ಬೆಂಗಳೂರು: ಫಾಸ್ಟ್ಟ್ಯಾಗ್ ನಿಯಮಗಳಲ್ಲಿ ಇಂದಿನಿಂದ ಹೊಸ ಬದಲಾವಣೆಗಳಾಗುತ್ತಿದ್ದು, ಟೋಲ್ ಪಾವತಿಗೆ ಪ್ರಕ್ರಿಯೆಯನ್ನು ಮತ್ತಷ್ಟು ಸರಳಗೊಳಿಸುವ ಹಾಗೂ ವಾಹನ ದಟ್ಟಣೆಯನ್ನು ತಗ್ಗಿಸಲುವ ನಿಟ್ಟಿನಲ್ಲಿ ಕೆವೈಸಿ ಕಡ್ಡಾಯ ಮಾಡಲಾಗಿದೆ. ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್ಪಿಸಿಐ) ಮಾರ್ಗಸೂಚಿ ಪ್ರಕಾರ,
ನಾಲ್ಕು ಚಕ್ರ ಹಾಗೂ ಅದಕ್ಕಿಂತ ಮೇಲ್ಪಟ್ಟ ಸಾಮರ್ಥ್ಯದ ಎಲ್ಲಾ ವಾಹನಗಳು ಕೆವೈಸಿ ಮಾಡಿಸುವುದು ಕಡ್ಡಾಯವಾಗಿದೆ. ಇಂದಿನಿಂದ (ಆಗಸ್ಟ್ 1)ಈ ಪ್ರಕ್ರಿಯೆ ಆರಂಭವಾಗಲಿದೆ. ಫಾಸ್ಟ್ಟ್ಯಾಗ್ ವಿತರಿಸುವ ಕಂಪನಿಗಳು ಈ ವರ್ಷ ಅಕ್ಟೋಬರ್ 31 ರೊಳಗೆ ತನ್ನ 3 ರಿಂದ 5 ವರ್ಷದ ಎಲ್ಲಾ ಗ್ರಾಹಕರಿಗೂ ಕೆವೈಸಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬೇಕು ಎಂದು ಗಡುವು ನೀಡಲಾಗಿದೆ.
ಪ್ರಮುಖ ಹೊಸ ನಿಯಮಗಳು ಏನು?
- ಐದು ವರ್ಷ ಅಥವಾ ಅದಕ್ಕಿಂತ ಹಳೆಯ ಫಾಸ್ಟ್ಟ್ಯಾಗ್ಗಳನ್ನು ಬದಲಾವಣೆ ಮಾಡಬೇಕು.
- ಮೂರು ವರ್ಷದ ಅಥವಾ ಅದಕ್ಕಿಂತ ಹಿಂದಿನ ಫಾಸ್ಟ್ಟ್ಯಾಗಳಿಗೆ ಕೆವೈಸಿ ಮಾಡಿಸಿ ನವೀಕರಿಸಬೇಕು.
- ವಾಹನದ ನೋಂದಣಿ ಸಂಖ್ಯೆ, ಚಸ್ಸಿ ಸಂಖ್ಯೆಯ ವಿವರವನ್ನು ಫಾಸ್ಟ್ಟ್ಯಾಗ್ಗೆ ಲಿಂಕ್ ಮಾಡಬೇಕು.
- ವಾಹನದ ಹಿಂಭಾಗ ಹಾಗೂ ಮುಂಭಾಗದ ಫೋಟೋವನ್ನು ಫಾಸ್ಟ್ಟ್ಯಾಗ್ಗೆ ಅಪ್ಲೋಡ್ ಮಾಡಬೇಕು.
- ಫಾಸ್ಟ್ಟ್ಯಾಗ್ಗೆ ಮೊಬೈಲ್ ನಂಬರ್ ಸೇರ್ಪಡೆ ಮಾಡಬೇಕು.
- ಹೊಸ ವಾಹನ ಖರೀದಿಸಿದ 90 ದಿನದ ಒಳಗೆ ನೋಂದಣಿ ಸಂಖ್ಯೆಯನ್ನು ನವೀಕರಿಸಬೇಕು.
- ಫಾಸ್ಟ್ಟ್ಯಾಗ್ ಪೂರೈಕೆ ಮಾಡುವ ಸಂಸ್ಥೆಗಳು ತಮ್ಮ ಡೇಟ್ಬೇಸ್ ಪರಿಶೀಲನೆ ಮಾಡಬೇಕು.
ಫಾಸ್ಟ್ಟ್ಯಾಗ್ ಕಂಪನಿಗಳು ಆದೇಶಗಳಿಗೆ ಬದ್ಧವಾಗಿರಬೇಕು
ಇಂದಿನಿಂದ (ಆಗಸ್ಟ್ 1) ಫಾಸ್ಟ್ಟ್ಯಾಗ್ ಕಂಪನಿಗಳು ಆದೇಶಗಳಿಗೆ ಬದ್ಧವಾಗಿರಬೇಕು. ಪ್ರಮುಖವಾಗಿ ಮೂರರಿಂದ ಐದು ವರ್ಷ ಫಾಸ್ಟ್ಟ್ಯಾಗ್ಗಳಿಗೆ ಕೆವೈಸಿ ಅಪ್ಡೇಟ್ ಮಾಡಬೇಕು. ಐದು ವರ್ಷಕ್ಕಿಂತ ಹಳೆ ಫಾಸ್ಟ್ಟ್ಯಾಗ್ ಇದ್ದರೆ ಅದನ್ನು ಸಂಪೂರ್ಣ ಬದಲಾಯಿಸಬೇಕು. ಈ ಕಾರ್ಯವನ್ನು ಅಕ್ಟೋಬರ್ 31 ರೊಳಗೆ ಪೂರ್ಣಗೊಳಿಸಲು ಕ್ರಮಕೈಗೊಳ್ಳಬೇಕು ಎಂದು ಕಂಪನಿಗಳಿಗೆ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ ಸೂಚಿಸಿದೆ. ಇತ್ತ ವಾಹನ ಮಾಲೀಕರು ಕೆವೈಸಿಯನ್ನು ಅಕ್ಟೋಬರ್ 31 ರೊಳಗೆ ಪೂರ್ಣಗೊಳಿಸಿಕೊಳ್ಳಬೇಕಿದೆ. ಇಲ್ಲವಾದರೆ ದಂಡ ಬೀಳುವ ಅಥವಾ ಫಾಸ್ಟ್ಟ್ಯಾಗ್ ನಿಷ್ಕ್ರಿಯವಾಗುವ ಸಾಧ್ಯತೆ ಇದೆ.
ಫಾಸ್ಟ್ಟ್ಯಾಗ್ ಕೆವೈಸಿ ಮಾಡಿಸಲು ಬೇಕಾಗುವ ದಾಖಲೆಗಳು?
- ಚಾಲನಾ ಪರವಾನಗಿ (ಡಿಎಲ್)
- ಮತದಾರರ ಗುರುತಿನ ಚೀಟಿ
- ಪ್ಯಾನ್ ಕಾರ್ಡ್
- ಆಧಾರ್ ಕಾರ್ಡ್
- ವಾಹನ ನೋಂದಣಿ ಪ್ರಮಾಣಪತ್ರ (ಆರ್ಸಿ)
ಟೋಲ್ ಶುಲ್ಕ ಹೆಚ್ಚಳ
ಟೋಲ್ ಶುಲ್ಕ ಪ್ರತಿ ವರ್ಷ ಹೆಚ್ಚಾಗುತ್ತದೆ. ಇದರಂತೆ ಏಪ್ರಿಲ್ 1ರಿಂದ ಪರಿಷ್ಕೃತ ಶುಲ್ಕ ಜಾರಿಯಾಗಬೇಕಿತ್ತು. ಈ ಬಾರಿ ಮೂರು ತಿಂಗಳು ತಡವಾಗಿ ಕಳೆದ ತಿಂಗಳು ಬಹುತೇಕ ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಟೋಲ್ ಶುಲ್ಕ ಹೆಚ್ಚಳ ಮಾಡಿ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್ಎಚ್ಎಐ) ಆದೇಶ ಮಾಡಿದೆ. ಜೂನ್ನಿಂದ ಎಲ್ಲಾ ಟೋಲ್ಗಳ ಶುಲ್ಕ ಶೇಕಡಾ 5 ರಷ್ಟು ಹೆಚ್ಚಳವಾಗಿದೆ.
