ತುಂಬಾ ಹಿಂದಿನಿಂದ ನಮ್ಮ ಹಿರಿಯರು ಅನುಸರಿಸಿಕೊಂಡು ಬರುತ್ತಿರುವ ಒಂದು ಮನೆ ಮದ್ದು ಎಂದರೆ ಅದು ನೀಲಗಿರಿ ಎಲೆಗಳ ಮನೆ ಮದ್ದು ಎಂದು ಹೇಳಬಹುದು. ಶೀತದಿಂದ ಉಂಟಾದ ನೆಗಡಿ, ಕಫ, ಎದೆ ಕಟ್ಟಿಕೊಳ್ಳುವಿಕೆ, ಮೂಗು ಮುಚ್ಚಿಕೊಳ್ಳುವಂತೆ ಆಗುವುದು ಇತ್ಯಾದಿ ಸಮಸ್ಯೆಗಳನ್ನು ನೀಲಗಿರಿಯ ಎಲೆಗಳ ವಿವಿಧ ರೀತಿಯ ಬಳಕೆಯಿಂದ ಬಗೆಹರಿಸಿಕೊಳ್ಳಬಹುದು. ಉಸಿರಾಟದ ಸಮಸ್ಯೆ ನಿವಾರಣೆಗೆ ನೀಲಗಿರಿಯ ಎಲೆಗಳ ಪರಿಣಾಮಕಾರಿ ಬಳಕೆ
ಅಷ್ಟೇ ಅಲ್ಲದೆ ಮಾಂಸ ಖಂಡಗಳ ಮತ್ತು ಕೀಲು ನೋವುಗಳ ಉಪಶಮನದಲ್ಲಿ ಆಯಿಂಟ್ಮೆಂಟ್ ರೂಪದಲ್ಲಿ ಉಪಯೋಗಕ್ಕೆ ಬರುತ್ತದೆ. ಕೆಲವೊಮ್ಮೆ ನೀಲಗಿರಿ ಎಲೆಗಳನ್ನು ಬಳಸುವ ಸಂದರ್ಭ ಎದುರಾದರೆ ಇನ್ನು ಕೆಲವೊಮ್ಮೆ ನೀಲಗಿರಿ ಎಲೆಗಳಿಂದ ಎಣ್ಣೆಯನ್ನು ಹೊರ ತೆಗೆದು ಮನುಷ್ಯನ ಅನೇಕ ಸಮಸ್ಯೆಗಳಿಗೆ ಬಳಕೆ ಮಾಡುತ್ತಾರೆ.
ನೀಲಗಿರಿ ಎಲೆಗಳ ಉಪಯೋಗಗಳು
ನೀಲಗಿರಿ ಎಲೆಗಳನ್ನು ಹಾಗೇ ಸೇವಿಸಿದರೆ ಅದು ಸಾಮಾನ್ಯವಾಗಿ ನಮ್ಮ ದೇಹದ ಜೀರ್ಣಾಂಗಕ್ಕೆ ಹೊಂದಿಕೊಳ್ಳುವುದಿಲ್ಲ ಅಂದರೆ ಅದನ್ನು ಸುಲಭವಾಗಿ ಜೀರ್ಣವಾಗಿಸಿಕೊಳ್ಳುವ ಶಕ್ತಿ ನಮ್ಮ ಜೀರ್ಣಾಂಗಕ್ಕೆ ಇರುವುದಿಲ್ಲ. ನಿಮ್ಮ ಆಹಾರ ಪದ್ಧತಿಯಲ್ಲಿ ನೀಲಗಿರಿಯನ್ನು ಬಳಸುವ ಇಚ್ಛೆ ನಿಮಗಿದ್ದರೆ, ಒಣಗಿದ ನೀಲಗಿರಿ ಎಲೆಗಳಿಂದ ಚಹಾ ಮಾಡಿ ಸೇವಿಸಬಹುದು. ಇಲ್ಲವೆಂದರೆ ನೀಲಗಿರಿ ಎಲೆಗಳನ್ನು ಚೆನ್ನಾಗಿ ಕುದಿಸಿ, ಅದರಿಂದ ಎಣ್ಣೆ ತೆಗೆದು ಅದನ್ನು ಉಪಯೋಗಿಸಬಹುದು. ಎರಡೂ ರೀತಿಯಲ್ಲಿ ಉಪಯೋಗವಾಗುವ ನೀಲಗಿರಿ ಮನುಷ್ಯನಿಗೆ ಅನೇಕ ಆರೋಗ್ಯ ಪ್ರಯೋಜನಗಳನ್ನು ಒದಗಿಸುತ್ತದೆ.
ನೋವು ನಿವಾರಕ
ನೀಲಗಿರಿ ಎಣ್ಣೆ ತನ್ನ ಅನಲ್ಗೆಸಿಕ್ ಗುಣ ಲಕ್ಷಣಗಳಿಂದ ನೋವು ನಿವಾರಕ ಎಂಬ ಹೆಸರು ಪಡೆದಿದೆ. ಇದರಲ್ಲಿ ಆಂಟಿ – ಇನ್ಫಾಮೇಟರಿ ಗುಣ ಲಕ್ಷಣಗಳು ಕಂಡು ಬಂದಿದ್ದು, ಮನುಷ್ಯನ ಯಾವುದೇ ಬಗೆಯ ದೀರ್ಘ ಕಾಲದ ನೋವುಗಳಿಗೆ ಉತ್ತಮ ಚಿಕಿತ್ಸೆ ಒದಗಿಸುತ್ತದೆ. ಬಹಳಷ್ಟು ದಿನಗಳಿಂದ ಬಳಲುತ್ತಿರುವ ಕೀಲು ನೋವು, ಬೆನ್ನು ನೋವು, ಮಾಂಸ – ಖಂಡಗಳ ಉರಿಯೂತ, ಆರ್ಥ್ರೈಟಿಸ್, ಸೆಳೆತ ಇತ್ಯಾದಿ ಸಮಸ್ಯೆಗಳಿಗೆ ನೀಲಗಿರಿ ತೈಲ ಬಹಳಷ್ಟು ಉಪಯೋಗಕ್ಕೆ ಬರುತ್ತದೆ. ಅಥ್ಲೆಟ್ ಗಳು ತಮ್ಮ ಅಭ್ಯಾಸದ ಸಮಯದಲ್ಲಿ ನೀಲಗಿರಿ ತೈಲವನ್ನು ತಮ್ಮ ದೇಹವನ್ನು ಬಿಸಿಯಾಗಿ ಇಟ್ಟುಕೊಳ್ಳಲು ಬಳಸುತ್ತಾರೆ. ಹೃದಯದ ತೊಂದರೆ ಮತ್ತು ರಕ್ತದ ಒತ್ತಡದ ಸಮಸ್ಯೆಯಿಂದ ಎದುರಾಗುವ ಎದೆ ನೋವು, ನೀಲಗಿರಿ ತೈಲದಿಂದ ಗುಣ ಕಾಣುತ್ತದೆ.
ಒಣ ಚರ್ಮದ ಸಮಸ್ಯೆಗೆ
ಮನುಷ್ಯನಿಗೆ ಚರ್ಮ ಒಣಗಿದಂತಾಗುವುದು ಚರ್ಮದಲ್ಲಿ ಸಿರಾಮೈಡ್ ಅಂಶದ ಕೊರತೆ ಉಂಟಾದಾಗ. ಸಿರಾಮೈಡ್ ಅಂಶ ಚರ್ಮದ ಮೇಲಿನ ಒಂದು ಬಗೆಯ ಕೊಬ್ಬಿನ ಪದರವಾಗಿದ್ದು, ಚರ್ಮದಲ್ಲಿ ನೀರಿನ ತೇವಾಂಶವನ್ನು ನಿರ್ವಹಣೆ ಮಾಡಿ ಜೊತೆಗೆ ಹೊರಗಿನ ಕೀಟಾಣುಗಳ ಹಾವಳಿಯಿಂದ ರಕ್ಷಿಸುತ್ತದೆ. ನೀಲಗಿರಿ ಇಂತಹ ಉತ್ತಮ ಅಂಶವನ್ನು ಹೆಚ್ಚು ಮಾಡಿ ಮನುಷ್ಯನ ದೇಹದ ಚರ್ಮದ ವಿನ್ಯಾಸವನ್ನು ಕಾಪಾಡುತ್ತದೆ. ಇದರಿಂದ ದೇಹದ ಮೇಲಿನ ಕೆಂಪು ಕಲೆಗಳು, ತಲೆ ಹೊಟ್ಟು, ಚರ್ಮದ ಒಣಗುವಿಕೆ ಮತ್ತು ಚರ್ಮದ ಕೆರೆತದಂತಹ ಸಮಸ್ಯೆಗಳು ದೂರಾಗುತ್ತವೆ. ಡರ್ಮಟೈಟಸ್ ಮತ್ತು ಸೋರಿಯಾಸಿಸ್ ನಂತಹ ಚರ್ಮವ್ಯಾಧಿ ಸಮಸ್ಯೆಗಳನ್ನು ಹೊಂದಿರುವ ಜನರಿಗಂತೂ ನೀಲಗಿರಿ ತೈಲ ಬಹಳ ಉಪಯೋಗ ತಂದು ಕೊಡುತ್ತದೆ.
ಬಾಯಿಯ ಆರೋಗ್ಯ
ನೀಲಗಿರಿ ತೈಲದಲ್ಲಿ ಆಂಟಿ – ಬ್ಯಾಕ್ಟೀರಿಯಲ್ ಮತ್ತು ಆಂಟಿ – ಮೈಕ್ರೋಬಿಯಲ್ ಗುಣ ಲಕ್ಷಣಗಳು ತುಂಬಿದ್ದು, ಇದನ್ನು ಅನೇಕ ಕಂಪನಿಗಳಲ್ಲಿ ತಯಾರಾಗುವ ಮೌತ್ವಾಷ್ ಮತ್ತು ಹಲ್ಲುಗಳ ಆರೈಕೆಯ ಔಷಧಿಗಳಲ್ಲಿ ಉಪಯೋಗಿಸುತ್ತಾರೆ. ಬ್ಯಾಕ್ಟೀರಿಯಾಗಳ ವಿರುದ್ಧ ಹೋರಾಡಿ ಹುಳುಕು ಹಲ್ಲು, ಹಲ್ಲುಗಳ ವಸಡಿನ ಸಮಸ್ಯೆ ಮತ್ತು ಪೆರಿಒಡೋಂಟಿಟಿಸ್ ಸಮಸ್ಯೆಯಿಂದ ಮನುಷ್ಯನನ್ನು ಕಾಪಾಡುತ್ತದೆ. ಜೊತೆಗೆ ಹಲ್ಲುಗಳ ಹಿಂದೆ ಕಟ್ಟಿರುವ ಕರೆ, ವಸಡಿನಿಂದ ರಕ್ತ ಸ್ರಾವ ಮತ್ತು ಹಲ್ಲಿನ ವಸಡುಗಳ ಉರಿಯೂತ ಕೂಡ ಬಹಳ ಬೇಗನೆ ಪರಿಹಾರವಾಗುತ್ತದೆ.
ನೆಗಡಿ ಮತ್ತು ಕೆಮ್ಮಿಗೆ ರಾಮಬಾಣ
ನೀಲಗಿರಿ ಎಲೆಗಳ ಪ್ರಸಿದ್ಧತೆ ಶೀತ, ನೆಗಡಿ, ಕೆಮ್ಮಿನಂತಹ ಸಮಸ್ಯೆಗಳನ್ನು ಸುಲಭವಾಗಿ ಪರಿಹರಿಸುವುದರಲ್ಲಿ ಹೆಚ್ಚಿದೆ. ಆಯುರ್ವೇದ ಪದ್ಧತಿಯಲ್ಲಿ ಸಹ ಅನೇಕ ಶೀತದ ಮತ್ತು ಕೆಮ್ಮಿನ ಉತ್ಪನ್ನಗಳ ತಯಾರಿಕೆಯಲ್ಲಿ ನೀಲಗಿರಿಯ ಬಳಕೆ ಆಗುತ್ತದೆ. ಇದು ಎದೆಯಲ್ಲಿರುವ ಸಿಂಬಳವನ್ನು ಕಡಿಮೆ ಮಾಡಿ ಶ್ವಾಸಕೋಶವನ್ನು ಆರೋಗ್ಯಕರವಾಗಿಡುತ್ತದೆ. ಜೊತೆಗೆ ಇದು ಒಂದು ನೈಸರ್ಗಿಕ ಆಂಟಿ – ಇನ್ಫಾಮೇಟರಿ ಏಜೆಂಟ್ ಆಗಿದ್ದು, ಶೀತಕ್ಕೆ ಸಂಬಂಧಿಸಿದ ತಲೆ ನೋವು, ನೆಗಡಿ ಮೂಗು ಕಟ್ಟುವಿಕೆ ಇತ್ಯಾದಿ ಕಾಯಿಲೆಗಳನ್ನು ಶೀಘ್ರವಾಗಿ ನಿವಾರಣೆ ಮಾಡುತ್ತದೆ. ಅಸ್ತಮಾ ಸಮಸ್ಯೆಯಿಂದ ಬಳಲುತ್ತಿರುವವರಿಗೂ ಸಹ ಇದು ಉತ್ತಮ ಔಷಧಿಯಾಗಿ ಕೆಲಸ ಮಾಡುತ್ತದೆ. ಒಟ್ಟಿನಲ್ಲಿ ನೀಲಗಿರಿ ನಿಮ್ಮ ದೇಹದ ಸಂಪೂರ್ಣ ಉಸಿರಾಟದ ವ್ಯವಸ್ಥೆಯನ್ನು ಅಚ್ಚುಕಟ್ಟಾಗಿ ಕಾಪಾಡುತ್ತದೆ.
ಒತ್ತಡ ನಿವಾರಕ
ನೀಲಗಿರಿ ತೈಲ ಮನಸ್ಸಿಗೆ ಹಾಗೂ ದೇಹಕ್ಕೆ ವಿಶ್ರಾಂತಿ ಒದಗಿಸುತ್ತದೆ. ಕೇವಲ ಮಾನಸಿಕ ಒತ್ತಡವನ್ನು ನಿವಾರಣೆ ಮಾಡುವುದು ಮಾತ್ರವಲ್ಲದೆ ಮೆದುಳಿನ ಆರೋಗ್ಯವನ್ನು ಉತ್ತಮಗೊಳಿಸುತ್ತದೆ. ದೇಹದಲ್ಲಿ ರಕ್ತದ ಒತ್ತಡವನ್ನು ನಿಯಂತ್ರಣಕ್ಕೆ ತಂದು ಮನಸ್ಸನ್ನು ಪ್ರಶಾಂತಗೊಳಿಸುತ್ತದೆ. ಇದ್ದಕ್ಕಿದ್ದಂತೆ ಕೋಪಿಸಿಕೊಳ್ಳುವ, ಆತಂಕಕ್ಕೆ ಒಳಗಾಗುವ ಮತ್ತು ಮನಸ್ಸಿಗೆ ಬೇಸರ ಮಾಡಿಕೊಳ್ಳುವ ಗುಣ ಲಕ್ಷಣಗಳನ್ನು ದೂರ ಮಾಡುತ್ತದೆ.
ಇದು ತಿಳಿದಿರಲಿ
*ಯಾವುದೇ ಕಾರಣಕ್ಕೂ ನೀಲಗಿರಿಯ ಎಣ್ಣೆಯನ್ನು ನೇರವಾಗಿ ಸೇವಿಸಬಾರದು. ಇದು ಬಹಳ ಅಪಾಯಕಾರಿ.
ನೀಲಗಿರಿ ಎಲೆಗಳನ್ನು ನೇರವಾಗಿ ಸೇವನೆ ಮಾಡಿದರೆ ಖಂಡಿತವಾಗಿ ಜೀರ್ಣಾಂಗದ ವ್ಯವಸ್ಥೆಗೆ ತಡೆಯುಂಟಾಗಿ ಜಠರದ ಸಮಸ್ಯೆ ಎದುರಾಗುತ್ತದೆ. ಆದ್ದರಿಂದ ನೀಲಗಿರಿ ಚಹಾ ಅಥವಾ ಒಣಗಿದ ನೀಲಗಿರಿ ಸೇವನೆ ಮಾಡುವುದು ಒಳ್ಳೆಯದು.
*ಇನ್ನು ಮಕ್ಕಳ ವಿಷಯಕ್ಕೆ ಬಂದಾಗ, ನೀಲಗಿರಿಯನ್ನು ವೈದ್ಯರ ಸಲಹೆ ಮೇರೆಗೆ ಮಾತ್ರ ನೀಡತಕ್ಕದ್ದು. ಏಕೆಂದರೆ ಮಕ್ಕಳ ಆರೋಗ್ಯದ ಮೇಲೆ ನೀಲಗಿರಿ ವಿಷಕಾರಿ ಪರಿಣಾಮಗಳನ್ನು ಬೀರುತ್ತದೆ.
