ಚಿಗುರು ಮೀಸೆಯ ಯುವಕ ನಿತೀಶ್ ರೆಡ್ಡಿ ಇದೀಗ ಕ್ರಿಕೆಟ್ ಪ್ರೇಮಿಗಳ ಮನದಲ್ಲಿ ಹೊಸ ಕಿಚ್ಚೆಬ್ಬಿಸಿದ್ದಾನೆ. ಬಾಂಗ್ಲಾದೇಶದ ವಿರುದ್ಧ ದಿಲ್ಲಿಯಲ್ಲಿ ನಡೆದ 2ನೇ ಟಿ20 ಪಂದ್ಯದಲ್ಲಿ ಈತ ಬ್ಯಾಟ್ ಬೀಸಿದ್ದನ್ನು ನೋಡಿದರೆ ಎಲ್ಲರೂ ದಂಗಾಗಿದ್ದರು. ಕೇವಲ 34 ಚೆಂಡುಗಳಲ್ಲಿ 74 ರನ್ ಚಚ್ಚಿದ್ದ ಅವರ ಬ್ಯಾಟ್ ನಿಂದ 7 ಸಿಕ್ಸರ್ ಗಳು ಸಿಡಿದಿದ್ದವು. ಇನ್ನು ಬೌಲಿಂಗ್ ನಲ್ಲೂ 23 ರನ್ ನೀಡಿ 2 ವಿಕೆಟ್ ಕಬಳಿಸಿದ ಈ ಆಲ್ ರೌಂಡರ್ ಅರ್ಹವಾಗಿಯೇ ಪಂದ್ಯಶ್ರೇಷ್ಠ ಗೌರವಕ್ಕೆ ಭಾಜನರಾದರು.
ಜುಲೈ 2015ರಲ್ಲಿ ಹರಾರೆಯಲ್ಲಿ ನಡೆದ ಭಾರತ- ಜಿಂಬಾಬ್ವೆ ನಡುವಿನ ಟಿ20 ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ಬ್ಯಾಟಿಂಗ್ ಆಯ್ದುಕೊಂಡಿತ್ತು. ಅಜಿಂಕೆ ರಹಾನೆ(33), ಮುರಳಿ ವಿಜಯ್ (34), ರಾಬಿನ್ ಉತ್ತಪ್ಪ(39) ಅವರ ಜವಾಬ್ಗಾರಿಯುತ ಆಟದಿಂದಾಗಿ ಭಾರತ 178ರ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಉತ್ತರವಾಗಿ ಜಿಂಬಾಬ್ವೆ ನಿಗದಿತ 20 ಓವರ್ ಗಳಲ್ಲಿ ಗಳಿಸಲು ಸಾಧ್ಯವಾದದ್ದು ಕೇವಲ 124 ರನ್. ಚೊಚ್ಚಲ ಪಂದ್ಯದಲ್ಲೇ 17 ರನ್ ನೀಡಿ 4 ವಿಕೆಟ್ ಕಬಳಿಸಿದ ಅಕ್ಷರ್ ಪಟೇಲ್ ಅರ್ಹವಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
2022ರಲ್ಲಿ ಈಡನ್ ಗಾರ್ಡನ್ ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ನಡೆದ ಟಿ20 ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ಕ್ರಿಕೆಟ್ ದೈತ್ಯರು 7 ವಿಕೆಟ್ ಕಳೆದುಕೊಂಡು 157 ರನ್ ಗಳಿಸಿದ್ದರು. ನಿಕೋಲಸ್ ಪೂರನ್ 43 ಚೆಂಡುಗಳಿಂದ 61 ರನ್ ಗಳಿಸಿದ್ದು ಬಿಟ್ಟರೆ ಉಳಿದವರಿಂದ ಹೇಳಿಕೊಳ್ಳುವಂತಹ ಪ್ರದರ್ಶನ ಬಂದಿರಲಿಲ್ಲ. ಚೊಚ್ಚಲ ಪಂದ್ಯ ಆಡಿದ್ದ ರವಿ ಬಿಷ್ಣೋಯಿ ಬಿಗು ದಾಳಿ ನಡೆಸಿ 17 ರನ್ ಗೆ 4 ವಿಕೆಟ್ ಕಿತ್ತಿದ್ದರು. ಉತ್ತರವಾಗಿ ಭಾರತ ತಂಡವು ರೋಹಿತ್ ಶರ್ಮಾ(40) ಮತ್ತು ಇಶಾನ್ ಕಿಶನ್ (35), ಸೂರ್ಯ ಕುಮಾರ್ ಯಾದವ್ (34) ಅವರ ಆಕರ್ಷಕ ಆಟದ ನೆರವಿನಿಂದ ಆರು ವಿಕೆಟ್ ಗಳಿಂದ ಪಂದ್ಯ ಜಯಿಸಿತ್ತು. ಬೌಲಿಂಗ್ ನಲ್ಲಿ ಅಸಾಧಾರಣ ಪ್ರದರ್ಶನ ತೋರಿದ ರವಿ ಬಿಷ್ಣೋಯಿ ಪಂದ್ಯ ಪುರುಷ ಪ್ರಶಸ್ತಿ ಪಡೆದರು.
2007ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಟಿ20 ವಿಶ್ವಕಪ್ ಅನ್ನು ಯಾರು ತಾನೇ ಮರೆಯಲು ಸಾಧ್ಯ? ಡರ್ಬನ್ ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಪಂದ್ಯದಲ್ಲಿ ಭಾರತ ತಂಡ 61 ರನ್ ಗೆ ನಾಲ್ಕು ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿ ಸಿಲುಕಿತ್ತು. ಆ ಸಂದರ್ಭದಲ್ಲಿ ನಾಯಕ ಧೋನಿ ಜೊತೆ ರೋಹಿತ್ ಶರ್ಮಾ ಅವರು 85 ರನ್ ಜೊತೆಯಾಟವಾಡಿ ತಂಡವನ್ನು ಅಪಾಯದಿಂದ ಪಾರು ಮಾಡಿದ್ದರು. ಧೋನಿ 45 ರನ್ ಹೊಡೆದರೆ, ರೋಹಿತ್ ಶರ್ಮಾ 50 ರನ್ ಬಾರಿಸಿದ್ದರು. ಇದರಿಂದಾಗಿ ತಂಡ 153 ರನ್ ಗಳಿಸಿತ್ತು. ಇದಕ್ಕೆ ಉತ್ತರವಾಗಿ ದಕ್ಷಿಣ ಆಫ್ರಿಕಾ 9 ವಿಕೆಟ್ ಕಳೆದುಕೊಂಡು 116 ರನ್ ಗಳನ್ನಷ್ಟೇ ಗಳಿಸಲು ಶಕ್ತವಾಯಿತು. ತಂಡವನ್ನು ಸಂಕಷ್ಟದ ಸಮಯದಲ್ಲಿ ಆಧರಿಸಿದ್ದ ರೋಹಿತ್ ಶರ್ಮಾ ಅವರು ಪಂದ್ಯ ಶ್ರೇಷ್ಠ ಪ್ರಶಸ್ತಿ ಗಳಿಸಿದ್ದರು.
ಟೀಂ ಇಂಡಿಯಾ ತನ್ನ ಮೊತ್ತಮೊದಲ ಟಿ20 ಪಂದ್ಯವನ್ನು 2016ರ ಡಿಸೆಂಬರ್ ನಲ್ಲಿ ಜೋಹಾನ್ಸ್ ಬರ್ಗ್ ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಆಡಿತ್ತು. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಆಫ್ರಿಕಾ 9 ವಿಕೆಟ್ ಕಳೆದುಕೊಂಡು ಗಳಿಸಿದ್ದು 126 ರನ್ ಗಳನ್ನಷ್ಟೇ. ಆಫ್ರಿಕಾ ಪರ ಅಬೀ ಮಾರ್ಕೆಲ್ 27 ರನ್ ಗಳನ್ನು ಗಳಿಸಿದ್ದು ಬಿಟ್ಟರೆ ಮತ್ತಾರೂ ಮಿಂಚಿರಲಿಲ್ಲ. ಎದುರಾಳಿ ತಂಡದ ತಲಾ 2 ವಿಕೆಟ್ ಗಳನ್ನು ಕಿತ್ತಿದ್ದ ಜಹೀರ್ ಖಾನ್ ಮತ್ತು ಅಜಿತ್ ಅಗರ್ಕರ್ ಅವರು ಭಾರತವನ್ನು ಡ್ರೈವರ್ ಸೀಟ್ ನಲ್ಲಿ ಕೂರಿಸುವಲ್ಲಿ ಯಶಸ್ವಿಯಾಗಿದ್ದರು. ಉತ್ತರವಾಗಿ ಭಾರತ ಸೆಹ್ವಾಗ್(34), ದಿನೇಶ್ ಮೊಂಗಿಯಾ(21) ಮತ್ತು ದಿನೇಶ್ ಕಾರ್ತಿಕ್( ಅಜೇಯ 31) ಉತ್ತಮ ಬ್ಯಾಟಿಂಗ್ ನಿಂದಾಗಿ ಪಂದ್ಯವನ್ನು ಗೆದ್ದಿತ್ತು. ದಿನೇಶ್ ಕಾರ್ತಿಕ್ ಅವರು ಪಂದ್ಯ ಪುರುಷೋತ್ತಮ ಪ್ರಶಸ್ತಿಗೆ ಭಾಜನರಾಗಿದ್ದರು.
