IPL ಮೆಗಾ ಹರಾಜು ಸೌದಿ ಅರೇಬಿಯಾದ ಜೆಡ್ಡಾ ನಗರದಲ್ಲಿ ನಡೆಯುತ್ತಿದ್ದು, ಇದರಲ್ಲಿ RCB ಇಬ್ಬರು ಇಂಗ್ಲೆಂಡ್ ಆಟಗಾರರನ್ನು ಖರೀದಿ ಮಾಡಿದೆ. ಕಳೆದ ಐಪಿಎಲ್‌ನಲ್ಲಿ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡದ ಪರ ಆರಂಭಿಕನಾಗಿ ಕಣಕ್ಕಿಳಿದು ಸ್ಫೋಟಕ ಬ್ಯಾಟಿಂಗ್‌ ಮಾಡಿದ್ದ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಪಿಲ್ ಸಾಲ್ಟ್ ಇದೀಗ ಆರ್ಸಿಬಿ ಸೇರಿಕೊಂಡಿದ್ದಾರೆ.
IPL Auction 2025: 15.75 ಕೋಟಿ ಮೊತ್ತಕ್ಕೆ ಗುಜರಾತ್ ಪಾಲಾದ ಜೋಸ್ ಬಟ್ಲರ್!
ಕೆಕೆಆರ್, ಸಾಲ್ಟ್ಗಾಗಿ 11.25 ಕೋಟಿ ನೀಡಲು ಮುಂದಾಯಿತು. ಆದರೆ ಆರ್ಸಿಬಿ ಅಂತಿಮವಾಗಿ 11.50 ಕೋಟಿ ನೀಡಿ ಸಾಲ್ಟ್ರನ್ನು ಖರೀದಿಸುವಲ್ಲಿ ಯಶಸ್ವಿಯಾಯಿತು. 2023 ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಕಣಕ್ಕಿಳಿಯುವುದರೊಂದಿಗೆ ಐಪಿಎಲ್ ವೃತ್ತಿಜೀವನ ಆರಂಭಿಸಿದ್ದ ಪಿಲ್ ಸಾಲ್ಟ್, ಮೊದಲ ಆವೃತ್ತಿಯಲ್ಲೇ 160 ಕ್ಕಿಂತ ಹೆಚ್ಚು ಸ್ಟ್ರೈಕ್ ರೇಟ್‌ನಲ್ಲಿ 218 ರನ್ ಗಳಿಸಿದ್ದರು. ಮೊದಲ ಆವೃತ್ತಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ, ಡೆಲ್ಲಿ ಕ್ಯಾಪಿಟಲ್ಸ್ ಅವರನ್ನು ಬಿಡುಗಡೆ ಮಾಡಿತ್ತು.
ಆ ನಂತರ2024 ರಲ್ಲಿ ಕೋಲ್ಕತ್ತಾ ಪರ ಆಡುವ ಅವಕಾಶ ಪಡೆದಿದ್ದ ಸಾಲ್ಟ್ 12 ಪಂದ್ಯಗಳಲ್ಲಿ ನಾಲ್ಕು ಅರ್ಧ ಶತಕಗಳ ಸಹಾಯದಿಂದ 435 ರನ್ ಗಳಿಸಿದ್ದರು. ಐಪಿಎಲ್‌ನಲ್ಲಿ ಇದುವರೆಗೆ 2 ತಂಡಗಳ ಪರ ಆಡಿರುವ ಫಿಲ್ ಸಾಲ್ಟ್, 21 ಪಂದ್ಯಗಳನ್ನಾಡಿದ್ದು ಒಟ್ಟು 653 ರನ್ ಕಲೆಹಾಕಿದ್ದಾರೆ. ಇದರಲ್ಲಿ 6 ಅರ್ಧಶತಕಗಳು ಸೇರಿದ್ದರೆ, ಅವರ ಅತ್ಯಧಿಕ ಸ್ಕೋರ್ 89 ರನ್ ಆಗಿದೆ.
