ತಿಂಗಳ ಕ್ಯಾಲೆಂಡರ್ ಬದಲಾದಂತೆ ಅನೇಕ ನಿಯಮಗಳು ಬದಲಾಗುತ್ತವೆ. ಅದರಲ್ಲಿಯೂ ಅನೇಕ ಸರಕುಗಳ ದರ ಹೆಚ್ಚಳ, ಇಳಿಕೆಗಳು ಹೊಸ ತಿಂಗಳ ಮೊದಲ ದಿನದಿಂದ ಜಾರಿಗೆ ಬರುತ್ತವೆ. ಇದರಿಂದ ದೈನಂದಿನ ಜೀವನದ ಮೇಲೆ ಪರಿಣಾಮ ಉಂಟಾಗುತ್ತದೆ. ಪ್ರತಿ ತಿಂಗಳೂ ಸಾಮಾನ್ಯವಾಗಿ ನಡೆಯುವುದು ಎಲ್‌ಪಿಜಿ ದರದಲ್ಲಿನ ಬದಲಾವಣೆ. ಜತೆಗೆ ಜನರಿಗೆ ಸಮಸ್ಯೆಯಾಗಿ ಪರಿಣಮಿಸುವುದು ಬ್ಯಾಂಕ್ ರಜಾ ದಿನಗಳು. ಜೂನ್ 1ರಿಂದ ಇನ್ನೂ ಕೆಲವು ಹೊಸ ನಿಯಮಗಳು ಜಾರಿಗೆ ಬರಲಿವೆ. ಅವುಗಳ ವಿವರ ಇಲ್ಲಿದೆ.
ಹೊಸ ಚಾಲನಾ ಪರವಾನಗಿ ನಿಯಮ
ಭಾರತದಲ್ಲಿ ಡ್ರೈವಿಂಗ್ ಲೈಸೆನ್ಸ್ ಪಡೆಯುವ ಹೊಸ ನಿಯಮಾವಳಿಗಳನ್ನು ರಾಜ್ಯ ರಸ್ತೆ ಮತ್ತು ಹೆದ್ದಾರಿ ಸಚಿವಾಲಯವು ಇತ್ತೀಚೆಗೆ ಘೋಷಣೆ ಮಾಡಿತ್ತು. ಇವು ಜೂನ್ 1ರಿಂದ ಜಾರಿಗೆ ಬರಲಿವೆ. ಇದರ ಅನ್ವಯ ಸರ್ಕಾರಿ ಆರ್‌ಟಿಒಗಳ ಬದಲು ಜನರು ಖಾಸಗಿ ಚಾಲನಾ ತರಬೇತಿ ಕೇಂದ್ರಗಳಲ್ಲಿ ಚಾಲನಾ ಪರೀಕ್ಷೆ ನಡೆಸಲು ಅವಕಾಶ ಸಿಗಲಿದೆ. ಆರ್‌ಟಿಒದಿಂದ ಅಧಿಕಾರ ಪಡೆದ ಕೇಂದ್ರಗಳು ಮಾತ್ರ ಡ್ರೈವಿಂಗ್ ಟೆಸ್ಟ್‌ಗಳನ್ನು ನಡೆಸಲು ಮತ್ತು ಚಾಲನಾ ಅರ್ಹತೆಯ ಪ್ರಮಾಣ ಪತ್ರ ನೀಡಬಹುದಾಗಿದೆ.
ಹೊಸ ನಿಯಮವು ಅಂದಾಜು 9 ಲಕ್ಷ ಹಳೆ ಸರ್ಕಾರಿ ವಾಹನಗಳನ್ನು ರದ್ದುಗೊಳಿಸಲಿದೆ. ಜತೆಗೆ ಇನ್ನಷ್ಟು ಕಠಿಣ ಕಾರು ಎಮಿಷನ್ ನಿಯಮಾವಳಿಗಳನ್ನು ಹೇರಲಿದೆ. ಅತಿ ವೇಗದ ವಾಹನ ಚಾಲನೆಗೆ ಇರುವ ದಂಡವು 1,000- 2000 ರೂ ಇರಲಿದೆ. ಇದರಲ್ಲಿ ಬದಲಾವಣೆ ಇಲ್ಲ. ಆದರೆ ಅಪ್ರಾಪ್ತ ವಯಸ್ಕರು ವಾಹನ ಚಲಾಯಿಸುವಾಗ ಸಿಕ್ಕಿಬಿದ್ದರೆ 25 ಸಾವಿರ ರೂದಷ್ಟು ದೊಡ್ಡ ಮೊತ್ತದ ಹಣ ತೆರಬೇಕಾಗುತ್ತದೆ. ಅಲ್ಲದೆ, ವಾಹನ ಮಾಲೀಕನ ನೋಂದಣಿ ಕಾರ್ಡ್ ಅನ್ನು ರದ್ದುಗೊಳಿಸಲಾಗುತ್ತದೆ. ಹಾಗೆಯೇ ಅಪ್ರಾಪ್ತ ವಯಸ್ಕ 25 ವರ್ಷ ತುಂಬುವವರೆಗೂ ಚಾಲನಾ ಪರವಾನಗಿ ಪಡೆಯಲು ಅನರ್ಹನಾಗುತ್ತಾನೆ.
ಆಧಾರ್ ಕಾರ್ಡ್ ಅಪ್ಡೇಟ್
ಆಧಾರ್ ಕಾರ್ಡ್‌ನಲ್ಲಿನ ವಿವರಗಳನ್ನು ಪರಿಷ್ಕರಿಸಲು ಇರುವ ಗಡುವು ಜೂನ್ ತಿಂಗಳಲ್ಲಿ ಅಂತ್ಯಗೊಳ್ಳಲಿದೆ. ನೀವು ಆಧಾರ್ ಕಾರ್ಡ್ ಅಪ್ಡೇಟ್ ಮಾಡಲು ಬಯಸಿದ್ದರೆ ಜೂನ್ 14ರವರೆಗೂ ಸಮಯವಿದೆ. ಬಳಕೆದಾರರು ಆನ್‌ಲೈನ್‌ನಲ್ಲಿಯೇ ತಮ್ಮ ಆಧಾರ್ ಕಾರ್ಡ್‌ನಲ್ಲಿರುವ ವಿವರಗಳನ್ನು ಸುಲಭವಾಗಿ ಬದಲಿಸಿಕೊಳ್ಳಬಹುದು. ಆದರೆ ಆನ್‌ಲೈನ್‌ನಲ್ಲಿ ಅಲ್ಲದೆ, ಆಫ್‌ಲೈನ್‌ನಲ್ಲಿ ವಿವರ ಪರಿಷ್ಕರಿಸಲು ಹೋದರೆ, ಪ್ರತಿ ಅಪ್‌ಡೇಟ್‌ಗೂ 50 ರೂ ಪಾವತಿಸಬೇಕಾಗುತ್ತದೆ.
ಎಲ್‌ಪಿಜಿ ಸಿಲಿಂಡರ್ ದರ
ಪ್ರತಿ ತಿಂಗಳ ಮೊದಲ ದಿನದಂದು ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯಲ್ಲಿ ಬದಲಾವಣೆ ನಡೆಯುತ್ತದೆ. ಹಾಗೆಯೇ ಜೂನ್ 1ರಂದು ತೈಲ ಕಂಪೆನಿಗಳು ಗ್ಯಾಸ್ ಸಿಲಿಂಡರ್‌ಗಳಿಗೆ ಹೊಸ ದರ ನಿಗದಿಪಡಿಸಲಿವೆ. ಇದರಿಂದ ಗೃಹ ಬಳಕೆಯ ಅಥವಾ ವಾಣಿಜ್ಯ ಬಳಕೆಯ ಅಡುಗೆ ಸಿಲಿಂಡರ್‌ಗಳ ಬೆಲೆ ಏರಿಕೆ ಅಥವಾ ಇಳಿಕೆಯಾಗಬಹುದು. ಎರಡೂ ಸಿಲಿಂಡರ್‌ಗಳ ದರದಲ್ಲಿಯೂ ಬದಲಾವಣೆಯಾಗಬಹುದು. ಮೇ ತಿಂಗಳಲ್ಲಿ ತೈಲ ಕಂಪೆನಿಗಳು ವಾಣಿಜ್ಯ ಸಿಲಿಂಡರ್‌ಗಳ ದರದಲ್ಲಿ ಬದಲಾವಣೆ ಮಾಡಿದ್ದವು. ಜೂನ್ ತಿಂಗಳಲ್ಲಿ ಈ ದರ ಮತ್ತಷ್ಟು ಇಳಿಕೆಯಾಗಬಹುದು ಎಂದು ನಿರೀಕ್ಷಿಸಲಾಗಿದೆ. ಜತೆಗೆ ಪೆಟ್ರೋಲ್ ಮತ್ತು ಡೀಸಲ್ ದರದಲ್ಲಿ ಎಂದಿನಂತೆ ದೈನಂದಿನ ಬದಲಾವಣೆ ನಡೆಯುತ್ತದೆ.
ಬ್ಯಾಂಕ್ ರಜಾದಿನಗಳು
ಭಾರತೀಯ ರಿಸರ್ವ್ ಬ್ಯಾಂಕ್ ಬಿಡುಗಡೆ ಮಾಡಿರುವ ರಜಾ ದಿನಗಳ ಪಟ್ಟಿ ಪ್ರಕಾರ, ಜೂನ್ ತಿಂಗಳಲ್ಲಿ ಒಟ್ಟು 10 ದಿನ ಬ್ಯಾಂಕ್‌ಗಳು ತೆರೆಯುವುದಿಲ್ಲ. ಇದರಲ್ಲಿ ಭಾನುವಾರ ಹಾಗೂ ಎರಡು ಮತ್ತು ನಾಲ್ಕನೇ ಶನಿವಾರ ಕೂಡ ಸೇರಿದೆ. ಜೂನ್ 15ರ ರಾಜಾ ಸಂಕ್ರಾಂತಿಯಂದು ದೇಶದ ಕೆಲವು ಭಾಗಗಳಲ್ಲಿ ರಜೆ ಇರಲಿದೆ. ಆದರೆ ಅದು ಕರ್ನಾಟಕಕ್ಕೆ ಅನ್ವಯವಾಗುವುದಲ್ಲ. ಜೂನ್ 17ರಂದು ಬಕ್ರೀದ್ ರಜೆ ಪ್ರಯುಕ್ತ ಬ್ಯಾಂಕ್‌ಗಳು ಕಾರ್ಯ ನಿರ್ವಹಿಸುವುದಿಲ್ಲ.
