ಆಹಾರವಿಲ್ಲದೆ ನಾಲ್ಕೈದು ದಿನ ಕಳೆಯಬಹುದು. ಆದ್ರೆ ನೀರಿಲ್ಲದೆ ಒಂದು ದಿನ ಕಳೆಯೋದು ಕಷ್ಟ. ಇದೇ ಕಾರಣಕ್ಕೆ ನೀರನ್ನು ಜೀವಜಲ ಅನ್ನೋದು. ನೀರು ನಮ್ಮ ಆರೋಗ್ಯಕ್ಕೆ ಬಹಳ ಮುಖ್ಯ. ದೇಹಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ನೀರು ಸೇರಿಲ್ಲವೆಂದ್ರೆ ಒಂದೊಂದೇ ಸಮಸ್ಯೆ ಶುರುವಾಗುತ್ತದೆ. ದೇಹ ನಿರ್ಜಲೀಕರಣಗೊಳ್ಳುತ್ತದೆ.
ಆದರೆ ಕೆಲವರು ಅತಿಯಾದ ಬಾಯಾರಿಕೆಯಿಂದ ಒದ್ದಾಡುತ್ತಾರೆ. ಎಷ್ಟೇ ನೀರು ಕುಡಿದರೂ ಬಾಯಾರಿಕೆ ಮಾತ್ರ ಕಡಿಮೆಯಾಗುವುದೇ ಇಲ್ಲ. ನಿಮಗೂ ಕೂಡ ಎಷ್ಟೇ ನೀರು ಕುಡಿದರೂ ಬಾಯಾರಿಕೆ ನೀಗುತ್ತಿಲ್ಲ ಎಂದಾದರೆ,
ಅದಕ್ಕೆ ಹಲವು ಕಾರಣಗಳಿವೆ. ಕೆಲವು ಅನಾರೋಗ್ಯ ಮುನ್ಸೂಚನೆ ಇದ್ದಾಗಲೂ ಕೂಡ ದೇಹ ಹೆಚ್ಚಿನ ನೀರನ್ನು ಬಯಸುತ್ತದೆ. ಹಾಗಾದರೆ ಯಾವೆಲ್ಲ ಕಾರಣಕ್ಕೆ ಪದೇ ಪದೇ ನೀರು ಕುಡಿಯಬೇಕೆನಿಸುತ್ತದೆ ಎನ್ನುವ ಬಗ್ಗೆ ತಿಳಿದುಕೊಳ್ಳಿ. ಆಗ ದೇಹಕ್ಕೆ ಯಾವ ಸಂದರ್ಭದಲ್ಲಿ ಯಾವ ಪ್ರಮಾಣದ ನೀರು ನೀಡಬೇಕು ಎನ್ನುವ ಅಂದಾಜು ಸಿಗುತ್ತದೆ. ಇಲ್ಲಿದೆ ನೋಡಿ ಮಾಹಿತಿ
ಉಪ್ಪಿನ ಅಂಶವಿರುವ ಆಹಾರ ಸೇವಿಸಿದಾಗ
- ಕೆಲವೊಮ್ಮೆ ನಾವು ಸೇವಿಸುವ ಆಹಾರ ಕೂಡ ದೇಹ ಹೆಚ್ಚಿನ ನೀರನ್ನು ಬೇಡುವಂತೆ ಮಾಡುತ್ತದೆ. ಅವುಗಳಲ್ಲಿ ಹೆಚ್ಚು ಉಪ್ಪಿರುವ ಆಹಾರ ಸೇವಿಸಿದಾಗ ಅಥವಾ ಕರಿದ ಪದಾರ್ಥಗಳನ್ನು ತಿಂದಾಗ, ಮಸಾಲೆ ಪದಾರ್ಥಗಳನ್ನು ಸೇವನೆಯಿಂದ ಹೆಚ್ಚು ಬಾಯಾರಿಕೆ ಆಗುತ್ತದೆ.
- ನೀವು ಬೇಕಾದರೆ ಗಮನಿಸಿ ಬೆಳಗ್ಗೆ ಎಣ್ಣೆ ಹಾಕಿ ಬೇಯಿಸಿದ ಚಪಾತಿ ಅಥವಾ ಪೂರಿಯನ್ನು ತಿನ್ನುವ ಮೂಲಕ ದಿನ ಆರಂಭಿಸಿ. ಅಂದು ಇಡೀ ದಿನ ನೀರು ಕುಡಿದಷ್ಟು ಸಾಕಾಗದು. ಅದೇ ರೀತಿ ತುಸು ಉಪ್ಪು ಜಾಸ್ತಿ ಇರುವ ಪಾಪಡ್‌ ಅಥವಾ ಇನ್ನಿತರ ತಿಂಡಿಗಳನ್ನು ತಿಂದಾಗಲೂ ನೀರಡಿಕೆಯಾಗುತ್ತದೆ.
- ಹೆಚ್ಚು ಉಪ್ಪಿರುವ ಆಹಾರಗಳನ್ನು ತಿಂದ ಸ್ವಲ್ಪ ಹೊತ್ತಿನ ನಂತರ ಬಿಸಿ ನೀರನ್ನು ಕುಡಿಯಿರಿ ಆಗ ಬಾಯಾರಿಕೆ ನಿಯಂತ್ರಣಕ್ಕೆ ಬರುತ್ತದೆ.
ನಿದ್ದೆ ಮಾಡದೇ ಇದ್ದಾಗ.
- ನಿದ್ದೆ ದೇಹವನ್ನು ಎಲ್ಲಾ ರೀತಿಯಿಂದಲೂ ಆರೋಗ್ಯವಾಗಿರುವಂತೆ ಮಾಡುತ್ತದೆ. ನಿದ್ದೆ ಸರಿಯಾಗಿ ಆಗದೆ ಇದ್ದಾಗ ದೇಹ ನಿರ್ಜಲೀಕರಣವಾಗುತ್ತದೆ. ಇದರಿಂದ ಹೆಚ್ಚು ನೀರು ಕುಡಿಯಬೇಕು ಎನಿಸುತ್ತದೆ. ಹೀಗಾಗಿ ಪ್ರತಿನಿತ್ಯ ಕನಿಷ್ಠ 8 ರಿಂದ 9 ಗಂಟೆಗಳ ಕಾಲ ನಿರಂತರ ನಿದ್ದೆ ಮಾಡಿ.
- ಮಲಗುವ ಮುನ್ನ ಅರಿಶಿನ ಬೆರೆಸಿದ ಹಾಲು ಅಥವಾ ಜ್ಯೇಷ್ಠ ಮಧುವಿನ ಕಷಾಯ ಕುಡಿದು ಮಲಗಿ ಆಗ ನಿದ್ದೆ ಚೆನ್ನಾಗಿ ಬರುತ್ತದೆ. ಇಡೀ ದಿನ ಕ್ರೀಯಾಶೀಲರಾಗಿರಬಹುದು.
- ಮಲಗುವ ಸ್ವಲ್ಪ ಸಮಯದ ಮುನ್ನ ಚೆನ್ನಾಗಿ ನೀರು ಕುಡಿದು ಮಲಗಿ. ಬೆಳಗ್ಗೆ ಏಳುವಷ್ಟರಲ್ಲಿ ನಿಮ್ಮ ಮೂತ್ರಪಿಂಡಗಳು ದೇಹದಲ್ಲಿನ ಅನುಪಯುಕ್ತ ವಸ್ತುಗಳನ್ನು ಮೂತ್ರದ ಮೂಲಕ ಹೊರಗೆ ಹಾಕಿ ದೇಹವನ್ನು ಸುರಕ್ಷಿತವಾಗಿಡುವಂತೆ ಮಾಡುತ್ತದೆ.
ಮುಟ್ಟಿನ ದಿನಗಳಲ್ಲಿ
- ಹೆಣ್ಣು ಮಕ್ಕಳಿಗೆ ಪ್ರತೀ ತಿಂಗಳು ಸಂಭವಿಸುವ ಸ್ವಾಭಾವಿಕ ಪ್ರಕ್ರಿಯೆಯಾಗಿದ್ದರೂ ಆ ದಿನಗಳಲ್ಲಿ ಆಕೆಯ ದೇಹ ಸ್ಥಿತಿ ಸೂಕ್ಷ್ಮವಾಗಿರುತ್ತದೆ. ಮಾಸಿಕ ದಿನಗಳಲ್ಲಿ ಹೆಚ್ಚು ರಕ್ತ ದೇಹದಿಂದ ಹೊರಹೋಗುವ ಕಾರಣ ದೇಹಕ್ಕೆ ದ್ರವ ಪದಾರ್ಥದ ಅಗತ್ಯ ಹೆಚ್ಚಿರುತ್ತದೆ.
- ಮುಟ್ಟಿನ ದಿನಗಳು ಹತ್ತಿರ ಬರುತ್ತಿದ್ದಂತೆ ಸುಸ್ತು, ನೀರಡಿಕೆ ಹೆಚ್ಚಾಗಿ ಕಾಡುತ್ತದೆ. ಇದೇ ಕಾರಣದಿಂದ ದೇಹಕ್ಕೆ ಹೆಚ್ಚು ನೀರು ಬೇಕು ಎನಿಸುತ್ತದೆ. ಪದೇ ಪದೇ ಬಾಯಾರಿಕೆ ಆಗುತ್ತದೆ.
ಮಧುಮೇಹ
ರಕ್ತದಲ್ಲಿ ಸಕ್ಕರೆಯ ಪ್ರಮಾಣ ಹೆಚ್ಚಾದಾಗ ದೇಹ ಅದನ್ನು ಸಮತೋಲನಕ್ಕೆ ತರಲು ಹೆಚ್ಚು ನೀರನ್ನು ಬೇಡುತ್ತದೆ. ಮಧುಮೇಹ ದೇಹವನ್ನು ನಿರ್ಜಲೀಕರಣಕ್ಕೂ ತಳ್ಳುತ್ತದೆ. ಹೀಗಾಗಿ ನೀರು ಹೆಚ್ಚು ಬೇಕೆನಿಸುತ್ತದೆ
ಅಲ್ಲದೆ ರಕ್ತದಲ್ಲಿ ಸಕ್ಕರೆ ಪ್ರಮಾಣ ಹೆಚ್ಚಾದಾಗ ಅದು ನೇರವಾಗಿ ಮೂತ್ರಪಿಂಡಗಳ ಮೇಲೆ ಪರಿಣಾಮ ಬೀರುತ್ತದೆ. ಮೂತ್ರಪಿಂಡಗಳು ಇಡೀ ದೇಹದ ಫಿಲ್ಟರ್‌ನಂತೆ ಕೆಲಸ ಮಾಡುವ ಕಾರಣ ರಕ್ಷಿಸಿಕೊಳ್ಳಲು ಅನುಪಯುಕ್ತ ವಸ್ತುಗಳನ್ನು ಹೊರಹಾಕಲು ಮೂತ್ರ ವಿಸರ್ಜನೆಗೆ ಪ್ರಚೋದಿಸುತ್ತದೆ. ಇದರಿಂದ ದೇಹಕ್ಕೆ ಹೆಚ್ಚು ನೀರು ಬೇಕು ಎನಿಸುತ್ತದೆ.
ರಕ್ತಹೀನತೆ, ರಕ್ತದೊತ್ತಡ
ಆಹಾರದಲ್ಲಿ ಪೋಷಕಾಂಶದ ಕೊರತೆ , ಮುಟ್ಟಿನ ದಿನಗಳಲ್ಲಿ ಅತಿಯಾದ ರಕ್ತಸ್ರಾವ ಸೇರಿದಂತೆ ಹಲವು ಕಾರಣಗಳಿಂದ ದೇಹದಲ್ಲಿ ರಕ್ತ ಹೀನತೆ ಉಂಟಾಗುತ್ತದೆ. ದೇಹದಲ್ಲಿ ಕೊರತೆಯಾದ ದ್ರವ ಪದಾರ್ಥಗಳನ್ನು ಸರಿದೂಗಿಸಿಕೊಳ್ಳಲು ಹೆಚ್ಚಿನ ರಕ್ತ ಉತ್ಪಾದನೆಗೆ ದೇಹ ನೀರಡಿಕೆ ಉಂಟಾಗುವಂತೆ ಮಾಡುತ್ತದೆ.
ಇನ್ನು ರಕ್ತದೊತ್ತಡವಾದಾಗ ಭಯ, ಆತಂಕ, ಉದ್ವೇಗ, ಬಳಲಿಕೆ ಸಹಜ. ಇದೆಲ್ಲವನ್ನೂ ಸರಿದೂಗಿಸಲು ದೇಹ ಹೆಚ್ಚು ಹೆಚ್ಚು ನೀರನ್ನು ಬೇಡುತ್ತದೆ. ರಕ್ತದೊತ್ತಡ ತಡೆಗೆ ಮಾನಸಿಕ ಆರೋಗ್ಯವೂ ಮುಖ್ಯ. ಮನಸ್ಸು ಚೆನ್ನಾಗಿರಬೇಕು ಎಂದರೆ ದೇಹಕ್ಕೆ ಸಾಕಷ್ಟು ನೀರು ಅಗತ್ಯವಗಿರುತ್ತದೆ.
