ಎಷ್ಟು ಬೇಕು ಸಾಲ ಹೇಳಿ. ಹೀಗೆಲ್ಲ ಆಫರ್ ನೀಡಿ ಆನ್ಲೈನ್ ಮೂಲಕವೇ ಕೇವಲ ಸೆಕೆಂಡ್ಗಳ ಒಳಗಾಗಿ ಸಾಲ ನೀಡುವ ಅಪ್ಲಿಕೇಶನ್ಗಳನ್ನು ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಸಾವಿರಾರು ಸಿಗುತ್ತವೆ. ಹಾಗಂತ ಇವು ಬಡ್ಡಿ ರಹಿತವಾಗೇನೂ ಸಾಲ ಕೊಡುತ್ತಿಲ್ಲ. ಹಾಗೆಯೇ ಹಲವು ಆಯಾಮಗಳಲ್ಲಿ ವಂಚನೆ ಮಾಡುವ ಸಾಕಷ್ಟು ಅಪ್ಲಿಕೇಶನ್ಗಳು ಇಲ್ಲಿವೆ.
ಅಪ್ಲಿಕೇಶನ್ ಡೌನ್ಲೋಡ್ ಮಾಡಿ ಲೋನ್ ಕೊಟ್ಟ ಕ್ಷಣದಲ್ಲೇ ಶೇಕಡ.50 ರಷ್ಟು ಬಡ್ಡಿ ಹಾಕುವ, ಸಾಲ ಮರುಪಾವತಿ ನಂತರವೂ ಹಿಂದೆಬಿದ್ದು ಟಾರ್ಚರ್ ಕೊಡುವ, ಎಷ್ಟೇ ಜಾಗ್ರತೆ ವಹಿಸಿದರೂ ಬಳಕೆದಾರರಿಗೆ ಯಾವುದಾದರೊಂದು ರೀತಿಯ ಮೋಸದ ಜಾಲವನ್ನು ಹೆಣೆಯುವ ಸಾಲದ Apps ಗಳು ಹೆಚ್ಚಾಗಿಬಿಟ್ಟಿವೆ.
ವರದಿಗಳ ಪ್ರಕಾರ ಸುಮಾರು 4000 ಕ್ಕೂ ಅಧಿಕ ಸಾಲದ ಅಪ್ಲಿಕೇಶನ್ಗಳು ಗೂಗಲ್ ಪ್ಲೇ ಸ್ಟೋರ್ನಲ್ಲಿದ್ದು, ಅವುಗಳ ಪೈಕಿ ಹಲವು ವಂಚನೆ, ನಕಲು, ಇತರೆ ಸಮಸ್ಯೆಗಳನ್ನು ಆಪ್ ಬಳಕೆದಾರರಿಗೆ ತಂದೊಡ್ಡುವ ಹಿನ್ನೆಲೆಯಲ್ಲಿ ಗೂಗಲ್ ಇತ್ತೀಚೆಗೆ 2500 ಅಪ್ಲಿಕೇಶನ್ಗಳನ್ನು ಪ್ಲೇಸ್ಟೋರ್ನಿಂದ ಶಾಶ್ವತವಾಗಿ ತೆಗೆದುಹಾಕಿದೆ.
ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಸಾಲ ಕೊಡುವ ನಕಲಿ ಅಪ್ಲಿಕೇಶನ್ಗಳನ್ನು ಪತ್ತೆ ಹಚ್ಚುವ ವಿಧಾನಗಳು
1. ಒಂದೇ ಹೆಸರಿನ ಹಲವು ಆ್ಯಪ್ ಗಳಿವೆಯೇ ನೋಡಿ. ಅದರಲ್ಲಿ ಹೆಚ್ಚು ರೇಟಿಂಗ್ ನೀಡಲಾದ ಆ್ಯಪ್ ಆಯ್ಕೆ ಮಾಡಿ. ನಂತರ ಆ ಆ್ಯಪ್ ಕುರಿತು ಹೆಚ್ಚು ಕಮೆಂಟ್ಗಳು / ರಿವೀವ್ಗಳನ್ನು ಓದಿಕೊಳ್ಳುವುದು.
2. ಸಾಲ ಕೊಡುವ ಸಂಸ್ಥೆ / ಆ್ಯಪ್ RBI ಅಡಿಯಲ್ಲಿ ನಿಯಮಗಳ ಪ್ರಕಾರ ನೋಂದಣಿ ಮಾಡಿದೆಯೇ ಎಂದು ಚೆಕ್ ಮಾಡಿಕೊಳ್ಳುವುದು.
3. ಅಪ್ಲಿಕೇಶನ್ ಡೌನ್ಲೋಡ್ ಆದ ನಂತರ ಇನ್ಸ್ಟಾಲ್ ಮಾಡುವಾಗ ನಿಮ್ಮ ಮೊಬೈಲ್ ನ ಗ್ಯಾಲರಿ, ಕಾಂಟ್ಯಾಕ್ಟ್ಗಳು, ಸಾಮಾಜಿಕ ಜಾಲತಾಣಗಳು, ನಿಮ್ಮ ಮೊಬೈಲ್ನಲ್ಲಿರುವ ಪೇಮೆಂಟ್ಸ್ ಅಪ್ಲಿಕೇಶನ್ಗಳ ಸಂಪರ್ಕಕ್ಕೆ ಅನುಮತಿ (Access) ಕೇಳಿದರೆ ಕೊಡಬಾರದು.
4. ಲೋನ್ ಅಪ್ಲಿಕೇಶನ್ ಇನ್ಸ್ಟಾಲ್ ಆದ ನಂತರ ಪದೇ ಪದೇ ಬರುವ ಒಟಿಪಿಗಳು, ಆಫರ್ಗಳ ಲಿಂಕ್ಗಳನ್ನು ಕ್ಲಿಕ್ ಮಾಡಬಾರದು.
5. ಸಾಲ ನೀಡುವ ಆ್ಯಪ್ ಹೆಸರಿನಲ್ಲಿ ವೆಬ್ಸೈಟ್ ಚೆಕ್ ಮಾಡಿ. ಆ ವೆಬ್ಸೈಟ್ ಸೆಕ್ಯೂರ್ ಆಗಿದೆಯೇ ಎಂದು ಚೆಕ್ ಮಾಡಿ.
6. ಆರ್ಬಿಐ ನಿಯಮದ ಪ್ರಕಾರ ಪ್ರತಿ ಲೋನ್ ಅಪ್ಲಿಕೇಶನ್ Sanction Letter ನೀಡಬೇಕು. ಇದರಲ್ಲಿ ಲೋನ್ ಡೀಟೇಲ್ಸ್ ಎಲ್ಲವೂ ಇರುತ್ತದೆ. ಇದನ್ನು ನೀಡದ ಅಪ್ಲಿಕೇಶನ್ಗಳು ಫೇಕ್. ಹಾಗೂ ವಂಚನೆ ಮಾಡುವ ಆ್ಯಪ್ ಗಳು ಎಂದೇ ಪರಿಗಣಿಸಬೇಕು.
7. ಪ್ರತಿ ಸಾಲ ನೀಡುವವರು ಸಹ ಲೋನ್ ನೀಡುವ ಮೊದಲು ನಿಮ್ಮ ಕ್ರೆಡಿಟ್ ಇತಿಹಾಸ /ಬ್ಯಾಂಕ್ ಹಣಕಾಸು ವ್ಯವಹಾರದ ಇತಿಹಾಸ ನೋಡಲು ಬಯಸುತ್ತವೆ. ಇದನ್ನು ಕೇಳುತ್ತಿಲ್ಲ ಎಂದಲ್ಲಿ ಮುಂದೆ ನಿಮಗೆ ವಂಚನೆ ಕಾದಿದೆ ಎಂದರ್ಥ.
8. ಮೆಂಬರ್ ಶಿಪ್ ಪಡೆಯುವುದು ಒಂದು ಅಪ್ಲಿಕೇಶನ್ನಲ್ಲಿ (ರೂ.100-400 ವರೆಗೆ ಶುಲ್ಕದೊಂದಿಗೆ), ಲೋನ್ ನೀಡುವುದು ಒಂದು ಅಪ್ಲಿಕೇಶನ್ನಲ್ಲಿ. ಇಂತಹ ಸಂದರ್ಭದಲ್ಲಿಯೂ ಹೆಚ್ಚು ಜಾಗರೂಕತೆ ವಹಿಸಬೇಕು.
ಲೋನ್ ಆ್ಯಪ್ಗಳು ಯಾವೆಲ್ಲ ರೀತಿ ಟಾರ್ಚರ್ ನೀಡುತ್ತಿವೆ?
- ಲೋನ್ ಆ್ಯಪ್ ಇನ್ಸ್ಟಾಲ್ ಮಾಡಿ ಲೋನ್ ತೆಗೆದುಕೊಂಡವರ ಮೊಬೈಲ್ನಲ್ಲಿ ಎಲ್ಲ ರೀತಿಯ ಅನುಮತಿಗಳನ್ನು ಸ್ವಯಂಕೃತವಾಗಿ ತೆಗೆದುಕೊಳ್ಳುವ ಅವಕಾಶ ಸೃಷ್ಟಿಸಿಕೊಳ್ಳುತ್ತವೆ.
- EMI ಪಾವತಿ ವಿಳಂಬವಾದಲ್ಲಿ, ಕೆಲವು ಆ್ಯಪ್ಗಳು ಇಎಂಐ ಪಾವತಿ ನಂತರವೂ ಕಿರುಕುಳ ನೀಡುತ್ತವೆ. ಎಸ್ಎಂಎಸ್ ಮೂಲಕ, ಕರೆ ಮೂಲಕ ಸಮಸ್ಯೆ ನೀಡುತ್ತವೆ.
- ಆ್ಯಪ್’ಗಳು ನಿಮ್ಮ ಫೋನ್ನಲ್ಲಿರುವ ಕಾಂಟ್ಯಾಕ್ಟ್ಗಳ ಲಿಸ್ಟ್ ಉಪಯೋಗಿಸಿ ವಾಟ್ಸಾಪ್ ಗ್ರೂಪ್ ಸೃಷ್ಟಿಸಿ, ಅಥವಾ ಸಾಮಾಜಿಕ ಜಾಲತಾಣಗಳ ನಿಮ್ಮ ಸ್ನೇಹಿತರ ಗ್ರೂಪ್ ಸೃಷ್ಟಿಸಿ ಅಶ್ಲೀಲ ಫೋಟೋಗಳನ್ನು ಹಂಚುವ ಕೆಲಸ ಮಾಡಿ ಟಾರ್ಚರ್ ನೀಡುತ್ತವೆ.
- ಈಗ AI ಬಳಕೆ ಮಾಡಿ ಇನ್ನು ಹಲವು ವಿಧದ ಮೂಲಕ ಸಮಸ್ಯೆಯೊಡ್ಡುವ ಕೆಲಸಗಳನ್ನು ಈ ಸಾಲದ ಆ್ಯಪ್ ಗಳು ಮಾಡುತ್ತಿವೆ.