗಲ್ಸ್‌ನಲ್ಲೂ ಐರಿನಾ ಸಬಾಲೆಂಕಾ ಫೈನಲ್‌ ತಲುಪಿದ್ದರು. ಆದರೆ, ಆ ಪಂದ್ಯದಲ್ಲಿ ಅಮೆರಿಕದ ಆಟಗಾರ್ತಿ ಕೊಕೊ ಗೌಫ್‌ ಎದುರು ಸೋತು ನಿರಾಶೆ ಅನುಭವಿಸಿದ್ದರು. ಆದರೆ, ಈ ಬಾರಿ ಅಂತಹ ತಪ್ಪಿಗೆ ಯಾವುದೇ ಅವಕಾಶ ನೀಡದೆ ಅಧಿಕಾರಯುತ ಜಯದೊಂದಿಗೆ ತಮ್ಮ ವೃತ್ತಿಬದುಕಿನ ಮೂರನೇ ಗ್ರ್ಯಾಂಡ್‌ ಸ್ಲ್ಯಾಮ್‌ ಟ್ರೋಫಿ ಗೆದ್ದುಕೊಂಡಿದ್ದಾರೆ. 2024 ಮತ್ತು 2024ರ ಸಾಲಿನಲ್ಲಿ ಬ್ಯಾಕ್‌ ಟು ಬ್ಯಾಕ್‌ ಆಸ್ಟ್ರೇಲಿಯನ್‌ ಓಪನ್‌ ಗೆದ್ದ ಹೆಗ್ಗಳಿಕೆ ಸಬಾಲೆಂಕಾದು ಆಗಿತ್ತು.
ಅಮೆರಿಕದ ಆಟಗಾರ್ತಿ ಜೆಸಿಕಾ 2-1 ಅಂತರದ ಆರಂಭಿಕ ಬ್ರೇಕ್‌ ಮುನ್ನಡೆ ಗಳಿಸಿದ್ದರು. ಸೆಮಿಫೈನಲ್‌ನಲ್ಲಿ ಮುಶ್ಕೊವಾ ಎದುರು ನೀಡಿದ್ದ ಭರ್ಜರಿ ಪ್ರದರ್ಶನವನ್ನು ಜೆಸಿಕಾ ಫೈನಲ್‌ನ ಆರಂಭಿಕ ಗೇಮ್‌ಗಳಲ್ಲಿ ಕಾಯ್ದುಕೊಂಡಿದ್ದರು. ಆದರೆ ಟೂರ್ನಿಯುದ್ದಕ್ಕೂ ತಮ್ಮ ಪವರ್‌ಫುಲ್‌ ಫೋರ್‌ ಹ್ಯಾಂಡ್‌ ಹೊಡೆತಗಳೊಂದಿಗೆ ಭಾರಿ ಸದ್ದು ಮಾಡಿರುವ ಸಬಾಲೆಂಕಾ ಫೈನಲ್‌ನಲ್ಲಿ ಭರ್ಜರಿ ಕಮ್‌ಬ್ಯಾಕ್‌ ಮಾಡಿದರು.
