ಕನ್ನಡದಲ್ಲಿ ಗೆಳೆಯ, ಬಿರುಗಾಳಿ, ಭಜರಂಗಿಯಂತಹ ಭರ್ಜರಿ ಹಿಟ್‌ ಕೊಟ್ಟ ನಿರ್ದೇಶಕ ಎ. ಹರ್ಷ ಇದೀಗ ಬಾಲಿವುಡ್‌ ಗೆ ಎಂಟ್ರಿ ಕೊಟ್ಟಿದ್ದಾರೆ. ಹೌದು, ಹ್ಯಾಟ್ರಿಕ್‌ ಹೀರೋ ಶಿವಣ್ಣ ಜೊತೆಗೆ ಕೆಲ ಸಿನಿಮಾಗಳ ನಿರ್ದೇಶಿದ್ದ ಎ.ಹರ್ಷ ಇದೀಗ ಬಾಲಿವುಡ್‌ ನಲ್ಲಿ ತಮ್ಮ ಅದೃಷ್ಟಪರೀಕ್ಷೆಗಿಳಿದಿದ್ದು, ಟೈಗರ್‌ ಶ್ರಾಫ್‌ ಅಭಿನಯದ ಬಾಘಿ-4 ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದು, ಈ ಚಿತ್ರದ ಪೋಸ್ಟರ್‌ ರಿಲೀಸ್ ಆಗಿದೆ.
ಬಾಲಿವುಡ್‌ ನಲ್ಲಿ ಬಾಘಿ ಸರಣಿ ಯಶಸ್ವಿಯಾಗಿದೆ. ಬಾಘಿ ಸರಣಿಯ ಮೊದಲ ಎರಡು ಚಿತ್ರಗಳು ದೊಡ್ಡಮಟ್ಟದಲ್ಲಿ ಸದ್ದು ಮಾಡಿದ್ದವು. ಆದರೆ ಉತ್ತಮ ಗಳಿಕೆಕಂಡಿದ್ದ ಬಾಘಿ ವಿಮರ್ಶೆಯಲ್ಲಿ ಸೋತಿತ್ತು. ಈಗ ಮತ್ತೆ ಸಾಜಿದ್ ನಾಡಿಯಾದ್ವಾಲಾ ಬಾಘಿ ಸರಣಿಯಲ್ಲಿ ನಾಲ್ಕನೇ ಸಿನಿಮಾ ಮಾಡುತ್ತಿದ್ದಾರೆ. ಈ ಚಿತ್ರವನ್ನು ಎ.ಹರ್ಷ ನಿರ್ದೇಶನ ಮಾಡಲಿದ್ದಾರೆ ಅನ್ನೋದು ವಿಶೇಷ.
2007ರಲ್ಲಿ ಬಿಡುಗಡೆಗೊಂಡ ‘ಗೆಳೆಯ’ ಸಿನಿಮಾ ಮೂಲಕ ನಿರ್ದೇಶನ ಆರಂಭಿಸಿದವರು ಹರ್ಷ ‘ಬಿರುಗಾಳಿ’, ‘ಚಿಂಗಾರಿ’, ‘ಭಜರಂಗಿ’, ‘ವಜ್ರಕಾಯ’, ‘ಅಂಜನೀ ಪುತ್ರ’, ‘ಭಜರಂಗಿ 2’, ‘ವೇದ’ ಸಿನಿಮಾಗಳ ನಿರ್ದೇಶಿಸಿದ್ದಾರೆ. ಇದಲ್ಲದೇ ತೆಲುಗಿನ ಭೀಮ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ. ಇದೀಗ ಬಾಲಿವುಡ್‌ ಗೆ ಪ್ರವೇಶಿಸಿದ್ದು, ಬಾಘಿ-4 ಚಿತ್ರದ ಕಥೆ ನಿರ್ಮಾಣ ಸಂಸ್ಥೆಯವರದ್ದೇ ಆಗಿದ್ದು, ಹರ್ಷ ನಿರ್ದೇಶನ ಮಾತ್ರ ಮಾಡಲಿದ್ದಾರೆ. ಸದ್ಯ ಚಿತ್ರದ ಪೋಸ್ಟರ್‌ ರಿಲೀಸ್ ಆಗಿದ್ದು, ಭಾರೀ ಸದ್ದು ಮಾಡುತ್ತಿದೆ.
