ಮಹಾರಾಷ್ಟ್ರ: ತನ್ನ ಲಿವ್ – ಇನ್ ಸಂಗಾತಿಯನ್ನು ಕೊಲೆ ಮಾಡಿ ಸೂಟ್ ಕೇಸ್‌ನಲ್ಲಿ ಹಾಕಿ ಪರಾರಿಯಾಗಿದ್ದ ಆರೋಪಿಯನ್ನು ಮುಂಬೈ ಕ್ರೈಂ ಬ್ರಾಂಚ್ ಪೊಲೀಸರು ಬಂಧಿಸಿದ್ದಾರೆ. 21 ವರ್ಷ ವಯಸ್ಸಿನ ಆರೋಪಿ ತನ್ನ ಪ್ರಿಯತಮೆಯನ್ನು ಕೊಂದು ಆಕೆಯ ದೇಹವನ್ನು ಸೂಟ್ ಕೇಸ್‌ನಲ್ಲಿ ತುಂಬಿ ಮುಂಬೈನ ಕುರ್ಲಾ ಪ್ರದೇಶದಲ್ಲಿ ಇರುವ ಸಿಎಸ್‌ಟಿ – ಎಲ್‌ಬಿಸ್ ಮಾರ್ಗ್‌ನ ನಿರ್ಮಾಣ ಹಂತದ ಕಟ್ಟಡ ಪ್ರದೇಶದಲ್ಲಿ ಎಸೆದು ಹೋಗಿದ್ದ.
ಕೊಲೆ ಮಾಡಿದ ಬಳಿಕ ಒಡಿಶಾದ ತನ್ನ ಹುಟ್ಟೂರಿಗೆ ಪರಾರಿಯಾಗುವ ಪ್ರಯತ್ನದಲ್ಲಿದ್ದ ಆರೋಪಿ ಅಕ್ಸರ್ ಮನೋಜ್ ಬರ್ಲಾನನ್ನು ಪೊಲೀಸರು ಥಾಣೆ ರೈಲು ನಿಲ್ದಾಣದಲ್ಲಿ ಬಂಧನ ಮಾಡಿದ್ದಾರೆ. ಮೃತ ಮಹಿಳೆಯನ್ನು 25 ವರ್ಷ ವಯಸ್ಸಿನ ಪ್ರತಿಮಾ ಕಿಸ್ಪಟ್ಟಾ ಎಂದು ಗುರ್ತಿಸಲಾಗಿದೆ. ಈಕೆ ಕೂಡಾ ಒಡಿಶಾ ರಾಜ್ಯದವರು ಎಂಬ ಮಾಹಿತಿ ಪೊಲೀಸರಿಗೆ ಲಭ್ಯವಾಗಿದೆ.
ನಿರ್ಮಾಣ ಹಂತದ ಕಟ್ಟಡದಲ್ಲಿ ಮಹಿಳೆಯ ಮೃತ ದೇಹ ಸೂಟ್ ಕೇಸ್ ಒಂದರಲ್ಲಿ ಪತ್ತೆಯಾದ ಕೂಡಲೇ ಪೊಲೀಸರು ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ಮಹಿಳೆಯ ಫೋಟೋ ರವಾನಿಸಿದರು. ಆದಷ್ಟು ಬೇಗ ಮಹಿಳೆಯ ಗುರುತು ಪತ್ತೆ ಹಚ್ಚೋದು ಪೊಲೀಸರಿಗೆ ಅತ್ಯಗತ್ಯವಾಗಿತ್ತು. ಈ ವೇಳೆ ಮಹಿಳೆಯ ಸಹೋದರಿ ಪ್ರತಿಮಾ ಅವರ ಮೃತ ದೇಹವನ್ನು ಗುರ್ತಿಸಿದರು. ಕೂಡಲೇ ಅವರು ಪೊಲೀಸರ ಗಮನಕ್ಕೆ ತಂದರು ಎಂದು ಮುಂಬೈ ಕ್ರೈಂ ವಿಭಾಗದ ಡಿಸಿಪಿ ರಾಜ್ ತಿಲಕ್ ರೋಷನ್ ಅವರು ಮಾಹಿತಿ ನೀಡಿದ್ದಾರೆ.
ಕೂಡಲೇ ಕೊಲೆ ಪ್ರಕರಣದ ತನಿಖೆ ತೀವ್ರಗೊಳಿಸಿದ ಪೊಲೀಸರು, ಪ್ರತಿಮಾ ಅವರು ಹೌಸ್ ಕೀಪಿಂಗ್ ಕಾರ್ಮಿಕರನ್ನು ನಿಯೋಜಿಸುವ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದರು ಎಂದು ಮಾಹಿತಿ ಸಂಗ್ರಹಿಸಿದರು. ಆದರೆ, ಕಳೆದ 2 ತಿಂಗಳ ಹಿಂದೆ ಪ್ರತಿಮಾ ಕೆಲಸ ಕಳೆದುಕೊಂಡಿದ್ದರು. ಇನ್ನು ಪ್ರತಿಮಾ ಅವರು ತಮ್ಮ ಗೆಳೆಯ ಬರ್ಲಾ ಜೊತೆ ಲಿವ್ ಇನ್ ರಿಲೇಷನ್‌ಶಿಪ್‌ನಲ್ಲಿ ಇದ್ದರು, ಜೊತೆಗೆ ಆತನೊಂದಿಗೇ ವಾಸಿಸುತ್ತಿದ್ದರು ಎಂಬ ವಿಚಾರ ಗೊತ್ತಾಯ್ತು.
ಆರೋಪಿ ಬರ್ಲಾ ಧಾರಾವಿಯ ಸಿಹಿ ತಿನಿಸು ಮಾರಾಟ ಮಳಿಗೆಯಲ್ಲಿ ಕೆಲಸ ಮಾಡುತ್ತಿದ್ದ. ಈತನ ಮಾಹಿತಿ ಕಲೆ ಹಾಕಿದ ಪೊಲೀಸರು, ಕೂಡಲೇ ಆರೋಪಿ ನೆಲೆಸಿದ್ದ ಮನೆಗೆ ತೆರಳಿದರು. ಆದರೆ, ಆರೋಪಿ ಮನೆಯಲ್ಲಿ ಇರಲಿಲ್ಲ. ಅದಾಗಲೇ ಆತ ನಾಪತ್ತೆಯಾಗಿದ್ದ. ಹೀಗಾಗಿ, ಘಟನಾ ಸ್ಥಳದ ಸಿಸಿಟಿವಿ ಹಾಗೂ ಆರೋಪಿಯ ಮೊಬೈಲ್ ಫೋನ್ ಟ್ರ್ಯಾಕ್ ಮಾಡಿದ ಪೊಲೀಸರಿಗೆ ಥಾಣೆ ರೈಲು ನಿಲ್ದಾಣದಲ್ಲಿ ಆರೋಪಿ ರೈಲಿಗಾಗಿ ಕಾಯುತ್ತಿದ್ದಾನೆ ಎಂಬ ಮಾಹಿತಿ ಸಿಕ್ಕಿತು. ಕೂಡಲೇ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಆರೋಪಿ ಬರ್ಲಾ ರೈಲು ಹತ್ತುವ ಮುನ್ನವೇ ಸೆರೆ ಹಿಡಿದಿದ್ದಾರೆ. ಕೋವಿಡ್ ಲಾಕ್‌ಡೌನ್ ವೇಳೆ ಮುಂಬೈನಿಂದ ಒಡಿಶಾಗೆ ವಾಪಸ್ ಆಗುವ ವೇಳೆ ಪ್ರತಿಮಾ ಹಾಗೂ ಬರ್ಲಾ ಗೆಳೆತನವಾಗಿತ್ತು. ಕಳೆದ ಜುಲೈನಲ್ಲಿ ಇಬ್ಬರೂ ಮುಂಬೈಗೆ ವಾಪಸ್ ಆಗಿದ್ದರು. ಧಾರಾವಿಯ ಕೊಳಚೆ ಪ್ರದೇಶದಲ್ಲಿ ಇಬ್ಬರೂ ಒಂದೇ ಮನೆಯಲ್ಲಿ ವಾಸವಾಗಿದ್ದರು.
ಈ ನಡುವೆ ಆರೋಪಿ ಬರ್ಲಾಗೆ ತನ್ನ ಗೆಳತಿ ಪ್ರತಿಮಾ ಮೇಲೆ ಅನುಮಾನ ಶುರುವಾಗಿತ್ತು. ಆಕೆ ಬೇರೊಬ್ಬನ ಜೊತೆ ಸಂಬಂಧ ಹೊಂದಿರಬಹುದು ಎಂದು ಆತ ಶಂಕಿಸುತ್ತಿದ್ದ. ಇದೇ ವಿಚಾರಕ್ಕೆ ಇಬ್ಬರ ನಡುವೆ ಜಗಳ ಆಗುತ್ತಿತ್ತು. ಕಳೆದ ಭಾನುವಾರ ಕೂಡ ಇವರಿಬ್ಬರೂ ಇದೇ ವಿಚಾರಕ್ಕೆ ಜಗಳ ಆಡಿದ್ದರು. ಈ ವೇಳೆ ಜಗಳ ತಾರಕಕ್ಕೇರಿ ಆರೋಪಿ ಬರ್ಲಾ ತನ್ನ ಲಿವ್ ಇನ್ ಸಂಗಾತಿ ಪ್ರತಿಮಾಳ ಕುತ್ತಿಗೆ ಹಿಸುಕಿ ಕೊಲೆ ಮಾಡಿದ್ದ.
ಕೊಲೆ ಮಾಡಿದ ಬಳಿಕ ಪ್ರತಿಮಾ ಮೃತ ದೇಹವನ್ನು ಸೂಟ್ ಕೇಸ್ ಒಂದರಲ್ಲಿ ತುಂಬಿದ ಬರ್ಲಾ, ಬಳಿಕ ಆಟೋ ರಿಕ್ಷಾದಲ್ಲಿ ಸಿಎಸ್‌ಟಿ – ಎಲ್‌ಬಿಎಸ್ ಮಾರ್ಗ್‌ಗೆ ತೆರಳಿದ್ದ. ಅಲ್ಲಿನ ನಿರ್ಮಾಣ ಹಂತದ ಕಟ್ಟಡದಲ್ಲಿ ಸೂಟ್ ಕೇಸ್ ಎಸೆದ ಬಳಿಕ ಮನೆಗೆ ವಾಸ್ ಆಗಿದ್ದ. ನಿರ್ಮಾಣ ಹಂತದ ಕಟ್ಟಡದಲ್ಲಿ ಎಸೆಯುವ ಮುನ್ನ ಯಾವುದಾದ್ರೂ ರೈಲಿನಲ್ಲಿ ಶವದ ಸೂಟ್ ಕೇಸ್ ಇರಿಸುವ ಕುರಿತಾಗಿ ಆರೋಪಿ ಪ್ಲಾನ್ ಮಾಡಿದ್ದ. ಆದರೆ ಧೈರ್ಯ ಸಾಕಾಗಲಿಲ್ಲ ಎಂದು ಪೊಲೀಸ್ ವಿಚಾರಣೆ ವೇಳೆ ಹೇಳಿದ್ದಾನೆ.
