ಜೋಹಾನ್ಸ್‌ಬರ್ಗ್‌: ಶತಕ ವಂಚಿತ ನಾಯಕ ಡೀನ್‌ ಎಲ್ಗರ್‌ ಅವರ ಅತ್ಯುತ್ತಮ ಆಟದಿಂದ ಭಾರತ ವಿರುದ್ಧ ನಡೆದ ಎರಡನೇ ಟೆಸ್ಟ್‌ ಕ್ರಿಕೆಟ್‌ ಪಂದ್ಯವನ್ನು ದಕ್ಷಿಣ ಆಫ್ರಿಕಾ 7 ವಿಕೆಟ್‌ಗಳಿಂದ ಭರ್ಜರಿಯಾಗಿ ಗೆದ್ದುಕೊಂಡಿದೆ. ಗೆಲ್ಲಲು 240 ರನ್‌ಗಳ ಗುರಿಯನ್ನು ಪಡೆದ ದಕ್ಷಿಣ ಆಫ್ರಿಕಾ 67.4 ಓವರ್‌ಗಳಲ್ಲಿ 3 ವಿಕೆಟ್‌ ನಷ್ಟಕ್ಕೆ 243 ರನ್‌ ಹೊಡೆದು ಜಯಗಳಿಸಿತು. ಈ ಮೂಲಕ ಮೂರು ಪಂದ್ಯಗಳ ಸರಣಿಯಲ್ಲಿ ಎರಡೂ ತಂಡಗಳು 1-1 ಸಮಬಲ ಸಾಧಿಸಿವೆ.
4 ದಿನದಾಟದ ಬಹುತೇಕ ಅರ್ಧದಿನ ಮಳೆಗೆ ಬಲಿಯಾಗಿತ್ತು. 34 ಓವರ್‌ಗಳ ಆಟ ನಡೆಸಲು ತೀರ್ಮಾನಿಸಲಾಗಿತ್ತು. ಮೂರನೇ ದಿನದಾಟದ ಅಂತ್ಯಕ್ಕೆ 2 ವಿಕೆಟ್‌ ನಷ್ಟಕ್ಕೆ 118 ರನ್‌ಗಳಿಸಿದ್ದ ದಕ್ಷಿಣ ಆಫ್ರಿಕಾ ಇಂದು 1 ವಿಕೆಟ್‌ ಕಳೆದುಕೊಂಡು ಗುರಿಯನ್ನು ಮುಟ್ಟಿತು. 11 ರನ್‌ ಗಳಿಸಿದ್ದ ರಾಸ್ಸಿ ವ್ಯಾನ್ ಡೆರ್ ಡಸ್ಸೆನ್ 40 ರನ್‌( 92 ಎಸೆತ, 5 ಬೌಂಡರಿ) ಹೊಡೆದು ಔಟಾದರು.
ನಿನ್ನೆ 46 ರನ್‌ಗಳಿಸಿದ್ದ ನಾಯಕ ಡೀನ್‌ ಎಲ್ಗರ್‌ ಔಟಾಗದೇ 96 ರನ್‌(188 ಎಸೆತ,10 ಬೌಂಡರಿ) ಹೊಡೆದರೆ ತೆಂಬ ಬವುಮ ಔಟಾಗದೇ 23 ರನ್‌(61 ಎಸೆತ, 3 ಬೌಂಡರಿ) ಹೊಡೆದರು. ಇವರಿಬ್ಬರು ಮುರಿಯದ ಮೂರನೇ ವಿಕೆಟಿಗೆ 83 ಎಸೆತಗಳಲ್ಲಿ 68 ರನ್‌ ಜೊತೆಯಾಟವಾಡಿ ತಂಡಕ್ಕೆ ಗೆಲುವು ತಂದುಕೊಟ್ಟರು.