ಲೈಂಗಿಕ ಕ್ರಿಯೆ ಎನ್ನುವುದು ಕೇವಲ ದೇಹಗಳ ಮಿಲನವಲ್ಲ, ಅದು ಸಂಪೂರ್ಣ ಮನಸ್ಸು ಹಾಗೂ ದೇಹಗಳೆರಡರ ಮಿಲನ. ದಾಂಪತ್ಯದಲ್ಲಿ ಸಂಗಾತಿಗಳಿಗೆ ಅತ್ಯಂತ ಖುಷಿ ನೀಡುವಂತಹ ವಿಚಾರ ಕೂಡ. ಮಹಿಳೆಯರಲ್ಲಿ ಲೈಂಗಿಕಾಸಕ್ತಿಯು ಕುಂದಿದರೆ ಅದರ ಪರಿಣಾಮ ನೇರವಾಗಿ ಸಂಬಂಧದ ಮೇಲೆ ಬೀಳುವುದು. ಇದು ಜಗಳಕ್ಕೆ ಕಾರಣವಾಗಬಹುದು ಅಥವಾ ಸಂಶಯವನ್ನು ಮೂಡಿಸಬಹುದು. ಹೀಗಾಗಿ ಇಂತಹ ಸಮಸ್ಯೆಯು ಕಾಡುತ್ತಲಿದ್ದರೆ ಆಗ ಖಂಡಿತವಾಗಿಯೂ ಅದಕ್ಕೆ ಸರಿಯಾದ ಪರೀಕ್ಷೆ ಮಾಡಿಸಿಕೊಂಡು ಚಿಕಿತ್ಸೆ ಪಡೆಯಿರಿ. ಕಾಮಾಸಕ್ತಿ ಕುಂದಿಸಲು ಕೆಲವು ಕಾರಣಗಳು
ಹಾರ್ಮೋನ್
ಮಹಿಳೆಯರ ದೇಹದಲ್ಲಿ ಹಾರ್ಮೋನ್ ಗಳ ಗುಡಾಣವೇ ಇದೆ. ಇದು ಆಗಾಗ ಏರು ಪೇರಾಗುತ್ತದೆ. ಕೆಲವೊಮ್ಮೆ ಹಾರ್ಮೋನ್ ಗಳಲ್ಲಿ ಅಸಮತೋಲನದಿಂದಲೂ ಕಾಮಾಸಕ್ತಿಯು ಕುಂದಬಹುದು. ಪ್ರೌಢಾವಸ್ಥೆ ಮತ್ತು ಋತುಬಂಧದ ವೇಳೆ ಹಾರ್ಮೋನ್ ಗಣನೀಯ ಪ್ರಮಾಣದಲ್ಲಿ ಅಸಮತೋಲನ ಉಂಟು ಮಾಡುವುದು. ಮಹಿಳೆಯರಿಗೆ ಹಲವಾರು ಹಂತದಲ್ಲಿ ಹಾರ್ಮೋನ್ ಗಳ ಅಸಮತೋಲನವು ಕಂಡುಬರುವುದು.ಟೆಸ್ಟೋಸ್ಟೆರಾನ್ ಎನ್ನುವುದು ಪುರುಷ ಕಾಮಾಸಕ್ತಿಯ ಹಾರ್ಮೋನ್ ಆಗಿದ್ದು, ಇದು ಕೂಡ ಮಹಿಳೆಯರಲ್ಲಿ ಇರುವುದು. ಇದರಲ್ಲಿ ಏರುಪೇರು ಆದರೆ ಕೂಡ ಮಹಿಳೆಯರಿಗೆ ಕಾಮಾಸಕ್ತಿಯು ಕುಂದುವುದು.
ಅನಾರೋಗ್ಯ
ಕೆಲವೊಂದು ಅನಾರೋಗ್ಯದಿಂದಲೂ ಕಾಮಾಸಕ್ತಿಯು ಕುಂದುವುದು. ಮುಖ್ಯವಾಗಿ ಅಧಿಕ ರಕ್ತದೊತ್ತಡ, ಬೊಜ್ಜು, ಕ್ಯಾನ್ಸರ್ ಮತ್ತು ಅಪಧಮನಿ ಹಾಗೂ ನರದ ಕಾಯಿಲೆಗಳು ಕಾಮಾಸಕ್ತಿ ಕುಂದಿಸಲು ಕಾರಣ. ಜಡ ಜೀವನಶೈಲಿಯು ಆರೋಗ್ಯದ ಮೇಲೆ ಪರಿಣಾಮ ಬೀರುವುದು ಮತ್ತು ಇದು ಕಾಮಾಸಕ್ತಿ ಕುಗ್ಗಿಸುವುದು.
ಔಷಧಿಗಳು
ಔಷಧಿಗಳಲ್ಲಿನ ಅಡ್ಡಪರಿಣಾಮಗಳು ಕೂಡ ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುವುದು. ಕೆಲವು ಖಿನ್ನತೆ ವಿರೋಧಿ, ಆತಂಕ ವಿರೋಧಿ ಔಷಧಿಗಳು ಕಾಮಾಸಕ್ತಿ ಮೇಲೆ ಪರಿಣಾಮ ಬೀರಬಹುದು. ಗರ್ಭನಿರೋಧಕ ಮಾತ್ರೆಗಳು ಕೂಡ ದೇಹದಲ್ಲಿ ಹಾರ್ಮೋನ್ ಗಳ ಏರುಪೇರಿಗೆ ಕಾರಣವಾಗುವುದು ಹಾಗೂ ಕಾಮಾಸಕ್ತಿ ಕುಂದಿಸುವುದು. ಯಾವುದೇ ಔಷಧಿ ಸೇವನೆ ಮಾಡುತ್ತಲಿದ್ದರೆ ಮತ್ತು ಕಾಮಾಸಕ್ತಿಯು ಕಡಿಮೆ ಆಗಿದ್ದರೆ ಆಗ ನೀವು ವೈದ್ಯರ ಸಲಹೆ ಪಡೆಯಿರಿ.
ಮನೋರೋಗ
ದೈಹಿಕ ಕಾಯಿಲೆಗಳಲ್ಲದೆ, ಕೆಲವು ಮನೋರೋಗಗಳು ಕೂಡ ಕಾಮಾಸಕ್ತಿ ಕುಂದಿಸುವುದು. ಖಿನ್ನತೆಯು ಕಾಮಾಸಕ್ತಿಯನ್ನು ಕುಂದಿಸಲು ಹಾಗೂ ಲೈಂಗಿಕ ಕ್ರಿಯೆಯಲ್ಲಿನ ತೃಪ್ತಿ ಕಡಿಮೆ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸುವುದು.ಮಾದಕ ದ್ರವ್ಯಗಳು, ಆಲ್ಕೋಹಾಲ್ ಒಮ್ಮೆ ಮನಸ್ಥಿತಿ ಸುಧಾರಣೆ ಮಾಡಿದರೂ ಇದು ಕಾಮಾಸಕ್ತಿ ಕುಂದಿಸುವುದು. ಆತಂಕ ಮತ್ತು ಒತ್ತಡವು ಮಹಿಳೆಯರಲ್ಲಿ ಕಾಮಾಸಕ್ತಿ ಕಡಿಮೆ ಮಾಡುವುದು. ಕೆಲವೊಂದು ಧಾರ್ಮಿಕ ಹಾಗೂ ವೈಯಕ್ತಿಕ ನಂಬಿಕೆಗಳೂ ಕೂಡ ಲೈಂಗಿಕ ಕ್ರಿಯೆ ಮೇಲೆ ಪರಿಣಾಮ ಬೀರಬಹುದು.
ಜೀವನ ಒತ್ತಡ
ಜೀವನದಲ್ಲಿ ಹಲವಾರು ಬಗೆಯ ಒತ್ತಡಗಳು ಇರುವ ಕಾರಣದಿಂದಾಗಿ ಲೈಂಗಿಕ ಕ್ರಿಯೆಯು ಕೊನೆಯಲ್ಲಿರುವುದು. ಬಳಲಿಕೆ ಮತ್ತು ಅತಿಯಾದ ಜವಾಬ್ದಾರಿಗಳಿಂದಾಗಿ ಮಹಿಳೆಯರಲ್ಲಿ ಲೈಂಗಿಕ ಕ್ರಿಯೆ ಬಗ್ಗೆ ಆಸಕ್ತಿಯು ಉಳಿಯದು.ಮಹಿಳೆಯರು ಬೇರೆಯವರ ಬಗ್ಗೆ ಕಾಳಜಿ ವಹಿಸುತ್ತಿದ್ದರೆ, ಆಗ ಅವರು ತಮ್ಮ ಅಗತ್ಯಕ್ಕಿಂತಲೂ ಬೇರೆಯವರನ್ನು ಮೊದಲು ಪರಿಗಣಿಸುವರು.ಸಂಗಾತಿ ಜತೆಗಿನ ಸಂಬಂಧವು ಸರಿಯಾಗಿಲ್ಲದೆ ಇದ್ದರೆ ಅಥವಾ ಸಂಬಂಧದಲ್ಲಿ ಸಮಸ್ಯೆಗಳಿದ್ದರೂ ಇದು ಕಾಮಾಸಕ್ತಿ ಮೇಲೆ ಪರಿಣಾಮ ಬೀರಬಹುದು.
ಕಾಮಾಸಕ್ತಿ ಕುಂದುವ ನಕಾರಾತ್ಮಕ ಪರಿಣಾಮಗಳು
ಕಾಮಾಸಕ್ತಿಯು ಕುಂದಿದರೆ ಅದು ಕೇವಲ ಮಲಗುವ ಕೋಣೆ ತನಕ ಮಾತ್ರ ಸೀಮಿತವಾಗಿ ಇರಲ್ಲ.ಕೆಲವರ ಪ್ರಕಾರ ಇದು ದೈಹಿಕ ಹಾಗೂ ಭಾವನಾತ್ಮಕವಾಗಿ ಸಂಗಾತಿಗಳನ್ನು ದೂರ ಮಾಡಬಹುದು. ನಿರಂತರವಾಗಿ ಲೈಂಗಿಕ ಚಟುವಟಿಕೆಯಲ್ಲಿ ತೊಡಗದೆ ಇರುವ ಕಾರಣದಿಂದಾಗಿ ಸಂಗಾತಿಗಳಿಬ್ಬರಲ್ಲೂ ಕೆಟ್ಟ ಪರಿಣಾಮ ಬೀರುವುದು.
ತಪ್ಪಿತಸ್ಥ ಭಾವನೆ
ಲೈಂಗಿಕವಾಗಿ ಸಂಗಾತಿಗೆ ಲಭ್ಯವಾಗದೆ ಇರುವ ಪರಿಣಾಮವಾಗಿ ಮಹಿಳೆಯರಲ್ಲಿ ತಪ್ಪಿತಸ್ಥ ಭಾವನೆಯು ಮೂಡಬಹುದು. ಲೈಂಗಿಕ ಕ್ರಿಯೆಯಲ್ಲಿ ಆಸಕ್ತಿ ಇದೆ ಎಂದು ತೋರಿಸುವಂತಹ ಸ್ಪರ್ಶದಿಂದಲೂ ಅವರು ದೂರವಿರುವರು.
ಪುರುಷರಿಗೆ ಕಡೆಗಣಿಸಲ್ಪಟ್ಟ ಭಾವನೆ
ಲೈಂಗಿಕವಾಗಿ ಯಾವುದೇ ಸಂಪರ್ಕವು ಆಗದೆ ಇರುವಾಗ ಪುರುಷರಿಗೆ ತಮ್ಮನ್ನು ಕಡೆಗಣಿಸಲ್ಪಟ್ಟ ಹಾಗೂ ಪ್ರೀತಿಸದೆ ಇರುವ ಭಾವನೆಯು ಮೂಡಬಹುದು.ಮಹಿಳೆಯರಲ್ಲಿ ಕಾಮಾಸಕ್ತಿಯು ಕಡಿಮೆ ಇರುವ ಸಂದರ್ಭವು ದೀರ್ಘಕಾಲ ನಡೆದರೆ ಆಗ ಅದು ತುಂಬಾ ನೋವು ಹಾಗೂ ಕಠಿಣ ದಿನಗಳನ್ನು ಕಳೆಯುವಂತೆ ಮಾಡುವುದು.
ನೆರವು ಲಭ್ಯ
ಯಾವುದೇ ವಯಸ್ಸಿನ ಮಹಿಳೆಯಲ್ಲೂ ಕಾಮಾಸಕ್ತಿಯು ಕುಂದಿದರೆ ಅದು ಸಂಬಂಧದಲ್ಲಿ ಒತ್ತಡವನ್ನು ಉಂಟು ಮಾಡುವುದು. ಇದಕ್ಕೆ ಮಹಿಳೆಯು ನೆರವು ಪಡೆಯಬೇಕು. ಯಾರ ನೆರವು ಪಡೆಯಬೇಕು ಎನ್ನುವ ಪ್ರಶ್ನೆಯು ಕಾಡುವುದು. ಆದರೆ ನೀವು ಇದೆಲ್ಲವೂ ಸರಿ ಆಗುವುದು ಎನ್ನುವ ಆತ್ಮವಿಶ್ವಾಸವನ್ನು ಇಟ್ಟುಕೊಳ್ಳಬೇಕು.
ಲೈಂಗಿಕ ವಿಚಾರಗಳ ಬಗ್ಗೆ ಮಾತನಾಡಲು ಇರುವಂತಹ ಭೀತಿ ಹಾಗೂ ಒತ್ತಡದಿಂದಾಗಿ ಕೆಲವರು ಇಂತಹ ಸಮಸ್ಯೆಗಳನ್ನು ಹೇಳಲು ಹೋಗುವುದೇ ಇಲ್ಲ.ಆದರೆ ನೀವು ವಿಶೇಷ ತಜ್ಞರನ್ನು ಭೇಟಿ ಮಾಡಿ ಅವರಿಂದ ಸಲಹೆ ಪಡೆಯಬಹುದು. ಲೈಂಗಿಕ ತಜ್ಞರು ಇದಕ್ಕೆ ಸರಿಯಾದ ಚಿಕಿತ್ಸೆ ನೀಡುವರು. ನಿಮ್ಮಲ್ಲಿರುವಂತಹ ದೈಹಿಕ ಹಾಗೂ ಮಾನಸಿಕ ಸಮಸ್ಯೆಗಳನ್ನು ದೂರ ಮಾಡಲು ಅವರಿಗೆ ಸಾಧ್ಯವಾಗಲಿದೆ.