ಚಿತ್ರರಂಗದಲ್ಲಿ ಅವಕಾಶಕ್ಕಾಗಿ, ಗೆಲುವಿಗಾಗಿ ಹಾತೊರೆಯುವವರೇ ಹೆಚ್ಚು. ಅಂತಹ ಆಕರ್ಷಣೆ ಈ ರಂಗಕ್ಕಿದೆ. ಹೀಗಿದ್ದರೂ ಇಲ್ಲಿ ಯಶಸ್ಸು ಸಿಕ್ಕಿಯೂ ಈ ಕ್ಷೇತ್ರ ಬಿಟ್ಟು ಯುಪಿಎಸ್ಸಿ ಸಿಎಸ್ಇ ಪರೀಕ್ಷೆ ಬರೆದು.. ಮೊದಲ ಪ್ರಯತ್ನದಲ್ಲೇ ಐಪಿಎಸ್ ಆದ ಮಹಿಳಾ ಮಣಿಯ ಸಕ್ಸಸ್ ಸ್ಟೋರಿ ಇದು.
ಅವರೇ 2010 ರ ಬ್ಯಾಚ್ನ ಐಪಿಎಸ್ ಅಧಿಕಾರಿ ಸಿಮಲಾ ಪ್ರಸಾದ್. ಹೆಸರಾಂತ ಐಎಎಸ್ ಅಧಿಕಾರಿ ಭಾಗೀರಥ್ ಪ್ರಸಾದ್ ಮತ್ತು ಪ್ರಸಿದ್ಧ ಲೇಖಕಿ ಮೆಹರುನ್ನಿಸಾ ಪರ್ವೇಜ್ ದಂಪತಿಗೆ ಜನಿಸಿದ ಸಿಮಲಾ ಅವರ ಆರಂಭಿಕ ಒಲವು ಪ್ರದರ್ಶನ ಕಲೆಗಳತ್ತ, ವಿಶೇಷವಾಗಿ ನಟನೆ ಮತ್ತು ನೃತ್ಯದತ್ತ ವಾಲಿತ್ತು.
ಮಧ್ಯ ಪ್ರದೇಶ ಮೂಲದ ಸಿಮಲಾ ರವರು ತಮ್ಮ ಪ್ರಾಥಮಿಕ ಶಿಕ್ಷಣವನ್ನು ಭೂಪಾಲ್ನ ಸೇಂಟ್ ಜೋಸೆಫ್ ಸ್ಕೂಲ್ನಲ್ಲಿ ಪಡೆದರು. ನಂತರ ಪದವಿ ಶಿಕ್ಷಣವನ್ನು ಕಾಮರ್ಸ್ನಲ್ಲಿ ಪಡೆದಿದ್ದರು. ಸ್ನಾತಕೋತ್ತರ ಪದವಿಯಲ್ಲಿ ಸಮಾಜಶಾಸ್ತ್ರ ವಿಷಯವನ್ನು ಭೂಪಾಲ್ನಲ್ಲಿಯ ಬರ್ಕಾತುಲ್ಲಾಹ್ ವಿಶ್ವವಿದ್ಯಾಲಯದಲ್ಲಿ ಮುಗಿಸಿದರು. ತಂದೆ ಐಎಎಸ್ ಅಧಿಕಾರಿಯಾಗಿದ್ದರು ಸಹ ನಾಗರೀಕ ಸೇವೆಯ ಮಾರ್ಗವು ಅವರನ್ನು ಆಕರ್ಷಿಸಿರಲಿಲ್ಲ.
ಸ್ನಾತಕೋತ್ತರ ಪದವಿ ಮುಗಿಸಿದ ನಂತರ ನಟನೆಯತ್ತ ವಾಲಿದ ಅವರು ‘ಆಲಿಫ್’ ಮತ್ತು ‘ನಕ್ಕಾಶ್’ ಸಿನಿಮಾಗಳ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ‘ಆಲಿಫ್’ನಲ್ಲಿ ಶಮ್ಮಿಯ ಪಾತ್ರವು ಅವರಿಗೆ ಮೆಚ್ಚುಗೆ ನೀಡಿತು. ನಕ್ಕಾಶ್ನಲ್ಲಿ ಪತ್ರಕರ್ತೆಯಾಗಿ ಅವರ ಪಾತ್ರವು ಚಿತ್ರರಂಗದಲ್ಲಿ ಅವರ ಸ್ಥಾನವನ್ನು ಮತ್ತಷ್ಟು ಗಟ್ಟಿಗೊಳಿಸಿತು.
ಎರಡು ಚಿತ್ರಗಳಲ್ಲಿ ನಟಿಸಿದ ನಂತರ ಮಧ್ಯಪ್ರದೇಶ ಲೋಕಸೇವಾ ಆಯೋಗದ ಪರೀಕ್ಷೆಯನ್ನು ಬರೆದರು. ಆಶ್ಚರ್ಯಕರವಾಗಿ ಈ ಪರೀಕ್ಷೆಯಲ್ಲಿ ಪಾಸಾಗುವ ಜತೆಗೆ ಡಿಎಸ್ಪಿ ಹುದ್ದೆಗೇರಿದರು. ಈ ಸಾಧನೆಯಿಂದ ಸ್ಫೂರ್ತಿಗೊಂಡ ಅವರು ನಂತರ ದೇಶದ ನಾಗರಿಕ ಸೇವೆಗಳತ್ತ ತಮ್ಮ ದೃಷ್ಟಿ ನೆಟ್ಟರು.
ಸಾಂಪ್ರದಾಯಿಕ ಮಾರ್ಗವನ್ನು ಬಳಸದೇ, ಅವರು ತರಬೇತಿ ಸಂಸ್ಥೆಗಳನ್ನು ಸಹ ಬದಿಗಿಟ್ಟು, ಬದಲಿಗೆ ತಮ್ಮ ಕಠಿಣ ಸ್ವಯಂ- ಅಧ್ಯಯನವನ್ನು ಅವಲಂಭಿಸಿದರು. ಸಿಮಲಾ ಯುಪಿಎಸ್ಸಿ ಸಿಎಸ್ಇ ಪರೀಕ್ಷೆಗೆ ಯಾವುದೇ ಕೋಚಿಂಗ್ ಪಡೆಯದೇ ತಮ್ಮ ಮೊದಲ ಪ್ರಯತ್ನದಲ್ಲಿಯೇ ಈ ಪರೀಕ್ಷೆಯಲ್ಲಿಯೂ ಜಯಗಳಿಸಿದರು. ಭಾರತೀಯ ಪೊಲೀಸ್ ಸೇವೆಗಳಲ್ಲಿ ಸೇವೆ ಸಲ್ಲಿಸಲು ಆಯ್ಕೆಯಾದ ಅವರು – ಪ್ರಸ್ತುತ ಮಧ್ಯಪ್ರದೇಶದ ಬೆತುಲ್ ಜಿಲ್ಲೆಯಲ್ಲಿ ಎಸ್ಪಿ ಹುದ್ದೆಯನ್ನು ಅಲಂಕರಿಸಿದ್ದಾರೆ.
ಇದಿಷ್ಟು ಸಿಮಲಾ ರವರ ಐಪಿಎಸ್ ಸಕ್ಸಸ್ ಜರ್ನಿ ಆಗಿದ್ದು, ಆರಂಭಿಕ ಗುರಿಯೇ ಇಲ್ಲದೆ ಆಶ್ವರ್ಯಕರವಾಗಿ ನಟನೆಯಿಂದ ಐಪಿಎಸ್ ಸೇವೆ ಕಡೆಗೆ ಪ್ರಯಾಣ ಬೆಳೆಸಿದ ಇವರ ಸಾಧನೆಯ ಹಾದಿ ನಾಗರಿಕ ಸೇವೆಯ ಕ್ಷೇತ್ರವನ್ನು ಪ್ರವೇಶಿಸಲು ಬಯಸುವವರಿಗೆ ಭರವಸೆ ಮತ್ತು ಸ್ಫೂರ್ತಿಯ ದಾರಿದೀಪಗಳಾಗುವಲ್ಲಿ ಯಾವುದೇ ಸಂಶಯವಿಲ್ಲ ಎನ್ನಲಾಗಿದೆ.