ಬೆಳೆ, ಬೆಲೆ ಉತ್ತಮವಾಗಿದ್ದರೆ ಲಾಟ್ರಿಹೊಡೆದಂತೆ. ಇಲ್ಲದಿದ್ದರೆ ಬೆಳೆಗಾರನ ಬದುಕು ಬೀದಿಗೆ ಬಿದ್ದಂತೆ. ಈ ವರ್ಷದ ಮಟ್ಟಿಗೆ ಕಡಿಮೆ ಮಳೆ ಕಾರಣಕ್ಕೆ ರೋಗ ರಹಿತವಾಗಿ ತಕ್ಕಷ್ಟು ಬೆಳೆ ಬಂದಿದೆ. ಹಲವು ವರ್ಷಗಳ ಬಳಿಕ ಉತ್ತಮ ಬೆಲೆಯೂ ಲಭಿಸಿದೆ.
ಈ ರೀತಿ ಬಂಪರ್‌ ಲಾಟರಿ ಅದೃಷ್ಟ ಪಡೆದವರಲ್ಲಿ ತಾಲೂಕಿನ ಉಳವಿ ಗ್ರಾಮದ ಸ್ನೇಹಜೀವಿಗಳಾದ ನವಿದ್‌ ಅಹಮದ್‌ ಉಳವಿ ಹಾಗೂ ಮಹಾಬಲೇಶ್ವರ ಭಟ್‌ ಹೊಡಬಟ್ಟೆ ಎದ್ದು ಕಾಣುವಂತಿದ್ದಾರೆ. ಬಹುಕಾಲದ ಈ ಸ್ನೇಹಿತರು ಕೆರೆಕೊಪ್ಪ ಗ್ರಾಮದ 1 ಎಕರೆ 5 ಗುಂಟೆ ಜಮೀನಿನಲ್ಲಿ ಬರೋಬ್ಬರಿ 350 ಕ್ವಿಂಟಾಲ್‌ ಹಿಮಾಚಲ ತಳಿಯ ಶುಂಠಿ ಬೆಳೆದಿದ್ದಾರೆ. 25 ಲಕ್ಷ ರೂಪಾಯಿ ಆದಾಯ ಸಂಪಾದನೆ ಮಾಡಿ ಜನ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಕಳೆದ ಏಪ್ರಿಲ್‌ 10ರಂದು ಶುಂಠಿ ಬಿತ್ತನೆ ಮಾಡಿದ್ದು, ಉತ್ತಮ ಇಳುವರಿ, ಉತ್ತಮ ಬೆಲೆ ಇರುವ ಕಾರಣಕ್ಕೆ ಕೇವಲ 8 ತಿಂಗಳಲ್ಲಿ ಕಿತ್ತು ಮಾರಾಟ ಮಾಡಿದ್ದಾರೆ. ಸುದ್ದಿ ತಿಳಿದ ಅಕ್ಕಪಕ್ಕದ ಗ್ರಾಮಗಳ ರೈತರು ಹೊಲದಲ್ಲಿ ಶುಂಠಿಯ ದೊಡ್ಡ ರಾಶಿ ನೋಡಲೆಂದೇ ಭೇಟಿ ನೀಡಿದ್ದು ವಿಶೇಷವಾಗಿತ್ತು.
ಶುಂಠಿ ಬಿತ್ತನೆ ಪೂರ್ವದಲ್ಲಿ ಭೂಮಿಯನ್ನು ಚೆನ್ನಾಗಿ ಉಳುಮೆ ಮಾಡಿ ಸೆಣಬು ಹಾಕಿ, ಅದು ಬೆಳೆದ ನಂತರ ಟ್ರ್ಯಾಕ್ಟರ್‌ ಉಳುಮೆ ಮೂಲಕ ಮಣ್ಣಲ್ಲಿ ಸೇರಿಸಿ ಫಲವತ್ತತೆಗೊಳಿಸಿದ್ದರು. ಸಿದ್ಧಪಡಿಸಿದ ಶುಂಠಿ ಪಟ್ಟೆಗಳಿಗೆ ಬೇವಿನ ಹಿಂಡಿ ಹಾಗೂ ಮೀನಿನ ಗೊಬ್ಬರ ಹಾಕಿಸಿದ್ದರು. ನಂತರ ಬೀಜೋಪಚಾರ ಮಾಡಿದ ಶುಂಠಿಯನ್ನು ಬಿತ್ತನೆ ಮಾಡಿ ಸಮಯಕ್ಕನುಸಾರ ನೀರು, ಗೊಬ್ಬರ, ಕೀಟನಾಶಕ ನಿರ್ವಹಣೆ ಮಾಡುವ ಮೂಲಕ ಉತ್ತಮ ಬೆಳೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಒಂದೊಂದು ಬೀಜದಲ್ಲಿ 50ರಿಂದ 60 ಮರಿಗಳು ಬೆಳೆದು ಗಡ್ಡೆಯೊಡೆದಿವೆ. ಹೊಲದಲ್ಲಿ ಶುಂಠಿ ಪಟ್ಟೆಗಳು ಕಾಣದಂತೆ ಹುಲುಸಾಗಿ ಬೆಳೆದ ಬೆಳೆ ಅನೇಕ ರೈತರನ್ನು ಹೊಲದತ್ತ ಸೆಳೆಯುತ್ತಿದೆ.
ಸರಾಸರಿ 1 ಕ್ವಿಂಟಾಲ್‌ ಬೀಜಕ್ಕೆ 28 ಕ್ವಿಂಟಾಲ್‌ ಇಳುವರಿ ಬಂದಿದೆ. ಚಳಿಗಾಲದಲ್ಲಿ ಶುಂಠಿ ತೂಕ ಕಳೆಕೊಳ್ಳುವುದು ಸಾಮಾನ್ಯ. ಹೀಗಾಗಿ ತೂಕ ಕಳೆದುಕೊಳ್ಳುವ ಮೊದಲೇ ಶುಂಠಿ ಕಿತ್ತು ಮಾರಾಟ ಮಾಡಿ ಅತ್ಯುತ್ತಮ ಲಾಭ ಪಡೆದಿದ್ದಾರೆ.
