ಬಾಲಿವುಡ್‌ ನ ಖ್ಯಾತ ನಟ ಹಾಸ್ಯನಟ ಕೃಷ್ಣ ಅಭಿಷೇಕ್ ಅವರ ಪತ್ನಿ ನಟಿ ಕಾಶ್ಮೇರಾ ಶಾ ಅವರು ಅಮೆರಿಕದಲ್ಲಿದ್ದಾಗ ಅಪಘಾತಕ್ಕೀಡಾಗಿದ್ದಾರೆ. ಕಾರ್‌ ಸೀಟ್‌ನಲ್ಲಿ ರಕ್ತಸಿಕ್ತವಾದ ಫೋಟೋಗಳನ್ನು ಹಂಚಿಕೊಂಡಿರುವ ಕಾಶ್ಮೇರಾ ತಾನು ಬದುಕಿದ್ದು ದೊಡ್ಡ ಪವಾಡ ಎಂದಿದ್ದಾರೆ. ಅಲ್ಲದೆ ಅಪಘಾತದ ವೇಳೆ ಒಂಟಿಯಾಗಿದ್ದ ಕಾಶ್ಮೇರಾ ತನ್ನನ್ನು ಕಾಪಾಡಿದ್ದಕ್ಕಾಗಿ ದೇವರಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
ಸೋಷಿಯಲ್ ಮೀಡಿಯಾದಲ್ಲಿ ಅಪಘಾತದ ಬಗ್ಗೆ ಬರೆದುಕೊಂಡಿರುವ ಕಾಶ್ಮೇರಾ ಶಾ, ʼʼನನ್ನನ್ನು ಉಳಿಸಿದ್ದಕ್ಕಾಗಿ ದೇವರಿಗೆ ಧನ್ಯವಾದಗಳು. ತುಂಬಾ ಕೆಟ್ಟ ಅಪಘಾತವಾಗಿತ್ತು. ಅದನ್ನು ನೆನಪಿಸಿಕೊಳ್ಳಲೂ ಸಾಧ್ಯವಾಗುವುದಿಲ್ಲ. ಏನೋ ಕೆಟ್ಟದ್ದು ಸಂಭವಿಸಬಹುದಿತ್ತು. ಆದರೆ ಅಪಘಾತ ಅಷ್ಟೇ ಆಗಿದೆ. ಸಣ್ಣಪುಟ್ಟ ಗಾಯಗಳಾಗಿವೆʼʼ ಎಂದು ಹೇಳಿದ್ದಾರೆ. ʼʼಇಂತಹ ಸಂದರ್ಭದಲ್ಲಿ ನಾನು ನನ್ನ ಕುಟುಂಬವನ್ನು ಬಹಳ ಮಿಸ್‌ ಮಾಡಿಕೊಳ್ಳುತ್ತಿದ್ದೇನೆʼʼ ಎಂದು ಅವರು ಬರೆದುಕೊಂಡಿದ್ದಾರೆ.
ಅವರ ಈ ಇನ್ಸ್‌ಸ್ಟಾಗ್ರಾಂ ಪೋಸ್ಟ್‌ಗೆ ಕಾಮೆಂಟ್‌ ಮಾಡಿರುವ ಅವರ ಪತಿ ಕೃಷ್ಣ ಅವರು, ʼʼಕಾಶ್ಮೇರಾ ಈಗ ಆರೋಗ್ಯವಾಗಿದ್ದಾರೆ. ಯಾವುದೇ ತೊಂದರೆಯಿಲ್ಲʼʼ ಎಂದು ಹೇಳಿದ್ದಾರೆ. ಬಾಲಿವುಡ್‌ ಜನಪ್ರಿಯ ನಟ ಗೋವಿಂದ ಅವರು ಕೃಷ್ಣ ಅಭಿಷೇಕ್ ಅವರ ಸೋದರ ಮಾವ. ಕಿರುತೆರೆಯಲ್ಲಿಯೂ ಕಾಣಿಸಿಕೊಂಡಿರುವ ಕಾಶ್ಮೇರಾ ಶಾ ಅವರು ಹಿಂದಿ, ಮರಾಟಿ ಸಿನಿಮಾಗಳಲ್ಲಿಯೂ ನಟಿಸಿಸದ್ದಾರೆ.
ಇತ್ತೀಚೆಗೆ ನಟ ಗೋವಿಂದ ಅವರಿಗೆ ಗುಂಡೇಟು ತಗುಲಿ ಆಸ್ಪತ್ರೆಗೆ ದಾಖಲಾಗಿದ್ದಾಗ ಅವರನ್ನು ಭೇಟಿ ಮಾಡಲು ಕಶ್ಮೇರಾ ಆಸ್ಪತ್ರೆಗೆ ಧಾವಿಸಿದ್ದರು. ಕಳೆದ ಕೆಲವು ವರ್ಷಗಳಿಂದ 2 ಕುಟುಂಬಗಳ ನಡುವೆ ಕಲಹೆ ಏರ್ಪಟ್ಟಿದೆ. ಅದಾಗ್ಯೂ ಗೋವಿಂದ ಅವರು ಆಸ್ಪತ್ರೆಗೆ ದಾಖಲಾದ ಕೆಲವೇ ಗಂಟೆಗಳಲ್ಲಿ ಕಾಶ್ಮೇರಾ ಆಸ್ಪತ್ರೆಗೆ ಬಂದು ಆರೋಗ್ಯ ವಿಚಾರಿಸಿದ್ದರು.
