ದಮಾಸ್ಕಸ್: ಸಿರಿಯಾ ರಾಜಧಾನಿ ದಮಾಸ್ಕಸ್‍ನ ಉಮಯ್ಯದ್ ಮಸೀದಿಯಲ್ಲಿ ಶುಕ್ರವಾರ ಕಾಲ್ತುಳಿತದಿಂದ 4 ಮಂದಿ ಸಾವನ್ನಪ್ಪಿದ್ದು 16 ಮಂದಿ ಗಾಯಗೊಂಡಿರುವುದಾಗಿ ಸರ್ಕಾರಿ ಸ್ವಾಮ್ಯದ ಸನಾ ಸುದ್ದಿಸಂಸ್ಥೆ ಶನಿವಾರ ವರದಿ ಮಾಡಿದೆ.
ಮಸೀದಿಯ ಬಳಿ ಉಚಿತ ಉಪಾಹಾರ ವಿತರಿಸುತ್ತಿದ್ದ ಸಂದರ್ಭದಲ್ಲಿ ಊಟ ಪಡೆಯಲು ಒಮ್ಮೆಲೇ ಜನರು ಮುಗಿಬಿದ್ದಿದ್ದಾರೆ. ಇದರಿಂದ ಸ್ಥಳದಲ್ಲಿ ನೂಕು ನುಗ್ಗಲು ಉಂಟಾಗಿದ್ದು ಕಾಲ್ತುಳಿತಕ್ಕೆ ಸಿಲುಕೆ ನಾಲ್ವರು ಮೃತಪಟ್ಟಿದ್ದಾರೆ.
ಆಹಾರದ ಪೊಟ್ಟಣ ಪಡೆಯುವ ಧಾವಂತದಲ್ಲಿ ಹಲವರು ಕೆಳಗೆ ಬಿದ್ದಿದ್ದು ಅವರನ್ನು ತುಳಿದುಕೊಂಡೇ ಗುಂಪು ಮುನ್ನುಗ್ಗಿದೆ. ಕನಿಷ್ಟ 4 ಮಂದಿ ಸಾವನ್ನಪ್ಪಿದ್ದು ಮಕ್ಕಳು, ಮಹಿಳೆಯರ ಸಹಿತ 16ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿರುವುದಾಗಿ ವರದಿಯಾಗಿದೆ. ದುರಂತಕ್ಕೆ ಕಾರಣ ಮತ್ತು ಹೊಣೆಗಾರರನ್ನು ಗುರುತಿಸಿ ಕಠಿಣ ಕ್ರಮ ಕೈಗೊಳ್ಳುವುದಾಗಿ ದಮಾಸ್ಕಸ್ ಗವರ್ನರ್ ಹೇಳಿದ್ದಾರೆ.
