ಬೆಂಗಳೂರು: ಪಾಕಿಸ್ತಾನ ಕ್ರಿಕೆಟ್ ತಂಡ 2024ರಲ್ಲಿ ಅಮೆರಿಕ ಮತ್ತು ವೆಸ್ಟ್‌ ಇಂಡೀಸ್‌ನ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ಟ್ರೋಫಿ ಗೆಲ್ಲಲಿದೆ ಎಂದು ಇಂಗ್ಲೆಂಡ್‌ನ ಮಾಜಿ ನಾಯಕ ಮೈಕಲ್‌ ವಾನ್‌ ಭವಿಷ್ಯ ನುಡಿದಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಪಾಕಿಸ್ತಾನ ಕ್ರಿಕೆಟ್ ತಂಡದ ಬಗ್ಗೆ ಬಹಳಾ ಆಸಕ್ತಿ ವಹಿಸುತ್ತಿರುವ ಮೈಕಲ್‌ ವಾನ್‌, ತಂಡದ ಬಗ್ಗೆ ಹಲವು ಬಾರಿ ಭವಿಷ್ಯ ನುಡಿದ್ದಾರೆ.
ಪಾಕ್‌ ತಂಡ ಇದೀಗ ಟೆಸ್ಟ್ ಸರಣಿ ಸಲುವಾಗಿ ಆಸ್ಟ್ರೇಲಿಯಾ ಪ್ರವಾಸಕ್ಕೆ ತಯಾರಿ ನಡೆಸುತ್ತಿದೆ. 2023ರ ವಿಶ್ವಕಪ್‌ ಬಳಿಕ ಎಲ್ಲಾ ಮಾದರಿಯ ಕ್ರಿಕೆಟ್‌ನ ಕ್ಯಾಪ್ಟನ್ಸಿ ಬಿಟ್ಟು ಕೇವಲ ಬ್ಯಾಟಿಂಗ್‌ ಕಡೆಗಷ್ಟೇ ಗಮನ ನೀಡಿರುವ ಬಾಬರ್‌ ಆಝಮ್‌, ಗುರುವಾರ ಟೆಸ್ಟ್ ಕ್ರಿಕೆಟ್ ಸಲುವಾಗಿ ಅಭ್ಯಾಸ ನಡೆಸುತ್ತಿರುವ ಫೋಟೊ ಹಂಚಿಕೊಂಡಿದ್ದಾರೆ. ಈ ಪೋಟೊಗೂ ಕಾಮೆಂಟ್‌ ಮಾಡಿರುವ ಮೈಕಲ್‌ ವಾನ್‌, ಆಸೀಸ್‌ ನೆಲದಲ್ಲಿ ಬಾಬರ್‌ ರನ್‌ ಹೊಳೆ ಹರಿಸುತ್ತಾರೆಂದು ಅಭಿಪ್ರಾಯ ಪಟ್ಟಿದ್ದಾರೆ.
ಕ್ಲಬ್‌ ಪ್ರೈಯರ್‌ ಫೈರ್‌ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಆಸ್ಟ್ರೇಲಿಯಾ ದಿಗ್ಗಜ ಆಡಮ್‌ ಗಿಲ್‌ಕ್ರಿಸ್ಟ್‌ ಜೊತೆಗೆ ಮಾತನಾಡುವ ವೇಳೆ ಮೈಕಲ್‌ ವಾನ್‌, ಪಾಕಿಸ್ತಾನ ತಂಡ ವಿಶ್ವಕಪ್‌ ಗೆಲ್ಲಲಲಿದೆ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲದೆ ಪಾಕಿಸ್ತಾನ ತಂಡದಲ್ಲಿ ಇರುವ ಕೆಲ ಸಮಸ್ಯೆಗಳ ಕಡೆಗೂ ಬೆಳಕು ಚೆಲ್ಲಿದ್ದಾರೆ.
ಒಡಿಐ ವಿಶ್ವಕಪ್‌ ಬಳಿಕ ಬಾಬರ್‌ ಆಝಮ್‌ ಕ್ಯಾಪ್ಟನ್ಸಿ ಬಿಟ್ಟಿದ್ದಾರೆ. ಅಷ್ಟೇ ಅಲ್ಲದೆ ಮಾಜಿ ನಾಯಕ ಮೊಹಮ್ಮದ್‌ ಹಫೀಝ್‌ ನೂತನ ಕ್ರಿಕೆಟ್ ಡೈರೆಕ್ಟರ್‌ ಹಾಗೂ ಮುಖ್ಯ ಕೋಚ್‌ ಆಗಿ ನೇಮಕಗೊಂಡಿದ್ದಾರೆ. ಮಾಜಿ ವೇಗದ ಬೌಲರ್‌ ವಹಾಬ್‌ ರಿಯಾಝ್‌ ತಂಡದ ನೂತನ ಚೀಫ್ ಸೆಲೆಕ್ಟರ್‌ ಆಗಿ ಜವಾಬ್ದಾರಿ ಪಡೆದಿದ್ದಾರೆ. ಇದರ ಬೆನ್ನಲ್ಲೇ ಟ್ವೀಟ್‌ ಮಾಡಿದ ವಾನ್‌, “ಪಾಕಿಸ್ತಾನ ತಂಡ ಟಿ20 ವಿಶ್ವಕಪ್‌ ಗೆಲ್ಲಲಿದೆ,” ಎಂದು ಬರೆದುಕೊಂಡಿದ್ದಾರೆ.
