ಸಕ್ಕರೆ ಹೆಚ್ಚಾಗಿ ತಿಂದರೆ ಮಧುಮೇಹ ಬರಬಹುದು ಎನ್ನುವ ಭಯ ಪ್ರತಿಯೊಬ್ಬರಿಗೂ ಇರುತ್ತದೆ. ಏಕೆಂದರೆ ಈಗಿನ ಆಧುನಿಕ ಜೀವನಶೈಲಿ ಅದಕ್ಕೆ ಅನುವು ಮಾಡಿಕೊಡುತ್ತದೆ. ಹಾಗಾಗಿ ಜನರು ಇದಕ್ಕೆ ಪರ್ಯಾಯವಾಗಿ ಬೇರೆ ಯಾವುದಾದರೂ ಮಾರ್ಗ ಇದೆಯೇ ಎಂಬುದನ್ನು ಸದಾ ಹುಡುಕುತ್ತಲೇ ಇರುತ್ತಾರೆ. ನಮ್ಮನ್ನು ಕೇಳಿದರೆ ಹಲವಾರು ರಾಸಾಯನಿಕ ಪ್ರಕ್ರಿಯೆಗೆ ಒಳಪಡುವ ಸಕ್ಕರೆಯ ಬದಲಾಗಿ ಬೆಲ್ಲವನ್ನು ಉಪಯೋಗಿಸಬಹುದು ಅಥವಾ ತೆಂಗಿನ ಮರದ ಸಕ್ಕರೆಯನ್ನು ಬಳಕೆ ಮಾಡಬಹುದು ಎಂದು ಹೇಳಬಹುದು.
ತೆಂಗಿನಮರದಿಂದ ಸಕ್ಕರೆ ಮಾಡುತ್ತಾರೆಯೇ ಎಂಬ ಆಶ್ಚರ್ಯ ಈಗ ನಿಮಗೆ ಉಂಟಾಗಿದೆ ನಿಜ. ಈ ಲೇಖನದಲ್ಲಿ ನಿಮ್ಮ ಗೊಂದಲವನ್ನು ಪರಿಹಾರ ಮಾಡುವ ಜೊತೆಗೆ ಕೋಕನಟ್ ಶುಗರ್ ಅಥವಾ ತೆಂಗಿನಕಾಯಿ ಸಕ್ಕರೆ ಬಗ್ಗೆ ಸಂಪೂರ್ಣವಾದ ಮಾಹಿತಿಯನ್ನು ಒದಗಿಸಿ ಕೊಡಲಾಗಿದೆ.
ತೆಂಗಿನಕಾಯಿ ಸಕ್ಕರೆ ಹೇಗೆ ತಯಾರು ಮಾಡುತ್ತಾರೆ ಗೊತ್ತಾ?
ತೆಂಗಿನ ಮರದ ಹೂವಿನ ಗೊನೆಯಿಂದ ಸಕ್ಕರೆ ತಯಾರು ಮಾಡುವ ವಿಷಯ ನಮಗೆ ನಮಗೆ ಕೇಳಲು ಹೊಸದು ಎನಿಸಿದರೂ ಸಹ ಈ ಪ್ರಕ್ರಿಯೆ ಬಹಳ ವರ್ಷಗಳಿಂದ ನಡೆಯುತ್ತ ಬಂದಿದೆ.
ತೆಂಗಿನ ಹೂವು ಬಿಡುವ ಮುಂಭಾಗದ ಅರ್ಧ ಭಾಗವನ್ನು ಕತ್ತರಿಸಿ ಅದರಿಂದ ಬರುವ ರಸವನ್ನು ಒಂದು ಕಡೆ ಶೇಖರಣೆ ಮಾಡಿಕೊಂಡು ಅದನ್ನು ಸ್ವಲ್ಪ ಹೆಚ್ಚಿನ ತಾಪಮಾನದಲ್ಲಿ ಬಿಸಿ ಮಾಡಿದಾಗ ಅದರಲ್ಲಿರುವ ನೀರಿನಂಶ ಆವಿಯಾಗಿ ಹೋಗುತ್ತದೆ.
ಇದರ ನಂತರದಲ್ಲಿ ಉಳಿಯುವುದು ಕಂದುಬಣ್ಣದ ಸಕ್ಕರೆ. ನೋಡಲು ಇದು ನಾವು ಪ್ರತಿದಿನ ಬಳಕೆ ಮಾಡುವ ಸಕ್ಕರೆಯ ರೀತಿ ಕಾಣುತ್ತದೆ. ಆದರೆ ಇದರಲ್ಲಿನ ಒಂದು ವ್ಯತ್ಯಾಸ ಎಂದರೆ ಸಕ್ಕರೆ ಕಾಳುಗಳು ತುಂಬಾ ಸಣ್ಣ ಇರುತ್ತವೆ.
ನಾರ್ಮಲ್ ಶುಗರ್ ಮತ್ತು ತೆಂಗಿನಕಾಯಿ ಸಕ್ಕರೆ ನಡುವಿನ ವ್ಯತ್ಯಾಸಗಳು
ಮೇಲೆ ಹೇಳಿದಂತೆ ಕೇವಲ ಗಾತ್ರದಲ್ಲಿ ಕೋಕನಟ್ ಶುಗರ್ ಮತ್ತು ನಾವು ಪ್ರತಿದಿನ ಬಳಸುವ ಸಾಧಾರಣ ಸಕ್ಕರೆ ವ್ಯತ್ಯಾಸಗಳನ್ನು ಒಳಗೊಂಡಿದೆ ಎಂದು ಹೇಳುವುದಕ್ಕೆ ಬರುವುದಿಲ್ಲ.
ಆದರೆ ಗ್ಲೈಸೆಮಿಕ್ ಸೂಚ್ಯಂಕ ವನ್ನು ನೋಡುವುದಾದರೆ ತೆಂಗಿನಮರದಿಂದ ಉತ್ಪತ್ತಿಯಾಗುವ ಸಕ್ಕರೆಯಲ್ಲಿ ಕೇವಲ 35 ರಷ್ಟಿದೆ. ಆದರೆ ನಾವು ಪ್ರತಿ ದಿನ ಬಳಕೆ ಮಾಡುವ ಸಕ್ಕರೆಯಲ್ಲಿ ಗ್ಲೈಸೆಮಿಕ್ ಸೂಚ್ಯಂಕ ಸುಮಾರು 60 ರಿಂದ 65 ರಷ್ಟು ಕಂಡುಬರುತ್ತದೆ. ಆದರೆ ಜನರು ಇತ್ತೀಚಿನ ಆಧುನಿಕ ಜೀವನಶೈಲಿಯಲ್ಲಿ ಮಧುಮೇಹ ರಕ್ತದೊತ್ತಡ ಇತ್ಯಾದಿ ಸಮಸ್ಯೆಗಳನ್ನು ಎದುರಿಸುತ್ತಾರೆ.
ಹೀಗಿರುವ ಸಂದರ್ಭದಲ್ಲಿ ಕಾರ್ಬೋಹೈಡ್ರೇಟ್ ಅಂಶಗಳನ್ನು ಹೆಚ್ಚಾಗಿ ಹೊಂದಿರುವ ಆಹಾರಗಳಿಂದ ಸ್ವಲ್ಪ ದೂರ ಉಳಿಯಲು ಬಯಸುತ್ತಾರೆ. ತೆಂಗಿನ ಸಕ್ಕರೆಯಲ್ಲಿ ಸುಕ್ರೋಸ್ ಅಂಶ ಶೇಕಡ 70ರಿಂದ 75% ಮತ್ತು ಫ್ರಕ್ಟೋಸ್ ಅಂಶ ಶೇಕಡ ಹತ್ತರಿಂದ ಇಪ್ಪತ್ತು ಪ್ರತಿಶತ ಕಂಡುಬರುತ್ತದೆ.
ಪ್ರತಿದಿನ ನಾವು ಬಳಕೆಮಾಡುವ ಸಾಧಾರಣ ಸಕ್ಕರೆ ಗೆ ಹೋಲಿಸಿದರೆ ಇದು ತುಂಬಾ ಕಡಿಮೆ ಎಂದು ಹೇಳಬಹುದು. ನಮ್ಮ ದೇಹದಲ್ಲಿ ಫ್ರಕ್ಟೋಸ್ ಅಂಶ ಬಹಳ ಬೇಗನೆ ಕರಗುತ್ತದೆ ಮತ್ತು ಕೊಬ್ಬಿನ ಅಂಶದ ರೂಪದಲ್ಲಿ ಬದಲಾಗುತ್ತದೆ. ಅದು ಕೂಡ ತುಂಬಾ ಕಡಿಮೆ ಸಮಯದಲ್ಲಿ.
ತೆಂಗಿನಕಾಯಿ ಸಕ್ಕರೆ ಸೇವನೆಯಿಂದ ಉಂಟಾಗುವ ಆರೋಗ್ಯ ಪ್ರಯೋಜನಗಳು
ಮೊದಲೇ ಹೇಳಿದಂತೆ ತೆಂಗಿನಮರದಿಂದ ತಯಾರಾಗುವ ಸಕ್ಕರೆಯಿಂದ ನಾವು ಕಡಿಮೆ ಪ್ರಮಾಣದ ಗ್ಲೈಸೆಮಿಕ್ ಸೂಚ್ಯಂಕ ವನ್ನು ನಿರೀಕ್ಷೆ ಮಾಡಬಹುದು. ಇದರಿಂದ ಈಗಾಗಲೇ ಮಧುಮೇಹ ಹೊಂದಿದ ಜನರಿಗೆ ದೇಹದಲ್ಲಿ ಇನ್ಸುಲಿನ್ ಅಂಶ ಹೆಚ್ಚಾಗಿ ಸಿಗುವಂತಾಗಿ ಗ್ಲೋಕೋಸ್ ಅಂಶದ ಹೀರುವಿಕೆ ನಿಯಂತ್ರಣಕ್ಕೆ ಬರುತ್ತದೆ. ಯಾವುದೇ ಜನರಿಗೆ ಮಧುಮೇಹಕ್ಕೆ ಮುಂಚೆ ಅಂದರೆ ಮಧುಮೇಹ ಸಮಸ್ಯೆ ಇಲ್ಲದಿದ್ದಾಗ ತೆಂಗಿನ ಮರದ ಸಕ್ಕರೆಯನ್ನು ಸೇವನೆ ಮಾಡಿದರೆ ದೇಹದಲ್ಲಿ ಸೇವನೆ ಮಾಡುವ ಇನ್ನಿತರ ಆಹಾರ ಪದಾರ್ಥಗಳಲ್ಲಿ ಕಂಡುಬರುವ ಪೌಷ್ಟಿಕಾಂಶಗಳನ್ನು ಅಚ್ಚುಕಟ್ಟಾಗಿ ಹೀರಿಕೊಳ್ಳಲು ಅನುಕೂಲವಾಗುತ್ತದೆ.
ಪ್ರತಿದಿನ ಒಂದರಿಂದ 2 ಟೀ ಚಮಚ ಈ ಸಕ್ಕರೆಯನ್ನು ಯಾವುದಾದರೂ ಒಂದು ರೂಪದಲ್ಲಿ ಸೇವನೆ ಮಾಡುವುದರಿಂದ ದೇಹಕ್ಕೆ ಅಗತ್ಯವಾಗಿ ಬೇಕಾದ ಆಂಟಿಆಕ್ಸಿಡೆಂಟ್ ಅಂಶಗಳು ಕಬ್ಬಿಣದಂಶ ಕ್ಯಾಲ್ಸಿಯಂ ಅಂಶ ಮತ್ತು ಪೊಟ್ಯಾಷಿಯಂ ಅಂಶ ದಿನದ ಅಗತ್ಯತೆಗೆ ತಕ್ಕಂತೆ ಸಿಗುತ್ತಾ ಹೋಗುತ್ತದೆ. ಇನ್ನೊಂದು ಪ್ರಮುಖ ವಿಚಾರ ಎಂದರೆ ತೆಂಗಿನ ಮರದಿಂದ ಸಕ್ಕರೆ ತಯಾರು ಮಾಡಲು ಯಾವುದೇ ರಾಸಾಯನಿಕ ಪ್ರಕ್ರಿಯೆಗಳನ್ನು ಬಳಕೆ ಮಾಡುವುದಿಲ್ಲ. ಇದರಿಂದ ಇದು ಸಂಪೂರ್ಣವಾಗಿ ನೈಸರ್ಗಿಕ ಉತ್ಪನ್ನ ಎಂದು ಗುರುತಿಸಿಕೊಳ್ಳುತ್ತದೆ. ಯಾವುದೇ ಬಗೆಯ ರಿಫೈನಿಂಗ್ ಪ್ರಕ್ರಿಯೆ ಕೂಡ ಇದರಲ್ಲಿ ಇರುವುದಿಲ್ಲ.
ನಮ್ಮ ದೇಹದಲ್ಲಿ ಆಗಾಗ ವ್ಯತ್ಯಾಸವಾಗುವ ಸಕ್ಕರೆ ಅಂಶ ಮತ್ತು ಎಲೆಕ್ಟ್ರೋಲೈಟ್ ಅಂಶಗಳ ಸಮತೋಲನವನ್ನು ಕಾಯ್ದುಕೊಳ್ಳುವ ಕೆಲಸವನ್ನು ಕೋಕನೆಟ್ ಶುಗರ್ ಮಾಡುತ್ತದೆ ಎಂದು ಹೇಳಬಹುದು. ಬಿಳಿ ಬಣ್ಣದ ಸಕ್ಕರೆಗೆ ಹೋಲಿಸಿದರೆ ಕೋಕನಟ್ ಶುಗರ್ ತನ್ನಲ್ಲಿ ಶೇಕಡ 400% ಪೊಟಾಶಿಯಮ್ ಅಂಶವನ್ನು ಹೊಂದಿದೆ. ಇದು ದೇಹದಲ್ಲಿ ನೀರಿನ ಅಂಶದ ಸಮತೋಲನವನ್ನು ಕಾಯ್ದುಕೊಳ್ಳಲು ನೆರವಾಗುತ್ತದೆ.
