ಜೆರುಸಲೇಂ : ಕದನ ವಿರಾಮ ಒಪ್ಪಂದದ ಮುಂದುವರಿದ ಭಾಗವಾಗಿ ಹಮಾಸ್ ಇಸ್ರೇಲ್‌ನ ಮೂವರು ಒತ್ತೆಯಾಳುಗಳನ್ನು ರೆಡ್‌ಕ್ರಾಸ್‌ಗೆ ಹಸ್ತಾಂತರಿಸಿದೆ. ಈ ವೇಳೆ ಇಸ್ರೇಲಿನ ಒತ್ತೆಯಾಳು ಒಬ್ಬರು ಹಮಾಸ್ ಹೋರಾಟಗಾರನ ಹಣೆಗೆ ಮುತ್ತಿಟ್ಟು ಬೀಳ್ಕೊಟ್ಟಿದ್ದು ಸದ್ಯ ಈ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಓಮರ್ ವೆಂಕರ್ಟ್, ಓಮರ್ ಶೆಮ್ ಟೋವ್ ಮತ್ತು ಎಲಿಯಾ ಕೊಹೆನ್ ಎಂಬ ಮೂವರು ಇಸ್ರೇಲಿ ಒತ್ತೆಯಾಳುಗಳನ್ನು ಹಮಾಸ್ ರೆಡ್‌ಕ್ರಾಸ್‌ಗೆ ಹಸ್ತಾಂತರಿಸಿದೆ. ಈ ವೇಳೆ ಅವರಿಗೆ ಬಿಡುಗಡೆ ಪ್ರಮಾಣ ಪತ್ರವನ್ನು ಕೂಡ ನೀಡಲಾಗಿದೆ.\
ಓಮರ್ ಶೆಮ್ ಟೋವ್ ಎಂಬ ಒತ್ತೆಯಾಳು ಬಿಡುಗಡೆಯ ವೇಳೆ ಹಮಾಸ್‌ನ ಇಬ್ಬರು ಹೋರಾಟಗಾರರಿಗೆ ಮುತ್ತಿಡುವುದು ವೀಡಿಯೊದಲ್ಲಿ ಸೆರೆಯಾಗಿದೆ. ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಓಮರ್ ತಂದೆ ಮಾಲ್ಕಿ ಶೆಮ್ ಟೋವ್, ಬಿಡುಗಡೆಯ ವೇಳೆ ನನ್ನ ಮಗನ ಸಂತೋಷದ ವರ್ತನೆಯು ಅವನ ವ್ಯಕ್ತಿತ್ವವನ್ನು ಪ್ರತಿಬಿಂಬಿಸುತ್ತದೆ. ಓಮರ್ ತೆಳ್ಳಗಿದ್ದಾನೆ. ಆದರೆ, ಆತ ಅತ್ಯಂತ ಧನಾತ್ಮಕ ಮಸ್ಥಿತಿಯನ್ನು ಹೊಂದಿರುವವನಾಗಿದ್ದಾನೆ ಎಂದು ಹೇಳಿದ್ದಾರೆ.
