ಕ್ರಿಕೆಟ್ ಅಸೋಸಿಯೇಷನ್ ಫಾರ್ ಬ್ಲೈಂಡ್‌ ಇನ್ ಇಂಡಿಯಾ (CABI) ಆಯೋಜಿಸಿದ್ದ ಅಂಧ ಮಹಿಳೆಯರ ರಾಷ್ಟ್ರೀಯ T20 ಕ್ರಿಕೆಟ್ ಟೂರ್ನಿಯಲ್ಲಿ (National T20 Cricket Tourney) ಒಡಿಶಾ ತಂಡ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.
ಮೊದಲು ಬ್ಯಾಟ್ ಮಾಡಿದ ಕರ್ನಾಟಕ 18.3 ಓವರ್‌ಗಳಲ್ಲಿ 93 ರನ್‌ಗಳಿಗೆ ಆಲೌಟ್‌ ಆಯಿತು. ರೇಣುಕಾ ರಜಪೂತ 17, ಟಿ.ಸಿ ದೀಪಿಕಾ 16, ದೀವಕ್ಕಾ 12, ಯು. ವರ್ಷಾ 10 ರನ್ ಗಳಿಸಿದರು. ಒಡಿಶಾ ಪರ ಜಮುನಾ ರಾಣಿ ಟುಡು 19 ರನ್ ಬಿಟ್ಟುಕೊಟ್ಟು 2 ವಿಕೆಟ್ ಪಡೆದರು. ಈ ರನ್ ಗುರಿ ಬೆನ್ನತ್ತಿದ್ದ ಒಡಿಶಾ 13.1 ಓವರ್‌ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 94 ರನ್ ಗಳಿಸಿ ಜಯ ಸಾಧಿಸಿತು. ಒಡಿಶಾ ಪರ ಬಸಂತಿ ಹಂಸಾ ಅಜೇಯ 34, ಜಮುನಾ ರಾಣಿ 24 ಹಾಗೂ ಪದ್ಮನಿ ಟುಡು ಅಜೇಯ 14 ರನ್ ಬಾರಿಸಿದರು.
ಒಡಿಶಾ ತಂಡದ ಜಿಲಿ ಬಿರುವಾ ಫೈನಲ್ ಪಂದ್ಯದ ಆಟಗಾರ್ತಿ, ಬಿ-1 ವಿಭಾಗದಲ್ಲಿ ರಾಜಸ್ಥಾನದ ಸಿಮು ದಾಸ್, ಬಿ-2 ವಿಭಾಗದಲ್ಲಿ ದೆಹಲಿಯ ಮೆಂಕಾ ಕುಮಾರಿ ಹಾಗೂ ಬಿ-3 ವಿಭಾಗದಲ್ಲಿ ಜಿಲಿ ಬಿರುವಾ ಸರಣಿಶ್ರೇಷ್ಠ ಪ್ರಶಸ್ತಿ ಪಡೆದರು. ಟೂರ್ನಿಯಲ್ಲಿ 16 ತಂಡಗಳು ಪಾಲ್ಗೊಂಡಿದ್ದವು.
