ಭಾರತೀಯ ಚಿತ್ರರಂಗದ ಶ್ರೀಮಂತ ನಟರಲ್ಲಿ ನಟ ಶಾರುಖ್ ಖಾನ್ ಕೂಡ ಒಬ್ಬರು. ಕೋಟಿ ಕೋಟಿ ಆಸ್ತಿ ಹೊಂದಿರುವ ಶಾರುಖ್ ಖಾನ್ ಮನ್ನತ್ ನಿವಾಸದಲ್ಲಿ ವಾಸವಾಗಿದ್ದಾರೆ. ಇದು ಬಾಂದ್ರಾದ ಟೂರಿಸ್ಟ್ ಸ್ಪಾಟ್ ರೀತಿಯಲ್ಲಿ ಮಾರ್ಪಾಡಾಗಿದೆ. ಅಭಿಮಾನಿಗಳು ಆಗಾಗ ಇಲ್ಲಿಗೆ ಆಗಮಿಸಿ ಶಾರುಖ್ ಖಾನ್ಗಾಗಿ ಕಾಯುತ್ತಾ ಇರುತ್ತಾರೆ. ಆದ್ರೆ ಸದ್ಯ ಶಾರುಖ್ ಖಾನ್ ಕುಟುಂಬ ಅಲ್ಲಿ ವಾಸವಾಗಿಲ್ಲ. ಕೋಟ್ಯಾಂತರ ಬೆಲೆ ಬಾಳುವ ಮನ್ನತ್ ನಿವಾಸವನ್ನು ತೊರೆದ ಶಾರುಖ್ ಕುಟುಂಬಸ್ಥರು ಸದ್ಯ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದಾರೆ.
ಶಾರುಖ್ ಖಾನ್ ಅವರು ಸ್ಟಾರ್ ನಟ. ಹೀಗಾಗಿ, ಅವರು ವಾಸಿಸಲು ‘ಮನ್ನತ್’ ನಿವಾಸ ಸೂಕ್ತ ಸ್ಥಳ. ಇಲ್ಲಿ ಅಭಿಮಾನಿಗಳು ಬರದಂತೆ ತಡೆಯಲು ದೊಡ್ಡ ತಡೆ ಗೋಡೆ ಇದೆ. ಅಲ್ಲದೆ, ಈ ಮನೆಗೆ ದೊಡ್ಡ ಗೇಟ್ ಕೂಡ ಇದೆ. ಆದಾಗ್ಯೂ ಶಾರುಖ್ ಖಾನ್ ಈ ನಿವಾಸ ತೊರೆದು ಅಪಾರ್ಟ್ಮೆಂಟ್ಗೆ ಸ್ಥಳಾಂತರಗೊಳ್ಳುತ್ತಿರುವುದು ಏಕೆ ಎನ್ನುವ ಪ್ರಶ್ನೆ ಹಲವರಿಗೆ ಶುರುವಾಗಿದೆ. ಅಲ್ಲದೆ ಕೋಟ್ಯಾಂತರ ಬೆಲೆ ಬಾಳುವ ನಿವಾಸವಿದ್ದರು ಬಾಡಿಗೆ ಮನೆಗೆ ಹೋಗಿರೋದು ಯಾಕೆ ಎಂಬ ಕುತೂಹಲ ಸಹಜವಾಗಿದೆ.
ಶಾರುಖ್ ಖಾನ್ ಅವರ ಪತ್ನಿ ಗೌರಿ ಖಾನ್ ‘ಮನ್ನತ್’ ನವೀಕರಣ ಕಾರ್ಯದ ಜವಾಬ್ದಾರಿ ಪಡೆದುಕೊಂಡಿದ್ದಾರೆ. ಈ ಮನೆ ಆರು ಅಂತಸ್ತನ್ನು ಹೊಂದಿದ್ದು, ಮತ್ತೆರಡು ಅಂತಸ್ತನ್ನು ಕಟ್ಟುವ ಆಲೋಚನೆ ಇವರಿಗೆ ಇದೆ. ಈ ಮನೆ ಸಮುದ್ರ ತೀರಕ್ಕೆ ಸಮೀಪ ಇರುವುದರಿಂದ ‘ಮಹಾರಾಷ್ಟ್ರ ಕರಾವಳಿ ವಲಯ ನಿರ್ವಹಣಾ ಪ್ರಾಧಿಕಾರ’ದ ಒಪ್ಪಿಗೆಯನ್ನು ಗೌರಿ ಖಾನ್ ಕೇಳಿದ್ದಾರೆ. ಇದಕ್ಕೆ ಅರ್ಜಿ ಸಲ್ಲಿಕೆ ಮಾಡುತ್ತಿದ್ದಂತೆ ಇವರು ಬೇರೆ ಮನೆಗೆ ಶಿಫ್ಟ್ ಆಗಿದ್ದಾರೆ.
ಶಾರುಖ್ ಖಾನ್ ಅವರು ಮುಂಬೈನ ಪಾಲಿ ಹಿಲ್ಸ್ನಲ್ಲಿ ಎರಡು ಲಕ್ಷುರಿ ಡುಪ್ಲೆಕ್ಸ್ ಅಪಾರ್ಟ್ಮೆಂಟ್ನ ಬಾಡಿಗೆ ಪಡೆದಿದ್ದಾರೆ. ಮೂರು ವರ್ಷಗಳ ಕಾಲ ಒಪ್ಪಂದ ಇರಲಿದೆ. ಮೊದಲ ಅಪಾರ್ಟ್ಮೆಂಟ್ ಜಾಕಿ ಭಗ್ನಾನಿ, ದೀಪ್ಶಿಕಾ ದೇಶ್ಮುಖ್ ಅವರ ಒಡೆತನದಲ್ಲಿ ಇದೆ. ಇದಕ್ಕೆ ಅವರು ತಿಂಗಳಿಗೆ 11.54 ಲಕ್ಷ ರೂಪಾಯಿ ಬಾಡಿಗೆ ನೀಡಬೇಕಿದೆ. ಭದ್ರತಾ ಮೊತ್ತವಾಗಿ 32.97 ಲಕ್ಷ ರೂಪಾಯಿ ಪಾವತಿಸಿದ್ದಾರೆ. ಎರಡನೇ ಅಪಾರ್ಟ್ಮೆಂಟ್ ನಿರ್ಮಾಪಕ ವಶು ಭಗ್ನಾನಿ ಹೆಸರಿನಲ್ಲಿ ಇದ್ದು, ಇದಕ್ಕೆ 12.61 ಲಕ್ಷ ರೂಪಾಯಿ ತಿಂಗಳಿಗೆ ಪಾವತಿಸುತ್ತಿದ್ದಾರೆ.
