ಬೈರೂತ್: ಇಸ್ರೇಲ್‍ ನ ದಾಳಿಯಲ್ಲಿ ಹತ್ಯೆಗೀಡಾಗಿದ್ದ ಹಿಜ್ಬುಲ್ಲಾ ಸಶಸ್ತ್ರ ಹೋರಾಟಗಾರರ ಗುಂಪಿನ ವರಿಷ್ಟ ಹಸನ್ ನಸ್ರಲ್ಲಾ ಹಾಗೂ ಅವರ ಉತ್ತರಾಧಿಕಾರಿ ಹಾಶೆಮ್ ಸಫೀದ್ದೀನ್ ಅವರ ಅಂತ್ಯಕ್ರಿಯೆ ಸುಮಾರು ಐದು ತಿಂಗಳ ಬಳಿಕ ಲೆಬನಾನ್ ರಾಜಧಾನಿ ಬೈರೂತ್ ನ ಹೊರವಲಯದ ಕ್ಯಾಮಿಲ್ಲೆ ಚಮೌನ್ ಸ್ಪೋರ್ಟ್ಸ್ ಸಿಟಿ ಕ್ರೀಡಾಂಗಣದಲ್ಲಿ ಭಾನುವಾರ ಭಾರಿ ಜನಸಾಗರದ ನಡುವೆ ನಡೆದಿದೆ. ಈ ವೇಳೆ ಹಾಜರಿದ್ದ ಜನರು ನಸ್ರಲ್ಲಾ ಹಾಗೂ ಹಾಶೆಮ್ ಅವರಿಗೆ ಗೌರವ ನಮನ ಸಲ್ಲಿಸಿದ್ದಾರೆ.
ಇರಾನ್ ಬೆಂಬಲಿತ ಹಿಜ್ಬುಲ್ಲಾ ಗುಂಪನ್ನು ದಶಕಗಳ ಕಾಲ ಮುನ್ನಡೆಸಿದ್ದ ನಸ್ರಲ್ಲಾ 2024ರ ಸೆಪ್ಟಂಬರ್ 27ರಂದು ಇಸ್ರೇಲ್‍ನ ವೈಮಾನಿಕ ದಾಳಿಯಲ್ಲಿ ಮೃತಪಟ್ಟಿದ್ದರು. ಇದೀಗ ಸುಮಾರು ಐದು ತಿಂಗಳ ಬಳಿಕ ಅಂತ್ಯ ಸಂಸ್ಕಾರ ನಡೆಸಲಾಗಿದ್ದು ಸ್ಪೋರ್ಟ್ ಸಿಟಿ ಕ್ರೀಡಾಂಗಣದಲ್ಲಿ ನಡೆದ ಅಂತ್ಯಸಂಸ್ಕಾರದಲ್ಲಿ 55,000ಕ್ಕೂ ಅಧಿಕ ಮಂದಿ ಭಾಗಿಯಾಗಿದ್ದರು.
ನಸ್ರಲ್ಲಾ ಅವರ ಫೋಟೋ ಮತ್ತು ಹಿಜ್ಬುಲ್ಲಾ ಧ್ವಜವನ್ನು ಹಿಡಿದಿದ್ದ ಬೆಂಬಲಿಗರು ಕಪ್ಪು ಬಟ್ಟೆ ಧರಿಸಿ ಕ್ರೀಡಾಂಗಣದಲ್ಲಿ ಹಾಜರಿದ್ದರು. ಇಬ್ಬರು ನಾಯಕರ ಮೃತದೇಹವಿದ್ದ ಶವಪೆಟ್ಟಿಗೆಯನ್ನು ಹೊತ್ತ ಕಪ್ಪು ಬಣ್ಣದ ಟ್ರಕ್‍ ಗಳು ಜನಸಾಗರದ ನಡುವೆ ಕ್ರೀಡಾಂಗಣದತ್ತ ಮುಂದುವರಿದಾಗ ನಸ್ರಲ್ಲಾ ಅವರ ಭಾಷಣದ ಆಯ್ದ ಭಾಗಗಳನ್ನು ಧ್ವನಿವರ್ಧಕದ ಮೂಲಕ ಪ್ರಸಾರ ಮಾಡಲಾಯಿತು. ಆಗ ಸಾವಿರಾರು ಮಂದಿ ಬೆಂಬಲಿಗರು ತಮ್ಮ ಮುಷ್ಟಿಯನ್ನು ಗಾಳಿಯಲ್ಲಿ ಎತ್ತಿಹಿಡಿದು ` ನಾವು ನಿಮ್ಮ ಸೇವೆಯಲ್ಲಿದ್ದೇವೆ ನಸ್ರಲ್ಲಾ‘, `ನಾವು ನಸ್ರಲ್ಲಾ ಭರವಸೆಗೆ ನಿಷ್ಠರಾಗಿದ್ದೇವೆ‘ ಎಂದು ಘೋಷಣೆ ಕೂಗಿದರು.
