ಚೊಚ್ಚಲ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಚಾಂಪಿಯನ್ಸ್ ರಾಜಸ್ಥಾನ್‌ ರಾಯಲ್ಸ್‌ ತಂಡದ ನೂತನ ಹೆಡ್‌ ಕೋಚ್‌ ಆಗಿ ರಾಹುಲ್ ದ್ರಾವಿಡ್ ನೇಮಕಗೊಂಡಿದ್ದಾರೆ. ಐಪಿಎಲ್‌ 2025 ಟೂರ್ನಿ ಮೂಲಕ ದ್ರಾವಿಡ್ ಆರ್ಆರ್ ತಂಡದ ಕೋಚಿಂಗ್‌ ಕೆಲಸ ಶುರು ಮಾಡಲಿದ್ದಾರೆ. 2021ರಿಂದ 2024ರವರೆಗೆ ಟೀಮ್ ಇಂಡಿಯಾ ಮುಖ್ಯ ಕೋಚ್‌ ಆಗಿ ಸೇವೆ ಸಲ್ಲಿಸಿ, ಇಂಡಿಯನ್ ಕ್ರಿಕೆಟ್ ಟೀಮ್ 2024ರ ಐಸಿಸಿ ಟಿ20 ವಿಶ್ವಕಪ್‌ ಗೆಲ್ಲುವಂತೆ ಮಾಡಿ ಟೀಮ್ ಇಂಡಿಯಾ ಸೇವೆಯಿಂದ ದ್ರಾವಿಡ್ ಹೊರಬಂದರು.
ರಿಷಭ್‌ ಪಂತ್ ಸಾರ್ವಕಾಲಿಕ ಶ್ರೇಷ್ಠ ಟೆಸ್ಟ್ ಕ್ರಿಕಟಿಗರಲ್ಲಿ ಒಬ್ಬರು: ಸೌರವ್‌ ಗಂಗೂಲಿ!
ಹೀಗಾಗಿ ಯಶಸ್ಸಿನ ಉತ್ತುಂಗದಲ್ಲಿರುವ ಮುಖ್ಯ ಕೋಚ್‌ನ ಸೇವೆ ಪಡೆದುಕೊಳ್ಳಲು ರಾಜಸ್ಥಾನ್‌ ರಾಯಲ್ಸ್‌ ಫ್ರಾಂಚೈಸಿ ಬ್ಲಾಂಕ್ ಚೆಕ್‌ ನೀಡಲು ಮುಂದಾಗಿತ್ತು. ಆದರೆ ಬ್ಲಾಂಕ್ ಚೆಕ್‌ ಬೇಡವೆಂದು ರಾಹುಲ್ ದ್ರಾವಿಡ್ ನಿರಾಕರಿಸಿರುವುದು ತಡವಾಗಿ ಬೆಳಕಿಗೆ ಬಂದಿದೆ. ಅಂದಹಾಗೆ 2013ರ ಬಳಿಕ ಟೀಮ್ ಇಂಡಿಯಾ ಐಸಿಸಿ ಆಯೋಜಿತ ಟೂರ್ನಿಗಳಲ್ಲಿ ಟ್ರೋಫಿ ಗೆಲುವಿನ ಬರ ಎದುರಿಸಿತ್ತು. ಇದು ರಾಹುಲ್ ದ್ರಾವಿಡ್ ಕೋಚಿಂಗ್‌ ಅಡಿಯಲ್ಲಿ ಅಂತ್ಯಗೊಂಡಿತು.
ಭಾರತಕ್ಕೆ ಟಿ20 ವಿಶ್ವಕಪ್‌ ಗೆದ್ದುಕೊಟ್ಟ ಕೋಚ್‌ ತಂಡದ ಸೇವೆಯಿಂದ ಬಿಡುಗಡೆಯಾಗುತ್ತಿದ್ದಂತೆಯೇ ಹಲವು ಐಪಿಎಲ್‌ ಫ್ರಾಂಚೈಸಿಗಳು ಅವರ ಸೇವೆಯನ್ನು ಪಡೆದುಕೊಳ್ಳಲು ಮುಂದಾಗಿದ್ದವು. ಇದೇ ಕಾರಣಕ್ಕೆ ರಾಜಸ್ಥಾನ್‌ ರಾಯಲ್ಸ್‌ ಫ್ರಾಂಚೈಸಿ ರಾಹುಲ್ ಸೇವೆ ಸಂಪಾದಿಸಲು ಬ್ಲ್ಯಾಂಕ್‌ ಚೆಕ್‌ ನೀಡಿತ್ತು ಎಂದು ಕ್ರಿಕ್‌ಬಝ್‌ ಮಾಡಿರುವ ವರದಿ ಮೂಲಕ ತಿಳಿದು ಬಂದಿದೆ. ಬ್ಲಾಂಕ್ ಚೆಕ್‌ ನಿರಾಕರಿಸಿದ ರಾಹುಲ್, ಆರ್ಆರ್ ತಂಡದ ಹೆಡ್‌ ಕೋಚ್‌ ಕೆಲಸವನ್ನು ಸ್ವೀಕರಿಸಿದ್ದಾರೆ. ಅಂದಹಾಗೆ 2011ರಿಂದ 2015ರವರೆಗೆ ಆರ್ಆರ್ ತಂಡದ ಮೆಂಟರ್‌ ಮತ್ತು ಕ್ಯಾಪ್ಟನ್‌ ಆಗಿಯೂ ದ್ರಾವಿಡ್ ಸೇವೆ ಸಲ್ಲಿಸಿದ್ದರು. ಹೀಗಾಗಿ ಆರ್ಆರ್ ತಂಡದ ಮೇಲೆ ಅವರಿಗೆ ವಿಶೇಷ ಒಲವಿದೆ.
ಐಪಿಎಲ್‌ 2011 ಟೂರ್ನಿ ಸಲುವಾಗಿ ನಡೆದ ಆಟಗಾರರ ಹರಾಜಿನಲ್ಲಿ 2 ಕೋಟಿ ರೂ. ಮೂಲ ಬೆಲೆ ಹೊಂದಿದ್ದ ರಾಹುಲ್ ದ್ರಾವಿಡ್ ಅವರನ್ನು ಆರ್‌ಸಿಬಿ ಸೇರಿದಂತೆ ಬೇರೆ ಯಾವ ತಂಡಗಳೂ ಖರೀದಿಸುವ ಆಸಕ್ತಿ ತೋರಿರಲಿಲ್ಲ. ಇನ್ನೇನು ಅನ್‌ಸೋಲ್ಡ್‌ ಆಗುತ್ತಾರೆ ಎನ್ನುವ ಸಂದರ್ಭದಲ್ಲಿ ಆರ್ಆರ್ ತಂಡ 2.5 ಕೋಟಿ ರೂ. ನೀಡಿ ಖರೀದಿ ಮಾಡಿತ್ತು. ಜೊತೆಗೆ ಕ್ಯಾಪ್ಟನ್ಸಿ ಮತ್ತು ಮೆಂಟರ್‌ ಜವಾಬ್ದಾರಿ ನೀಡಿ ಗೌರವಿಸಿತ್ತು. ಇದೇ ಕಾರಣಕ್ಕೆ ಈಗ ಆರ್ಆರ್ ತಂಡ ಕೊಟ್ಟ ಆಫರ್‌ ಅನ್ನು ರಾಹುಲ್ ದ್ರಾವಿಡ್ ಸ್ವೀಕರಿಸಿದ್ದಾರೆ ಎನ್ನಲಾಗಿದೆ.
