ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿಯಲ್ಲಿ ಇದೇ ಮೊದಲ ಬಾರಿ ಪಾಲ್ಗೊಳ್ಳುತ್ತಿರುವ ಕೆನಡಾ ಟಿ20 ಕ್ರಿಕೆಟ್ ತಂಡ, ತನ್ನ 15 ಆಟಗಾರರ ಬಲಿಷ್ಠ ತಂಡವನ್ನು ಪ್ರಕಟ ಮಾಡಿದೆ. ವೆಸ್ಟ್ ಇಂಡೀಸ್ ಮತ್ತು ಅಮೆರಿಕದ ಜಂಟಿ ಆತಿಥ್ಯದಲ್ಲಿ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿಯು ಜೂನ್ 1ರಿಂದ 29ರವರೆಗೆ ನಡೆಯಲಿದ್ದು, ಕೆನಡಾ ತಂಡ ಭಾರತ, ಪಾಕಿಸ್ತಾನ ಐರ್ಲೆಂಡ್ ಮತ್ತು ಆತಿಥೇಯ ಅಮೆರಿಕ ಇರುವ ‘ಎ’ ಗುಂಪಿನಲ್ಲಿ ಸ್ಥಾನ ಪಡೆದಿದೆ. ಜೂನ್ 1ರಂದು ನಡೆಯಲಿರುವ ಟೂರ್ನಿಯ ಉದ್ಘಾಟನಾ ಪಂದ್ಯದಲ್ಲಿ ಆತಿಥೇಯ ಅಮೆರಿಕ ಎದುರು ಕೆನಡಾ ತನ್ನ ಅಭಿಯಾನ ಆರಂಭಿಸಲಿದೆ.
ಇದೇ ಮೊದಲ ಬಾರಿ ಟಿ20 ವಿಶ್ವಕಪ್ ಆಡುತ್ತಿರುವ ಕೆನಡಾ ತಂಡವನ್ನು ಅನುಭವಿ ಆಲ್ರೌಂಡರ್ ಸಾದ್ ಬಿನ್ ಝಾಫರ್ ಮುನ್ನಡೆಸಲಿದ್ದಾರೆ. ಝಾಫರ್ ಹೊರತಾಗಿ ತಂಡದಲ್ಲಿ ಅನುಭವಿ ಬ್ಯಾಟರ್ ಆರೊನ್ ಜಾನ್ಸನ್ ಮತ್ತು ವೇಗದ ಬೌಲರ್ ಕಲೀಮ್ ಸನಾ ಅವರಂತಹ ಅನುಭವಿ ಆಟಗಾರರು ತಂಡದಲ್ಲಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ ಅನುಭವ ಇರುವ ಈ ಆಟಗಾರರು ತಂಡದಲ್ಲಿರುವ ಯುವ ಆಟಗಾರರಿಗೆ ಮಾರ್ಗದರ್ಶನ ನೀಡುವ ಜವಾಬ್ದಾರಿಯನ್ನೂ ಹೊತ್ತಿದ್ದಾರೆ.
BHEL Recruitment: ತಿಂಗಳಿಗೆ ₹ 95 ಸಾವಿರ ಸಂಬಳ..! BHELನಲ್ಲಿ ಬಂಪರ್ ಉದ್ಯೋಗಾವಕಾಶ – ಇಂದೇ ಅರ್ಜಿ ಸಲ್ಲಿಸಿ
ಈ ನಡುವೆ ನಿಖಿಲ್ ದತ್ತಾ ಮತ್ತು ಶೀಮಂತ ವಿಜೇಯರತ್ನೆ ಅವರಂತಹ ಅನುಭವಿ ಆಟಗಾರರನ್ನು ಕೆನಡಾ ಕ್ರಿಕೆಟ್ ಬೋರ್ಡ್ ಸೆಲೆಕ್ಟರ್ಸ್ ಕಡೆಗಣಿಸಿ ಅವರ ಸ್ಥಾನಕ್ಕೆ ಯುವ ಆಟಗಾರರನ್ನು ಆಯ್ಕೆ ಮಾಡಿದ್ದಾರೆ. ಹರ್ಷ ಠಾಕೆರ್, ಕನ್ವರ್ಪಾಲ್ ತಾತ್ಗುರ್ ಮತ್ತು ರಯಾನ್ ಖಾನ್ ಪಠಾಣ್ ಅವರಂತಹ ಯುವ ಆಟಗಾರರು ಕೆನಡಾ ಟಿ20 ಕ್ರಿಕೆಟ್ ತಂಡದಲ್ಲಿ ಮೊದಲ ಬಾರಿ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಕೆನಡಾದಲ್ಲಿ ದಕ್ಷಿಣ ಏಷ್ಯಾ ಸಂಜಾತ ಆಟಗಾರರು ಹೆಚ್ಚಿರುವುದು ವಿಶೇಷ.
ತಜಿಂದರ್ ಸಿಂಗ್ ಬ್ಯಾಕಪ್ ಆಟಗಾರನಾಗಿ ತಂಡದೊಂದಿಗೆ ಪ್ರಯಾಣ ಬೆಳೆಸಲಿದ್ದಾರೆ. ಆದಿತ್ಯ ವರಧರಾಜನ್, ಅಮರ್ ಖಾಲಿದ್, ಜತಿಂದರ್ ಮಾಥಾರು ಮತ್ತು ಪ್ರವೀಣ್ ಕುಮಾರ್ ಕಾಯ್ದಿರಿಸಿದ ಆಟಗಾರರ ಪಟ್ಟಿಯಲ್ಲಿದ್ದಾರೆ. ಗಾಯದ ಸಮಸ್ಯಗಳು ಎದುರಾಗಿ ಆಟಗಾರರ ಅವಶ್ಯಕತೆ ಎದುರಾದರೆ ಈ ಆಟಗಾರರು ತಂಡ ಸೇರಿಕೊಳ್ಳಲಿದ್ದಾರೆ. 15 ಸದಸ್ಯರ ತಂಡದ ಜೊತೆಗ ಮೀಸಲು ಆಟಗಾರರು ಕೂಡ ವಿಶ್ವಕಪ್ ಟೂರ್ನಿ ವೇಳೆ ತಂಡದ ಜೊತೆಗಿರಲಿದ್ದಾರೆ.
ಟಿ20 ವಿಶ್ವಕಪ್ ಟೂರ್ನಿಗೆ ಕೆನಡಾ ತಂಡ ಹೀಗಿದೆ
ಸಾದ್ ಬಿನ್ ಝಾಫರ್ (ನಾಯಕ), ಆರೊನ್ ಜಾನ್ಸನ್, ಡಿಲನ್ ಹೇಲಿಂಗರ್, ದಿಲ್ಪ್ರೀತ್ ಬಾಜ್ವಾ, ಹರ್ಷ ಠಾಕೆರ್, ಜೆರೆಮಿ ಗಾರ್ಡನ್, ಜುನೇದ್ ಸಿದ್ದಿಕಿ, ಕಲೀಮ್ ಸನಾ, ಕನ್ವರ್ ಪಾಲ್ ತಾತ್ಗುರ್, ನವನೀತ್ ಧಲಿವಾಲ್, ನಿಕೋಲಸ್ ಕಿರ್ಟನ್, ಪ್ರಗತ್ ಸಿಂಗ್, ರವೀಂದ್ರ ಪಾಲ್ ಸಿಂಗ್, ರಯಾನ್ ಖಾನ್ ಪಠಾಣ್, ಶ್ರೇಯಸ್ ಮೋವಾ.
ಬ್ಯಾಕಪ್ ಆಟಗಾರರು: ತಜಿಂದರ್ ಸಿಂಗ್, ಆದಿತ್ಯ ವರಧರಾಜನ್, ಅಮರ್ ಖಾಲಿದ್, ಜಿತೇಂದ್ರ್ ಮಾಥಾರು, ಪ್ರವೀಣ್ ಕುಮಾರ್.